ಅಂಕೋಲಾ - ಶಿರಸಿಯಲ್ಲಿ ರ್ಯಾಟ್‌ ಫೀವರ್‌ಗೆ 10 ಜನರ ಬಲಿ

ಕಾರವಾರ : ಕಳೆದ ಒಂದು ತಿಂಗಳ ಅವಧಿಯಲ್ಲಿ ಉತ್ತರ ಕನ್ನಡ ಜಿಲ್ಲೆಯ ಅಂಕೋಲ ಹಾಗೂ ಶಿರಸಿಯಲ್ಲಿ ರ್ಯಾಟ್‌ ಫೀವರ್‌ ಮತ್ತು ನಿಮೋನಿಯಾಕ್ಕೆ ಹತ್ತು ಜನರು ಬಲಿಯಾಗಿದ್ದಾರೆ. ಜಿಲ್ಲೆಯಲ್ಲಿ ಜ್ವರ ಪೀಡಿತರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ.

ಅಂಕೋಲ ತಾಲೂಕಿನ ಬಡಗೇರಿ ಹಾಗೂ ಬೆಳಂಬಾರದ ತಾಳಬೈಲ್‌ಗಳಲ್ಲಿ ಈ ರೋಗ ಹೆಚ್ಚಾಗಿ ಕಾಣಿಸಿಕೊಂಡಿದೆ. ರೋಗಕ್ಕೆ ತಾಳೆಬೈಲಿನ ಮೂವರು ಹಾಗೂ ಬಡಗೇರಿಯ ಐವರು ಬಲಿಯಾಗಿದ್ದಾರೆ. ಜಿಲ್ಲಾ ಆರೋಗ್ಯಾಧಿಕಾರಿಗಳ ಪ್ರಕಾರ ಅಂಕೋಲ ಹಾಗೂ ಶಿರಸಿಯಲ್ಲಿ ಸತ್ತವರು ನಿಮೋನಿಯಾ ಪೀಡಿತರೇ ವಿನಾ ಇಲಿ ಜ್ವರಕ್ಕೆ ತುತ್ತಾದವರಲ್ಲ.

ಆದರೆ, ಮಣಿಪಾಲದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಅಂಕೋಲ ತಾಲೂಕಿನ ಮಧುಕೇಶ್ವರ ಬಾಬುರಾಯ ನಾಯ್ಕ ಅವರಿಗೆ ಮಾತ್ರ ಇಲಿ ಜ್ವರ ಇರುವುದು ಸಾಬೀತಾಗಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ಜ್ವರದಿಂದ ಬಳಲುತ್ತಿರುವವರ ರಕ್ತದ ಮಾದರಿಗಳನ್ನು ಪರೀಕ್ಷಿಸಲಾಗುತ್ತಿದೆ. ಕೆಲವು ರಕ್ತದ ಮಾದರಿಗಳನ್ನು ಹೆಚ್ಚಿನ ಪರೀಕ್ಷೆಗಾಗಿ ಬೆಂಗಳೂರಿಗೂ ಕಳುಹಿಸಿಕೊಡಲಾಗಿದೆ ಎಂದು ಅವರು ತಿಳಿಸಿದ್ದಾರೆ.

(ಇನ್‌ಫೋ ವಾರ್ತೆ)