ಮದುವೆಯ ನಂತರ ಮದುಮಗಳು ತವರಿಗೆ, ಹುಡುಗ ಮರಳಿ ಜೈಲಿಗೆ!

ಬೆಳಗಾವಿ : ಇಲ್ಲಿನ ಕೇಂದ್ರ ಕಾರಾಗೃಹ ಕ್ಷಣಕಾಲ ಕಲ್ಯಾಣ ಮಂಟಪವಾಗಿ ಬದಲಾಗುವ ಮುಹೂರ್ತವನ್ನು ಒದಗಿಸಿದ್ದು ಸೆಪ್ಟಂಬರ್‌ 1 ರ ಶನಿವಾರ! ರೇವಪ್ಪ ಬಸರಗಿ ಹಾಗೂ ಶಾಂತಮ್ಮ ಹಾರ ಬದಲಿಸಿಕೊಂಡು ಸತಿಪತಿಗಳಾದ ಘಟನೆಗೆ ಕಾರಾಗೃಹದ ಸಿಬ್ಬಂದಿ ವರ್ಗ ಸಾಕ್ಷ್ಯ ಒದಗಿಸಿದ್ದರು. ಮಂತ್ರಗಳಿಗಿಂತ ಮನಸ್ಸುಗಳಿಗೇ ಅಲ್ಲಿ ಅಗ್ರಸ್ಥಾನ.

ಗೃಹಸ್ಥಾಶ್ರಮ ಪ್ರವೇಶಿಸಿದ ರೇವಪ್ಪ ಬಸರಗಿ ಕೇಂದ್ರ ಕಾರಾಗೃಹದಲ್ಲಿನ ಖೈದಿ. ಖೈದಿಯಾದರೇನು, ಭಾವನೆಗಳಿಗೇನು ಬರವೇ? ಪ್ರೇಮಕ್ಕೆ ಸರಳುಗಳು ಅಡ್ಡಿಯಾದಾವೇ? ರೇವಪ್ಪನನ್ನು ಮದುವೆಯಾಗಲು ಶಾಂತಮ್ಮ ಒಪ್ಪಿಕೊಂಡಳು. ಶಾಂತಮ್ಮ ರೇವಪ್ಪನಿಗೆ ಮೆಚ್ಚುಗೆಯಾದಳು. ರೇವಪ್ಪ ಕಾರಾಗೃಹದಿಂದ ಹೊರಬರುವಂತಿಲ್ಲವಾದ್ದರಿಂದ ವಧು ವರರ ಕಲ್ಯಾಣಕ್ಕೆ ಕಾರಾಗೃಹವೇ ವೇದಿಕೆಯಾಯಿತು. ಮದುವೆಯ ವಿಷಯವನ್ನು ಕಾರಾಗೃಹದ ಎಸ್ಪಿ ಪಿ.ಎಂ. ವೆಂಕಟರಾಯಪ್ಪ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ರೇವಪ್ಪ ಕಳೆದ ಐದು ವರ್ಷಗಳಿಂದ ಜೈಲುವಾಸಿ. ಮಾತ್ರವಲ್ಲ ಅನಾಥ ಕೂಡ. ರೇವಪ್ಪನ ಮದುವೆಯಾಗಿರುವ ಶಾಂತಮ್ಮ ಕೂಡ ಅನಾಥೆಯೇ. ಅನಾಥರಿಬ್ಬರು ಮದುವೆಯಾಗುವ ಮೂಲಕ ಜೊತೆಯಾಗಿದ್ದಾರೆ. ಅಂದಹಾಗೆ, ಶನಿವಾರ ನಡೆದ ಮದುವೆಯನ್ನು ಕೋರ್ಟ್‌ ಕೂಡ ಒಪ್ಪಿಕೊಂಡಿದೆ.

ಇಬ್ಬರು ಅನಾಥರ ಮದುವೆಯೇನೋ ಆಯಿತು. ಅಂದಮಾತ್ರಕ್ಕೆ ಹೊಸ ಬಾಳು ಶುರುವಾಯಿತು ಎಂದೇನಲ್ಲ . ಮದುವೆ ಜರುಗಿದ ನಂತರ ರೇವಪ್ಪ ಮತ್ತೆ ಸರಳುಗಳ ಹಿಂದೆ ತೆರಳಿದ. ಶಾಂತಮ್ಮ ಕುತ್ತಿಗೆಯಲ್ಲಿ ಮಾಂಗಲ್ಯ, ಕೈಯ್ಯಲ್ಲಿ ಮದರಂಗಿ ಹೊತ್ತು ಮರಳಿ ತನ್ನ ಹಳ್ಳಿಗೆ ತೆರಳಿದಳು.

(ಪಿಟಿಐ)