ನ್ಯೂಯಾರ್ಕ್‌ ಮೇಲೆ ಭಯೋತ್ಪಾದಕರ ದಾಳಿ: ಎರಡು ಕಟ್ಟಡ ನೆಲಸಮ

ನ್ಯೂಯಾರ್ಕ್‌ : ಭಯೋತ್ಪಾದಕರು ಇಲ್ಲಿಯ ವಿಶ್ವ ವ್ಯಾಪಾರ ಕೇಂದ್ರದ ಮೇಲೆ ಮಂಗಳವಾರ ಬೆಳಿಗ್ಗೆ ಎರಡು ವಿಮಾನಗಳನ್ನು ಢಿಕ್ಕಿ ಹೊಡೆಸಿದ ಪರಿಣಾಮವಾಗಿ ಎರಡು ಕಟ್ಟಡಗಳು ನೆಲಸಮವಾಗಿವೆ.

ಈ ದಾಳಿಯಿಂದಾಗಿ ಅಮೆರಿಕದಲ್ಲಿ ಅಲ್ಲೋಲ ಕಲ್ಲೋಲ ಉಂಟಾಗಿದ್ದು, ದಾಳಿಕೋರರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಅಮೆರಿಕದ ಅಧ್ಯಕ್ಷ ಬುಷ್‌ ಎಚ್ಚರಿಸಿದ್ದಾರೆ. ಈ ದಾಳಿಯ ವಿರುದ್ಧ ತನಿಖೆ ನಡೆಸುವುದಾಗಿ ಅವರು ಹೇಳಿದ್ದಾರೆ.

ಈ ದುರ್ಘಟನೆಯಲ್ಲಿ ನೂರಾರು ಜನ ಸತ್ತಿರುವ ಮತ್ತು ಸಾವಿರಾರು ಜನ ಗಾಯಗೊಂಡಿರುವುದಾಗಿ ಶಂಕಿಸಲಾಗಿದೆ. ಅದಲ್ಲದೆ, ಇಡೀ ನ್ಯೂಯಾರ್ಕ್‌ ನಗರವನ್ನು ತೆರವುಗೊಳಿಸಬೇಕೆಂದು ನ್ಯೂಯಾರ್ಕ್‌ ನಗರದ ಮೇಯರ್‌ ಕರೆ ನೀಡಿದ್ದಾರೆ.

ದಾಳಿ ನಡೆಸಿರುವ ಆರೋಪವನ್ನು ತಾಲಿಬಾನ್‌ ಸರ್ಕಾರ ಅಲ್ಲಗಳೆದಿದೆ. ಮತ್ತೊಂದು ಅಪಹೃತ ವಿಮಾನ ವಾಷಿಂಗ್ಟನ್‌ನತ್ತ ತೆರಳುತ್ತಿರುವುದಾಗಿ ಮೂಲಗಳಿಂದ ತಿಳಿದುಬಂದಿದೆ.