ತುಮಕೂರು ಬಾಟಾ ಷೋರೂಂಗೆ ಬೆಂಕಿ :ಕೋಟ್ಯಂತರ ರು. ಪಾದುಕೆ ಭಸ್ಮ

ತುಮಕೂರು : ಇಲ್ಲಿನ ಬಿ.ಎಚ್‌. ರಸ್ತೆಯಲ್ಲಿರುವ ಎರಡು ಅಂತಸ್ತುಗಳ ಬೃಹತ್‌ ಬಾಟಾ ಷೋರೂಂಗೆ ಭಾನುವಾರ ಮಧ್ನಾಹ್ನ ಬೆಂಕಿ ಬಿದ್ದು , ಕೋಟ್ಯಂತರ ರುಪಾಯಿ ಪಾದುಕೆಗಳು ಸುಟ್ಟು ಭಸ್ಮವಾಗಿವೆ. ಮಧ್ನಾಹ್ನ 3.30ರಲ್ಲಿ ಕಾಣಿಸಿಕೊಂಡ ಬೆಂಕಿ ರೌದ್ರಾವತಾರತಾಳಿ ಇಡಿ ಕಟ್ಟಡವನ್ನೇ ಸುಟ್ಟು ಕರಕಲಾಗಿಸಿದೆ.

ಸಿಬ್ಬಂದಿ ಹಾಗೂ ಇಂಧನದ ಕೊರತೆಯಿಂದಾಗಿ ಅಗ್ನಿಶಾಮಕ ಪಡೆ ಬಿರುಸಿನ ಕಾರ್ಯಾಚರಣೆಗಿಳಿಯಲು ಮೂರು ಗಂಟೆಗಳ ಕಾಲ ಬೇಕಾಯಿತು. ಅಷ್ಟು ಹೊತ್ತಿಗಾಗಲೇ ಇಡೀ ಮಳಿಗೆ ಬೆಂಕಿಗಾಹುತಿಯಾಗಿತ್ತು. ಭಾನುವಾರ ಮಧ್ನಾಹ್ನ ಅಂಗಡಿ ಬಾಗಿಲು ಹಾಕುವ ಸಲುವಾಗಿ ವಿದ್ಯುತ್‌ ಸ್ವಿಚ್‌ ಆರಿಸಿದಾಗ ಶಾರ್ಟ್‌ ಸರ್ಕೀಟ್‌ನಿಂದ ಬೆಂಕಿ ಕಾಣಿಸಿಕೊಂಡಿತು.

ಷೋರೂಂ ಸಿಬ್ಬಂದಿ ಬೆಂಕಿ ಆರಿಸಲು ಪ್ರಯತ್ನಿಸಿದರಾದರೂ ಫಲಕಾರಿಯಾಗಲಿಲ್ಲ. ಕಾಳ್ಗಿಚ್ಚಿನಂತೆ ಆವರಿಸಿದ ಬೆಂಕಿ ಚಪ್ಪಲಿ ಅಂಗಡಿಯ ಎಲ್ಲ 12 ಮಳಿಗೆಗಳೂ ವ್ಯಾಪಿಸಿ ಭಾರಿ ನಷ್ಟ ಉಂಟು ಮಾಡಿತು. ತುಮಕೂರಿನ ಈ ಮಳಿಗೆ ದೇಶದಲ್ಲೇ ಅತಿದೊಡ್ಡ ಶೂ ಷೋರೂಂ ಎಂಬ ಖ್ಯಾತಿಗೆ ಪಾತ್ರವಾಗಿತ್ತು.

ಅಣ್ಣೆಗೌಡ ನೇತೃತ್ವದ ಅಗ್ನಿಶಾಮಕ ಪಡೆ ಅವಿರತ ಹೋರಾಟ ನಡೆಸಿ ಬೆಂಕಿಯನ್ನು ಆರಿಸುವಹೊತ್ತಿಗೆ ಕಾಲ ಮಿಂಚಿತ್ತು. ಬೆಂಕಿ ಆರಿಸುವ ಯತ್ನದಲ್ಲಿ ಸಾರ್ವಜನಿಕರು ಅಗ್ನಿಶಾಮಕ ಪಡೆಗೆ ನೆರವಾಗಲು ನುಗ್ಗಿ ಅನಗತ್ಯ ಗೊಂದಲ ಉಂಟು ಮಾಡಿದ್ದೂ, ಕಾರ್ಯಾಚರಣೆಗೆ ಮತ್ತಷ್ಟು ಅಡ್ಡಿಯುಂಟುಮಾಡಿತು.