ಬೆಳಗಾವಿ, ಮಂಡ್ಯಕ್ಕೆ ಸುಧಾರಿತ ವಿದ್ಯುತ್‌ವ್ಯವಸ್ಥೆ : ಕೇಂದ್ರ ಸಚಿವ

ಪುತ್ತೂರು : ಕರ್ನಾಟಕ ರಾಜ್ಯದ ವಿದ್ಯುತ್‌ ಅಭಿವೃದ್ಧಿಗಾಗಿ ಕೇಂದ್ರ ಸರಕಾರ ಕಳೆದ ವರ್ಷ 200 ಕೋಟಿ ರುಪಾಯಿಗಳನ್ನು ಬಿಡುಗಡೆ ಮಾಡಿದ್ದು, ಇ.ಸಿ.ಡಿ.ಸಿ. ಯೋಜನೆಯಡಿ ಈಗ ಬೆಳಗಾವಿ ಹಾಗೂ ಮಂಡ್ಯದಲ್ಲಿ ಪೂರ್ಣ ಪ್ರಮಾಣದ ಸುಧಾರಿತ ವಿದ್ಯುತ್‌ ವ್ಯವಸ್ಥೆ ಜಾರಿಗೆ ತರಲಾಗುತ್ತಿದೆ.

ಈ ವಿಷಯವನ್ನು ಕೇಂದ್ರ ಇಂಧನ ಹಾಗೂ ಪರಿಸರ ಖಾತೆ ಸಚಿವ ಸುರೇಶ್‌ ಪ್ರಭು ತಿಳಿಸಿದ್ದಾರೆ. ಪುತ್ತೂರಿನಲ್ಲಿ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತಿದ್ದ ಅವರು, ರಾಜ್ಯದಲ್ಲಿ ಉತ್ತಮ ಗುಣಮಟ್ಟದ ತಾಂತ್ರಿಕ ವ್ಯವಸ್ಥೆಯಾಂದಿಗೆ ವಿದ್ಯುತ್‌ ವ್ಯವಸ್ಥೆಯ ಅಭಿವೃದ್ಧಿಗೆ ಕೇಂದ್ರ ನೆರವು ನೀಡಲಿದೆ ಎಂದರು.

ರಾಜ್ಯದಲ್ಲಿ ಹೈಡ್ರೋ ಮತ್ತು ಮಿನಿ ಹೈಡ್ರೋ ವಿದ್ಯುತ್‌ ಉತ್ಪಾದನಾ ಘಟಕ ಸ್ಥಾಪಿಸಿ, ವಿದ್ಯುತ್‌ ಕೊರತೆ ನೀಗಿಸಬೇಕು. ವಿದ್ಯುತ್‌ ವ್ಯವಸ್ಥೆಯನ್ನು ನಡೆಸಲು ರಾಜ್ಯದಕ್ಕೆ ಸಾಧ್ಯವಾಗದಿದ್ದರೆ, ಕೇಂದ್ರವೇ ಹೈಡ್ರೋ ವಿದ್ಯುತ್‌ ಯೋಜನೆಗಳನ್ನು ಪೂರ್ಣವಾಗಿ ಅಭಿವೃದ್ಧಿ ಪಡಿಸಿ ಜನತೆಗೆ ನೀಡುವುದು ಎಂದು ಅವರು ಹೇಳಿದರು.

ವಿಜಯ ನಗರದಲ್ಲಿ ಈಗಾಗಲೇ ಇಂತಹ ಅಭಿವೃದ್ಧಿ ಕಾರ್ಯ ನಡೆಯುತ್ತಿದೆ ಎಂದೂ ಅವರು ಹೇಳಿದರು. ಮಿನಿ ಹೈಡ್ರೋ ವಿದ್ಯುತ್‌ ಯೋಜನೆಗಳು ವಿದ್ಯುತ್‌ ಕೊರತೆ ನೀಗಿಸುವಲ್ಲಿ ವರದಾನವಾಗಿವೆ ಎಂದೂ ಅವರು ಅಭಿಪ್ರಾಯಪಟ್ಟರು. ಈ ಸಂದರ್ಭದಲ್ಲಿ ಡಿ.ವಿ. ಸದಾನಂದ ಗೌಡ, ಮಂಗಳೂರು ಶಾಸಕ ಯೋಗೀಶ್‌ ಭಟ್‌, ಮಾಜಿ ಶಾಸಕ ಕೆ. ರಾಮಭಟ್‌ ಮೊದಲಾದವರು ಉಪಸ್ಥಿತರಿದ್ದರು.