ಸಿಟಿ ಟ್ಯಾಕ್ಸಿ : 24 ಗಂಟೆ ಸೇವಾ ನಿಯಂತ್ರಣ ಕೇಂದ್ರದ ಸ್ಥಾಪನೆ

ಬೆಂಗಳೂರು : ದಿನದ 24 ಗಂಟೆಗಳ ಕಾಲವೂ ಕಾರ್ಯ ನಿರ್ವಹಿಸುವ ನಿಯಂತ್ರಣ ಕೇಂದ್ರವೊಂದನ್ನು ಸ್ಥಾಪಿಸುವ ಮೂಲಕ ಗ್ರಾಹಕರ ನೋವು ನಲಿವುಗಳಿಗೆ ಸ್ಪಂದಿಸಲು ಕರ್ನಾಟಕ ರೇಡಿಯೋ ಟ್ಯಾಕ್ಸಿ ಮಾಲಿಕರ ಮತ್ತು ಚಾಲಕರ ಸಂಘ ನಿರ್ಧರಿಸಿದೆ.

ರೇಡಿಯೋ ಟ್ಯಾಕ್ಸಿ ಚಾಲಕರು ಗ್ರಾಹಕರೊಂದಿಗೆ ಯಾವುದೇ ರೀತಿಯ ತಕರಾರು ತೆಗೆದರೆ, ವಾಹನದಲ್ಲಿರುವ ವೈರ್‌ಲೆಸ್‌ ಮೂಲಕ 24 ಗಂಟೆ ಕಾರ್ಯ ನಿರ್ವಹಿಸುವ ನಿಯಂತ್ರಣ ಕೇಂದ್ರವನ್ನು ಸಂಪರ್ಕಿಸಬಹುದಾಗಿದೆ. ಇಲ್ಲವೇ ದೂರವಾಣಿ ಸಂಖ್ಯೆ 3523636ನ್ನು ಸಂಪರ್ಕಿಸಬಹುದು ಎಂದು ಸಂಘದ ಕಾರ್ಯದರ್ಶಿ ಎಸ್‌. ಗೋಪಾಲ್‌ ತಿಳಿಸಿದ್ದಾರೆ.

ಸಾರಿಗೆ ಇಲಾಖೆ ನಿಗದಿ ಪಡಿಸಿರುವ ದರ ಪಟ್ಟಿಯಂತೆ ಗ್ರಾಹಕರು ಬಿಲ್‌ ಸಂದಾಯ ಮಾಡಬಹುದು. ಚಾಲಕರು ಹೆಚ್ಚಿನ ದರಕ್ಕೆ ಒತ್ತಾಯಿಸಿದರೆ ಅಥವಾ ಪಡೆದರೆ ದೂರು ಸಲ್ಲಿಸುವಂತೆ ಅವರು ತಿಳಿಸಿದ್ದಾರೆ. ಕಾಯುವ ಸಮಯದ ದರವನ್ನು ಕೂಡ ದರಪಟ್ಟಿಯಲ್ಲಿ ಸೇರಿಸಲಾಗಿರುತ್ತದೆ ಎಂದು ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.