ಉ.ಕ.ದಲ್ಲಿ ಹೈಕೋರ್ಟ್‌ ಪೀಠ, ಸರ್ಕಾರದ ಅಸಹಾಯಕತೆಗೆ ಕೃಷ್ಣ ವಿಷಾದ

ಬೆಂಗಳೂರು : ಉತ್ತರ ಕರ್ನಾಟಕದಲ್ಲಿ ಹೈಕೋರ್ಟ್‌ ಪೀಠ ಸ್ಥಾಪನೆ ವಿಷಯದ ಕುರಿತು ರಾಜ್ಯ ಸರ್ಕಾರದ ಅಸಹಾಯಕತೆಗೆ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ತೀವ್ರ ವಿಷಾದ ವ್ಯಕ್ತಪಡಿಸಿದ್ದು , ಉತ್ತರ ಕರ್ನಾಟಕದ ಜನತೆಯ ದೀರ್ಘ ಕಾಲದ ಈ ಒತ್ತಾಯ ಪ್ರಸ್ತುತ ಹೈಕೋರ್ಟ್‌ ಅಂಗಳದಲ್ಲಿದೆ ಎಂದು ಹೇಳಿದ್ದಾರೆ.

ಇತ್ತೀಚೆಗಷ್ಟೇ ಹೈಕೋರ್ಟ್‌ನಿಂದ ಸುಪ್ರಿಂಕೋರ್ಟ್‌ಗೆ ತೆರಳಿದ ನ್ಯಾಯಮೂರ್ತಿ ಪಿ.ವಿ.ರೆಡ್ಡಿ ಅವರು ತಮ್ಮ ನಿರ್ಗಮನಕ್ಕೆ ಮುನ್ನ ನ್ಯಾಯಮೂರ್ತಿಗಳ ಸಮಿತಿಯಾಂದು ಉತ್ತರ ಕರ್ನಾಟಕ ನ್ಯಾಯಪೀಠದ ವಿಷಯವನ್ನು ಗಮನಿಸುತ್ತಿರುವುದಾಗಿ ತಿಳಿಸಿದ ವಿಷಯವನ್ನು ಕೃಷ್ಣ ಬಹಿರಂಗಪಡಿಸಿದರು. ಕರ್ನಾಟಕ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿಯಾಗಿ ನಾಗೇಂದ್ರ ಕುಮಾರ್‌ ಜೈನ್‌ ಅವರು ಶುಕ್ರವಾರ ಪ್ರಮಾಣ ವಚನ ಸ್ವೀಕರಿಸಿದ ಕಾರ್ಯಕ್ರಮದ ನಂತರ ಸುದ್ದಿಗೋಷ್ಠಿಯಲ್ಲಿ ಮುಖ್ಯಮಂತ್ರಿ ಮಾತನಾಡುತ್ತಿದ್ದರು.

ಹೈಕೋರ್ಟ್‌ ಪೀಠ ಸ್ಥಾಪನೆಯ ವಿಷಯವೀಗ ಹೈಕೋರ್ಟ್‌ ಅಂಗಳದಲ್ಲಿದೆ. ನ್ಯಾಯಮೂರ್ತಿ ಜೈನ್‌ ಅವರು ಈಗಷ್ಟೇ ಅಧಿಕಾರ ವಹಿಸಿಕೊಂಡಿರುವುದರಿಂದ ಸ್ವಲ್ಪಕಾಲ ಕಾಯೋಣ. ಪ್ರಾಮಾಣಿಕವಾಗಿ ಹೇಳುವುದಾದರೆ, ಹೈಕೋರ್ಟ್‌ ಪೀಠ ಸ್ಥಾಪನೆಯಲ್ಲಿ ರಾಜ್ಯ ಸರ್ಕಾರ ಮಾಡಲು ಉಳಿದಿರುವುದು ಅತ್ಯಲ್ಪ ಕಾರ್ಯ ಎಂದು ಕೃಷ್ಣ ತಿಳಿಸಿದರು.

ಅವಶ್ಯಬಿದ್ದಲ್ಲಿ ಉತ್ತರ ಕರ್ನಾಟಕ ಪ್ರದೇಶದಲ್ಲಿ ನ್ಯಾಯಪೀಠ ಸ್ಥಾಪಿಸುವ ಬಗೆಗೆ ಕೇಂದ್ರ ಸರ್ಕಾರ ಹಾಗೂ ಸುಪ್ರಿಂಕೋರ್ಟನ್ನು ಇನ್ನೊಮ್ಮೆ ಒತ್ತಾಯಿಸಲು ರಾಜ್ಯ ಸರ್ಕಾರ ಹಿಂಜರಿಯುವುದಿಲ್ಲ ಎಂದು ಮುಖ್ಯಮಂತ್ರಿ ಸ್ಪಷ್ಟಪಡಿಸಿದರು.

ದಲಿತ ಮಹಿಳೆಯ ಬೆತ್ತಲೆ ಮೆರವಣಿಗೆ ಅಮಾನುಷ

ಬಳ್ಳಾರಿ ಜಿಲ್ಲೆಯ ಒಣೇನೂರಿನಲ್ಲಿ ದಲಿತ ಮಹಿಳೆಯಾಬ್ಬಳ ಬೆತ್ತಲೆ ಮೆರವಣಿಗೆ ನಡೆಸಿರುವ ಕೃತ್ಯವನ್ನು ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ತೀವ್ರವಾಗಿ ಖಂಡಿಸಿದರು. ಭಾನುವಾರ ರಾತ್ರಿ ನಡೆದ ಈ ಹೇಯ ಕೃತ್ಯ ರಾಜ್ಯದ ಘನತೆಗೆ ಕಪ್ಪು ಚುಕ್ಕೆಯಾಗಿ ಪರಿಣಮಿಸಿದೆ ಎಂದು ಕೃಷ್ಣ ಹೇಳಿದರು. ಆರೋಪಿಗಳಿಗೆ ಜಾಮೀನು ದೊರೆತ ಬಗೆಗೆ ಅವರು ವಿಷಾದ ವ್ಯಕ್ತಪಡಿಸಿದರು.

(ಪಿಟಿಐ)

ಮುಖಪುಟ / ಕೃಷ್ಣಗಾರುಡಿಯ ಕನ್ನಡಿ