ಗುಣಮಟ್ಟ ಶಿಕ್ಷಣ ನೀಡಲು ಬೆಂಗಳೂರು ವಿವಿ- ವರ್ಲ್ಡ್‌ಸ್ಪೇಸ್‌ ಕೈಜೋಡಣೆ

ಬೆಂಗಳೂರು : ಉಪಗ್ರಹ ಸಂಪರ್ಕ ಹಾಗೂ ವಿವಿಧ ಹೊಸ ತಂತ್ರಜ್ಞಾನಗಳ ಅಭಿವೃದ್ಧಿಗಾಗಿ ಅಮೆರಿಕಾ ಮೂಲದ ವರ್ಲ್ಡ್‌ಸ್ಪೇಸ್‌ ಕಾರ್ಪೊರೇಷನ್‌ ಭಾರತದಲ್ಲಿ ಸಾಕಷ್ಟು ಮಿಲಿಯನ್‌ ಡಾಲರ್‌ ಬಂಡವಾಳ ಹೂಡಲಿದೆ.

ವರ್ಲ್ಡ್‌ಸ್ಪೇಸ್‌ನ ಸಿಇಓ ನೋ ಎ ಸಮರ ಗುರುವಾರ ನಗರದಲ್ಲಿ ಸುದ್ದಿಗಾರರಿಗೆ ಈ ವಿಷಯ ತಿಳಿಸಿದರು. ಉಪಗ್ರಹದ ಮೂಲಕ ಗುಣಮಟ್ಟ ಶಿಕ್ಷಣ ಕೊಡುವ ನಿಟ್ಟಿನಲ್ಲಿ ಬೆಂಗಳೂರು ವಿಶ್ವವಿದ್ಯಾಲಯದೊಟ್ಟಿಗೆ ಒಡಂಬಡಿಕೆಯಾಂದಕ್ಕೆ ಸಹಿ ಹಾಕಿದ ಸಮರ, ಭಾರತ ದೊಡ್ಡ ಮಾರುಕಟ್ಟೆ. ವಾಣಿಜ್ಯ ಹಾಗೂ ಸಾಮಾಜಿಕ ಕಳಕಳಿ ದೃಷ್ಟಿಯಿಂದ ಇಲ್ಲಿ ಸಾಕಷ್ಟು ಬಂಡವಾಳ ಹೂಡಲು ನಾವು ಉತ್ಸುಕರಾಗಿದ್ದೇವೆ ಎಂದರು.

ಭಾರತದಲ್ಲಿ 30 ದಶಲಕ್ಷ ಅಮೆರಿಕನ್‌ ಡಾಲರ್‌ ಬಂಡವಾಳ ಹೂಡುವುದಾಗಿ ವರ್ಲ್ಡ್‌ಸ್ಪೇಸ್‌ ಕಾರ್ಪೊರೇಷನ್ನಿನ ಅಧಿಕಾರಿಯಾಬ್ಬರು ಇತ್ತೀಚೆಗೆ ಹೇಳಿದ್ದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಮರ, ನಾವು ಹೂಡಲಿರುವ ಬಂಡವಾಳ ಅದಕ್ಕೂ ಹೆಚ್ಚಾಗುವ ಸಾಧ್ಯತೆಯೂ ಇದೆ ಎಂದರು. ಆದರೆ, ಇಂತಿಷ್ಟೇ ಮೊತ್ತವನ್ನು ಹೂಡಲಿದ್ದೇವೆ ಎಂದು ಹೇಳಲು ನಿರಾಕರಿಸಿದರು.

ಈಗಾಗಲೇ ಬಿಪಿಎಲ್‌ ಲಿಮಿಟೆಡ್‌ ಜೊತೆ ಒಡಂಬಡಿಕೆ ಮಾಡಿಕೊಂಡಿರುವ ವರ್ಲ್ಡ್‌ಸ್ಪೇಸ್‌, ಗುರುವಾರ ಬೆಂಗಳೂರು ವಿಶ್ವ ವಿದ್ಯಾಲಯದ ರಿಜಿಸ್ಟ್ರಾರ್‌ ಡಿ.ಕೆ.ರಂಗಸ್ವಾಮಿ ಹಾಗೂ ಕಂಪನಿಯ ಭಾರತದ ನಿರ್ದೇಶಕ ಎಂ.ಸೆಬಾಸ್ಟಿಯನ್‌ ಸಹಿ ಹಾಕುವ ಮೂಲಕ ಇನ್ನೊಂದು ಒಪ್ಪಂದ ಮಾಡಿಕೊಂಡಿತು. ಒಡಂಬಡಿಕೆಗೆ ಸಹಿ ಹಾಕಿದ ಸಂದರ್ಭದಲ್ಲಿ ರಾಜ್ಯ ವಾರ್ತಾ ಸಚಿವ ಪ್ರೊ. ಬಿ.ಕೆ. ಚಂದ್ರಶೇಖರ್‌, ವಿವಿ ಕುಲಸಚಿವ ಕೆ.ಸಿದ್ಧಪ್ಪ ಹಾಗೂ ವರ್ಲ್ಡ್‌ಸ್ಪೇಸ್‌ ಕಾರ್ಯಕಾರಿ ಉಪಾಧ್ಯಕ್ಷ ಎಂ.ಜಿ.ಚಂದ್ರಶೇಖರ್‌ ಹಾಜರಿದ್ದರು.

(ಪಿಟಿಐ)