ಹುಬ್ಬಳ್ಳಿ ರೈಲು ನಿಲ್ದಾಣದಲ್ಲಿ ಧ್ವನಿ ಪ್ರತಿಕ್ರಿಯೆ ಪದ್ಧತಿ ಜಾರಿ

ಹುಬ್ಬಳ್ಳಿ : ನಗರದ ರೈಲು ನಿಲ್ದಾಣದಲ್ಲಿ ಈಗ ಧ್ವನಿ ಪ್ರತಿಕ್ರಿಯೆ ಪದ್ಧತಿ ಜಾರಿಗೆ ಬಂದಿದೆ. ದಕ್ಷಿಣ ಕೇಂದ್ರ ರೈಲ್ವೇಸ್‌ ಈ ವ್ಯವಸ್ಥೆಯನ್ನು ಪರಿಚಯಿಸಿದೆ.

ನಗರದಿಂದ ದೂರದೂರುಗಳಿಗೆ ಹೊರಡುವ ರೈಲಿನಲ್ಲಿ ಯಾವ ಸೀಟುಗಳು ಖಾಲಿ ಇವೆ, ಅವು ಹೊರಡುವ ಸಮಯವೆಷ್ಟು, ಟಿಕೆಟ್‌ ದರವೇನು ಮೊದಲಾದ ವಿಷಯಗಳನ್ನು ಧ್ವನಿ ಪ್ರತಿಕ್ರಿಯೆಯಿಂದಲೇ ತಿಳಿಯಬಹುದಾಗಿದೆ ಎಂದು ಹುಬ್ಬಳ್ಳಿ ವಿಭಾಗದ ಮೇನೇಜರ್‌ ಯು.ಸಿ.ಡಿ.ದ್ವಾರಕೀಶ್‌ ಶ್ರೇಣಿ ಸುದ್ದಿಗಾರರಿಗೆ ತಿಳಿಸಿದರು.

ಪ್ರಯಾಣಿಕರು 1345 ನಂಬರಿಗೆ ಫೋನಾಯಿಸಿದರೆ ಸಾಕು. ಅವರಿಗೆ ಬೇಕಾದ ಮಾಹಿತಿಗಳು ದೊರೆಯಲಿವೆ. ಇದಕ್ಕಾಗಿ ರೈಲ್ವೆ ನಿಲ್ದಾಣಕ್ಕೆ ಎಡತಾಕಬೇಕಿಲ್ಲ. ಈ ವ್ಯವಸ್ಥೆ ಸಿಕಂದರಾಬಾದ್‌, ಹೈದರಾಬಾದ್‌, ಗುಂಟೂರು, ವಿ-ಜಯವಾಡ, ರಾಜಾಮುಂದ್ರಿ, ಕಾಕಿನಾಡ, ಭೀಮಾವರಂ ಹಾಗೂ ತೆನಾಲಿ ರೈಲು ನಿಲ್ದಾಣಗಳಲ್ಲಿ ಜಾರಿಯಲ್ಲಿದೆ. ಹುಬ್ಬಳ್ಳಿ ರೈಲ್ವೆ ವಿಭಾಗದ ವ್ಯಾಪ್ತಿಯ ಹೊಸಪೇಟೆ, ವಾಸ್ಕೋಡ ಗಾಮ, ಮೀರಜ್‌ ಹಾಗೂ ಕೊಲ್ಹಾಪುರ ನಿಲ್ದಾಣಗಳಲ್ಲೂ ಸದ್ಯದಲ್ಲೇ ಈ ವ್ಯವಸ್ಥೆಯನ್ನು ಜಾರಿಗೆ ತರಲಾಗುವುದು ಎಂದು ಶ್ರೇಣಿ ಹೇಳಿದರು.

(ಇನ್ಫೋ ವಾರ್ತೆ)