ಪ್ಯಾರಿಸ್‌ನ ವಾಸ್ತು ಶಿಲ್ಪ ಶೃಂಗ ಸಭೆಗೆ ಬೆಂಗಳೂರಿನ ಡಾ. ಚೂಡಾಮಣಿ

ಬೆಂಗಳೂರು : ಪ್ಯಾರಿಸ್‌ನಲ್ಲಿ ಸೆಪ್ಟೆಂಬರ್‌ 10ರಿಂದ ನಾಲ್ಕು ದಿನಗಳ ಕಾಲ ನಡೆಯುವ ವಾಸ್ತು ಶಿಲ್ಪ ಕುರಿತ ಶತಮಾನದ ಶೃಂಗ ಸಮ್ಮೇಳನಕ್ಕೆ ದಕ್ಷಿಣ ಏಷ್ಯಾ ರಾಷ್ಟ್ರಗಳ ಏಕೈಕ ಪ್ರತಿನಿಧಿಯಾಗಿ ನಗರದ ಡಾ. ಚೂಡಾಮಣಿ ನಂದಗೋಪಾಲ್‌ ಭಾಗವಹಿಸಲಿದ್ದಾರೆ.

ಯುನೆಸ್ಕೋ ಮತ್ತು ಐಕೋಮಸ್‌ ನೇತೃತ್ವದಲ್ಲಿ ನಡೆಯಲಿರುವ ಈ ಸಮ್ಮೇಳನದಲ್ಲಿ ಅವರು ಮ ಧ್ಯಕಾಲೀನ ವಾಸ್ತು ಶಿಲ್ಪದ ಸಮ್ಮಿಶ್ರಣ ಮತ್ತು ಸಮಸ್ಯೆಗಳ ಕುರಿತು ಪ್ರಬಂಧ ಮಂಡಿಸಲಿದ್ದಾರೆ. ಚೂಡಾಮಣಿ ಅವರು ಚಿತ್ರಕಲಾ ಪರಿಷತ್ತಿನ ಸ್ನಾತಕೋತ್ತರ ಮತ್ತು ಸಂಶೋಧನಾ ವಿಭಾಗದ ಮುಖ್ಯಸ್ಥರಾಗಿ ಕೆಲಸ ಮಾಡುತ್ತಿದ್ದಾರೆ. ದೇಶದ ಶೈಕ್ಷಣಿಕ ಸಂಸ್ಥೆಗಳು, ಕಲಾ ಸಂಗ್ರಹಾಲಯಗಳು ಮತ್ತು ಕಲಾ ಗ್ಯಾಲರಿಗಳ ಸಮಿತಿಯಲ್ಲಿ ಸಕ್ರಿಯರಾಗಿದ್ದಾರೆ.

ಕಲಾಕ್ಷೇತ್ರದಲ್ಲಿ ಸುಮಾರು 25 ವರ್ಷಗಳ ಅನುಭವ ಉಳ್ಳ ಚೂಡಾಮಣಿ ಅವರು ಅನೇಕ ಸಂಶೋಧನಾ ಪ್ರಬಂಧಗಳನ್ನು ಹಾಗೂ ಗ್ರಂಥಗಳನ್ನು ಪ್ರಕಟಿಸಿದ್ದಾರೆ. ನೆಹರೂ ಹಾಗೂ ಯುನೆಸ್ಕೋ ಫೆಲೋಷಿಪ್‌ಗೂ ಅವರು ಪಾತ್ರರಾಗಿದ್ದಾರೆ.

(ಇನ್ಫೋ ವಾರ್ತೆ)