ಮಾನವ ಕ್ಲೋನಿಂಗ್‌ ಪ್ರಯತ್ನಗಳಿಗೆ ಯುನೆಸ್ಕೋ ನಿರ್ದೇಶಕರ ವಿರೋಧ

ಬೀಜಿಂಗ್‌ : ಮನುಷ್ಯನ ಕ್ಲೋನಿಂಗ್‌ ಕುರಿತು ನಡೆಯುತ್ತಿರುವ ಪ್ರಯತ್ನಗಳ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿರುವ ಯುನೆಸ್ಕೋದ ಪ್ರಧಾನ ನಿರ್ದೇಶಕ ಕೊಚಿರೊ ಮಟ್ಸೂರ್‌ ಅವರು, ಇಂಥ ಪ್ರಯತ್ನಗಳು ಮನುಷ್ಯ ಜನಾಂಗದ ಘನತೆಗೆ ವಿರುದ್ಧವಾದುದು ಎಂದು ಟೀಕಿಸಿದ್ದಾರೆ.

ಕೆಲವು ಮಂದಿ ಮನುಷ್ಯನ ಕ್ಲೋನಿಂಗ್‌ಗೆ ಪ್ರಯತ್ನಿಸುತ್ತಿರುವ ಸುದ್ದಿಗಳನ್ನು ಓದಿ ನನಗೆ ಆಘಾತವಾಯಿತು ಎಂದು ಇ-9 ರಾಷ್ಟ್ರಗಳ ಸಚಿವಾಲಯ ಸಮೀಕ್ಷೆ ಸಭೆಯಲ್ಲಿ ಭಾಗವಹಿಸಲು ಬೀಜಿಂಗ್‌ಗೆ ಆಗಮಿಸಿರುವ ಕೊಚಿರೊ ಪಿಟಿಐ ಪ್ರತಿನಿಧಿಗೆ ತಿಳಿಸಿದ್ದಾರೆ.

1997 ರಲ್ಲಿಯೇ ಮನುಷ್ಯನ ಕ್ಲೋನಿಂಗ್‌ ನಿಷೇಧಕ್ಕೆ ಸಂಬಂಧಿಸಿದ ಜಾಗತಿಕ ಘೋಷಣೆಯನ್ನು ಯುನೆಸ್ಕೋ ಹೊರಡಿಸಿತ್ತು . ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲೂ ಈ ಘೋಷಣೆ ಅಂಗೀಕೃತವಾಗಿತ್ತು ಎನ್ನುವ ಅಂಶಗಳನ್ನು ಕೊಚಿರೊ ನೆನಪಿಸಿಕೊಂಡರು. ಬಯೋ ಎಥಿಕ್ಸ್‌ಗೆ ಸಂಬಂಧಿಸಿದ ನೂತನ ನೀತಿ ಸಂಹಿತೆಯ ಮುಂದಾಳಾಗಿ ಯುನೆಸ್ಕೋ ಇರುವುದಾಗಿ ಅವರು ಹೇಳಿದರು.

2001 ನೇ ಇಸವಿಯ ಪ್ರಾರಂಭದಲ್ಲಿ ಪಶ್ಚಿಮದ ಕೆಲವು ಸಂಶೋಧಕರು ಮಾನವ ಕ್ಲೋನಿಂಗ್‌ಗೆ ಪ್ರಯತ್ನಿಸುತ್ತಿರುವುದಾಗಿ ನೀಡಿದ್ದ ಹೇಳಿಕೆ ಕ್ಲೋನಿಂಗ್‌ ಕುರಿತು ಬಿಸಿ ಚರ್ಚೆ ಉಂಟು ಮಾಡಿದುದನ್ನು ಇಲ್ಲಿ ಸ್ಮರಿಸಬಹುದು. ಅಮೆರಿಕ, ರಷ್ಯಾ, ಇಟಲಿ, ಬ್ರಿಟನ್‌ ಮುಂತಾದ ದೇಶಗಳು ಮಾನವ ಕ್ಲೋನಿಂಗ್‌ಗೆ ವಿರೋಧ ವ್ಯಕ್ತಪಡಿಸಿವೆ.

(ಪಿಟಿಐ)