BATF

ಬೆಂಗಳೂರು : ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಅವರ ಅಧ್ಯಕ್ಷತೆಯಲ್ಲಿ ಶುಕ್ರವಾರ ಜರುಗಿದ ಬೆಂಗಳೂರು ಅಜೆಂಡಾ ಟಾಸ್ಕ್‌ಪೋರ್ಸ್‌ ಸಭೆ, ಈವರೆಗೆ ಸಾಗಿಬಂದ ಹಾದಿ ಹಾಗೂ ಭವಿಷ್ಯತ್ತಿನ ಸವಾಲುಗಳ ಬಗೆಗೆ ಪರಾಮರ್ಶೆ ನಡೆಸಿತು. ಮಹಾನಗರದ ಏಳು ಸಾರ್ವನಿಕ ನಿಗಮ, ಮಂಡಳಿಗಳ ಅಧಿಕಾರಿಗಳು ಸಭೆಯಲ್ಲಿ ಭಾಗವಹಿಸಿದ್ದರು.

ಬೆಂಗಳೂರು ನೀರು ಸರಬರಾಜು ಹಾಗೂ ಒಳಚರಂಡಿ ಮಂಡಳಿ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ, ಬೆಂಗಳೂರು ಟೆಲಿಕಾಂ, ಬೆಂಗಳೂರು ಮಹಾನಗರ ಪಾಲಿಕೆ ಸಾರಿಗೆ ಸಂಸ್ಥೆ , ಬೆಂಗಳೂರು ನಗರ ಪೊಲೀಸ್‌, ಬೆಂಗಳೂರು ಸಿಟಿ ಕಾರ್ಪೊರೇಷನ್‌ ಹಾಗೂ ಕರ್ನಾಟಕ ವಿದ್ಯುತ್‌ ಪ್ರಸರಣ ನಿಗಮದ ಅಧಿಕಾರಿಗಳು ನ್ಯಾಶನಲ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಆಡ್ವಾನ್ಸ್‌ಡ್‌ ಸ್ಟಡೀಸ್‌ನ ಆಡಿಟೋರಿಯಂನಲ್ಲಿ ಸಭೆ ನಡೆಸಿದರು. ಬಾಕಿಯಿರುವ ಹಾಗೂ ಚಾಲ್ತಿಯಲ್ಲಿರುವ ಅಲ್ಪಕಾಲೀನ ಹಾಗೂ ದೀರ್ಘಕಾಲೀನ ಕಾಮಗಾರಿಗಳ ಪ್ರಗತಿಯ ಸಮೀಕ್ಷೆ ಯನ್ನು ಸಭೆ ನಡೆಸಿತು.

ಪೊಲೀಸರೇ, ನೀವು ಇನ್ನುಷ್ಟು ಸುಧಾರಿಸಬೇಕು

ಕಾರ್ಯಪಡೆಯಲ್ಲಿರುವ ಬಹುತೇಕ ನಿಗಮ, ಮಂಡಳಿಗಳ ಈವರೆಗಿನ ಸಾಧನೆಯ ಬಗೆಗೆ ಸಭೆ ತೃಪ್ತಿ ವ್ಯಕ್ತಪಡಿಸಿತು. ಸಭೆಯ ಅಸಮಾಧಾನಕ್ಕೆ ತುತ್ತಾದ ಏಕೈಕ ಅಂಗವೆಂದರೆ ಬೆಂಗಳೂರು ನಗರ ಪೊಲೀಸ್‌. ಅಪರಾಧ ಪ್ರಕರಣಗಳನ್ನು ನಿಯಂತ್ರಣದಲ್ಲಿಡಲು ವಿಫಲವಾದ ಪೊಲೀಸ್‌ ವ್ಯವಸ್ಥೆ ಕುರಿತು ಸಭೆಯಲ್ಲಿ ಅಸಮಾಧನ ವ್ಯಕ್ತವಾಯಿತು.

ನಗರದ 60 ವಾರ್ಡ್‌ಗಳಲ್ಲಿ ಬಾಗಿಲಿನಿಂದ ಬಾಗಿಲಿಗೆ ತೆರಳಿ ಕಸ ಸಂಗ್ರಹಿಸುವ ಸ್ವಚ್ಛ ಬೆಂಗಳೂರು ಯೋಜನೆಯ ಅನುಷ್ಠಾನದ ಕುರಿತು ಸಭೆ ಮೆಚ್ಚುಗೆ ವ್ಯಕ್ತಪಡಿಸಿತು. ಇದೇ ವೇಳೆಯಲ್ಲಿ ಸ್ವಯಂ ತೆರಿಗೆ ಯೋಜನೆಯಡಿ 85 ಕೋಟಿ ರುಪಾಯಿಗಳ ಸಂಗ್ರಹ, ಕಳೆದ 6 ತಿಂಗಳಲ್ಲಿ ದುರ್ಬಲ ವರ್ಗದವರಿಗೆ ಬಿಡಿಎ ವತಿಯಿಂದ 6 ಸಾವಿರ ನಿವೇಶನಗಳ ವಿತರಣೆ, ಕೇಬಲ್‌ ಅಳವಡಿಸುವಲ್ಲಿ ವಿವಿಧ ಏಜೆನ್ಸಿಗಳ ನಡುವಣ ತಿಕ್ಕಾಟವನ್ನು ತಡೆಗಟ್ಟಲು ರೋಡ್‌ ಕಟ್ಟಿಂಗ್‌ ಸೆಲ್‌ನ ನೇಮಕ, 9 ಪೊಲೀಸ್‌ ಠಾಣೆಗಳಲ್ಲಿನ ಅತ್ಯುತ್ತಮ ವ್ಯವಸ್ಥೆ ಹಾಗೂ ಗಣಕೀಕೃತ ಎಫ್‌ಐಆರ್‌ ವರದಿ ವಿತರಣೆ ಮುಂತಾದ ಸಾಧನೆಗಳ ಕುರಿತು ಸಭೆ ಮೆಚ್ಚುಗೆ ವ್ಯಕ್ತಪಡಿಸಿತು.

ಕಳೆದ 2 ವರ್ಷಗಳಲ್ಲಿ 17 ಸಾವಿರ ನಿವೇಶನಗಳನ್ನು ವಿತರಿಸಿರುವ ಬಿಡಿಎ ದಾಖಲೆಯ ಸಾಧನೆಯನ್ನು ಗುರುವಾರ ಹೆಬ್ಬಾಳ ಮೇಲ್ಸೇತುವೆ ಕಾಮಗಾರಿಗೆ ಶಿಲಾನ್ಯಾಸ ನೆರವೇರಿಸುವಾಗ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಪ್ರಸ್ತಾಪಿಸಿದುದನ್ನು ಇಲ್ಲಿ ಸ್ಮರಿಸಬಹುದು.

(ಇನ್ಫೋ ವಾರ್ತೆ)