ಬೆಂಗಳೂರು ಜಿಲ್ಲೆಯ ನಾಲ್ಕು ರಸ್ತೆ ಅಪಘಾತಗಳಲ್ಲಿ 9 ಸಾವು

ಬೆಂಗಳೂರು : ಶನಿವಾರ ರಾತ್ರಿಯಿಂದ ಭಾನುವಾರದವರೆಗೆ ನಗರ ಹಾಗೂ ಬೆಂಗಳೂರು ಗ್ರಾಮಾಂತರ ಪ್ರದೇಶದಲ್ಲಿ ಸಂಭವಿಸಿರುವ 4 ರಸ್ತೆ ಅಪಘಾತಗಳಲ್ಲಿ ಒಂದು ಮಗು, ಇಬ್ಬರು ಹೆಂಗಸರು ಸೇರಿದಂತೆ ಒಟ್ಟು 9 ಮಂದಿ ಮೃತ ಪಟ್ಟಿದ್ದಾರೆ.

ಭಾನುವಾರ ಮಧ್ಯಾಹ್ನ 1.30ರ ಸುಮಾರಿಗೆ ನೆಲಮಂಗಲ ಬಳಿಯ ಹೆದ್ದಾರಿ 48ರ ಕರೇಕ್ರಾಸ್‌ನಲ್ಲಿ ಮ್ಯಾಕ್ಸಿ ಕ್ಯಾಬ್‌ ಮತ್ತು ಗ್ಯಾಸ್‌ ಟ್ಯಾಂಕರ್‌ ಮುಖಾಮುಖಿಯಿಂದ ಮೂವರು ಮೃತಪಟ್ಟಿದ್ದು, 32 ಜನ ಗಾಯಗೊಂಡಿದ್ದಾರೆ. ಮೃತಪಟ್ಟವರಲ್ಲಿ ಇಬ್ಬರನ್ನು ರಾಮಣ್ಣ (45) ಹಾಗೂ ಪಾರ್ವತಮ್ಮ (35) ಎಂದು ಗುರ್ತಿಸಲಾಗಿದೆ. ಸತ್ತಿರುವ 70 ವರ್ಷ ವಯಸ್ಸಿನ ಮತ್ತೊಬ್ಬರ ಗುರುತು ಇನ್ನೂ ಪತ್ತೆಯಾಗಿಲ್ಲ. ಖಚಾಖಚಿ ಜನರಿಂದ ತುಂಬಿದ್ದ ಮ್ಯಾಕ್ಸಿಕ್ಯಾಬ್‌ ಕುಣಿಗಲ್‌ನಿಂದ ನೆಲಮಂಗಲಕ್ಕೆ ಬರುತ್ತಿತ್ತು. ಗ್ಯಾಸ್‌ ಟ್ಯಾಂಕರ್‌ ಮಂಗಳೂರಿಗೆ ಹೋಗುತ್ತಿತ್ತು ಎಂದು ನೆಲಮಂಗಲ ಪೊಲೀಸರು ತಿಳಿಸಿದ್ದಾರೆ.

ಶನಿವಾರ ಮಧ್ಯರಾತ್ರಿ ಬೆಂಗಳೂರಿನ ಕಾಟನ್‌ಪೇಟೆ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ಮಾರುತಿ ವ್ಯಾನ್‌ ಹಾಗೂ ಖಾಸಗಿ ಬಸ್‌ ನಡುವೆ ಸಂಭವಿಸಿದ ಢಿಕ್ಕಿಯಿಂದ ಒಂದೇ ಕುಟುಂಬದ ಮೂವರು ಸತ್ತಿದ್ದಾರೆ. ಮೃತಪಟ್ಟವರನ್ನು ಸುಬ್ರಹ್ಮಣ್ಯದ ಜ್ಯೋತಿಪ್ರಕಾಶ್‌ (42), ಅವರ ಪತ್ನಿ ಅನಿತಾ (35) ಹಾಗೂ ಮಗಳು ಅಮೃತಾ (11) ಎಂದು ಗುರ್ತಿಸಲಾಗಿದೆ.

ಉಳಿದಂತೆ ಭಾನುವಾರ ಸಂಭವಿಸಿದ ಇತರೆ ಮೂರು ಅಪಘಾತಗಳಲ್ಲಿ ತಲಾ ಒಬ್ಬೊಬ್ಬರು ಮೃತಪಟ್ಟಿದ್ದಾರೆ.

(ಇನ್ಫೋ ವಾರ್ತೆ)