ಶಿವಮೊಗ್ಗದಲ್ಲಿ ಗುರುಕುಲ ಮಾದರಿಯ ಸಾಂಸ್ಕೃತಿಕ ವಿಶ್ವವಿದ್ಯಾಲಯ

ಶಿವಮೊಗ್ಗ : ಜಿಲ್ಲೆಯಲ್ಲಿ ತಕ್ಷಶಿಲಾ ಗುರುಕುಲ ಮಾದರಿಯ ಸಾಂಸ್ಕೃತಿಕ ವಿಶ್ವವಿದ್ಯಾಲಯವನ್ನು ಆರಂಭಿಸಲು ರಾಮಚಂದ್ರಾಪುರ ಮಠ ಮುಂದೆ ಬಂದಿದೆ.

ಹೊಸನಗರ ಬಳಿಯಿರುವ 200 ಎಕರೆ ವಿಸ್ತಾರದ ಪ್ರದೇಶದಲ್ಲಿ ಈ ಗುರುಕುಲವನ್ನು ಆರಂಭಿಸಲು ಉದ್ದೇಶಿಸಲಾಗಿದೆ ಎಂದು ರಾಘವೇಶ್ವರ ಭಾರತಿ ಸ್ವಾಮೀಜಿಗಳು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. ವೇದ, ಪುರಾಣ, ಸಂಗೀತ ಶಾಸ್ತ್ರ, ಜ್ಯೋತಿಷ್ಯ ಶಾಸ್ತ್ರ, ಭಾರತೀಯ ಪ್ರಾಚೀನ ಕಲೆಗಳು, ಪುರಾತತ್ವ, ವಾಸ್ತು, ನೃತ್ಯ, ಪಾಕ ಶಾಸ್ತ್ರ ಹಾಗೂ ಆಧುನಿಕ ಕಂಪ್ಯೂಟರ್‌ ವಿಜ್ಞಾನದ ಬಗೆಗೆ ಈ ಸಾಂಸ್ಕೃತಿಕ ವಿಶ್ವ ವಿದ್ಯಾಲಯದಲ್ಲಿ ತರಗತಿಗಳನ್ನು ಆರಂಭಿಸಲಾಗುವುದು.

ಇಲ್ಲಿ ಪದವಿಯನ್ನು ಮುಗಿಸಿದ ನಂತರ ವಿದ್ಯಾರ್ಥಿಗಳಿಗೆ ವೃತ್ತಿಪರ ತರಬೇತಿಯನ್ನು ನೀಡಲಾಗುವುದು. ಇದರಿಂದ ಇಂದಿನ ಆಧುನಿಕ ಸಮಾಜದಲ್ಲಿ ಹೊಂದಿಕೊಂಡು, ಸ್ವತಂತ್ರವಾಗಿ ಬಾಳುವುದು ಸುಲಭವಾಗುತ್ತದೆ. ವಿಶ್ವ ವಿದ್ಯಾಲಯದವಲ್ಲಿ ಒಟ್ಟು 18 ವಿಷಯಗಳನ್ನು ಬೋಧಿಸಲಾಗುತ್ತದೆ. ಅದಕ್ಕಾಗಿ ಸಮರ್ಥ ಅಧ್ಯಾಪಕ ವರ್ಗ ಮತ್ತು ಆರ್ಥಿಕ ನೆರವಿಗಾಗಿ ಮಠ ಕಾರ್ಯಪ್ರವೃತ್ತವಾಗಿದೆ ಎಂದು ಸ್ವಾಮೀಜಿ ಹೇಳಿದರು.

(ಇನ್ಫೋ ವಾರ್ತೆ)