ಬೆಂಗಳೂರಿನಲ್ಲಿ ವಿಮಾನಯಾನ ವಸ್ತುಸಂಗ್ರಹಾಲಯದ ಆರಂಭ

ಬೆಂಗಳೂರು : ಭಾರತದ ವಿಮಾನಯಾನ ಇತಿಹಾಸದ ವಿವಿಧ ಘಟ್ಟಗಳನ್ನು ಪರಿಚಯಿಸುವ ದೇಶದ ಮೊಟ್ಟ ಮೊದಲ ವಿಮಾನ ಯಾನ ವಸ್ತುಸಂಗ್ರಹಾಲಯ ಹಾಗೂ ಹಿಂದೂಸ್ಥಾನ್‌ ಏರೋನಾಟಿಕ್ಸ್‌ ಪರಂಪರೆ ಕೇಂದ್ರವನ್ನು ಬೆಂಗಳೂರಿನಲ್ಲಿ ಆರಂಭಿಸಲಾಗಿದೆ.

ಬೆಂಗಳೂರು ವಿಮಾನ ನಿಲ್ದಾಣದ ರನ್‌ವೇ ಎದುರಿನ ಸುಮಾರು 10 ಎಕರೆ ಪ್ರದೇಶದಲ್ಲಿ ಸ್ಥಾಪಿಸಲಾಗಿರುವ ಈ ಎರಡು ಕೇಂದ್ರಗಳನ್ನು ಗುರುವಾರ ರಾಜ್ಯ ಪ್ರವಾಸೋದ್ಯಮ ಸಚಿವ ರೋಷನ್‌ಬೇಗ್‌ ಉದ್ಘಾಟಿಸಿದರು. ಕಳೆದ ಆರು ದಶಕಗಳ ಅವಧಿಯಲ್ಲಿ ದೇಶವು ವೈಮಾನಿಕ ಕ್ಷೇತ್ರದಲ್ಲಿ ಸಾಧಿಸಿರುವ ಸಾಧನೆ - ಪ್ರಗತಿಯನ್ನು ಈ ಕೇಂದ್ರಗಳು ಪ್ರತಿಬಿಂಬಿಸುತ್ತದೆ.

ಭಾರತ ವೈಮಾನಿಕ ಇತಿಹಾಸದ ಎಲ್ಲಾ ವಿಧದ ವಿಮಾನಗಳು, ಹೆಲಿಕಾಪ್ಟರ್‌ ಮಾದರಿಗಳು ಮತ್ತು ಅವುಗಳ ಛಾಯಾಚಿತ್ರಗಳನ್ನು ವಸ್ತು ಸಂಗ್ರಹಾಲಯ ಒಳಗೊಂಡಿದೆ. ಸಾರ್ವಜನಿಕ ವಲಯದ ಹಿಂದೂಸ್ಥಾನ್‌ ಏರೋನಾಟಿಕ್ಸ್‌ (ಎಚ್‌.ಎ.ಎಲ್‌) ಆಸಕ್ತಿಯ ಫಲವಾಗಿ ಈ ಕೇಂದ್ರಗಳು ಸ್ಥಾಪನೆಗೊಂಡಿವೆ.

ಎಚ್‌.ಎ.ಎಲ್‌.ನ ಪರಂಪರೆಯ ಕೇಂದ್ರ ವಿಮಾನಯಾನ ಸೇವಾ ಕ್ಷೇತ್ರದ ಉದ್ಯೋಗ ಆಕಾಂಕ್ಷಿಗಳಿಗೆ ಶೈಕ್ಷಣಿಕ, ವೈಜ್ಞಾನಿಕ ಮತ್ತು ಸಾಂಸ್ಕೃತಿಕ ಮಾಹಿತಿ ಒದಗಿಸುವ ಅಧ್ಯಯನ ಕೇಂದ್ರವಾಗಿದೆ. ಭಾರತೀಯ ಬಾಹ್ಯಾಕಾಶ ಯೋಜನೆಗಳಿಗೆ ಎಚ್‌.ಎ.ಎಲ್‌ ನೀಡಿರುವ ಕೊಡುಗೆಗಳ ಮಾಹಿತಿಯೂ ಇಲ್ಲಿ ಲಭ್ಯ.

ಎಚ್‌.ಎ.ಎಲ್‌. ಆರಂಭವಾದ ದಿನದಿಂದ ಇಂದಿನವರೆಗೆ ಮಾಡಿರುವ ಸಾಧನೆಯ ಪ್ರತಿಯಾಂದು ಹಂತಗಳನ್ನೂ ಇಲ್ಲಿ ಕಾಣಬಹುದಾಗಿದೆ. ಅತ್ಯಂತ ಹಗುರ ವಿಮಾನ (ಎಲ್‌.ಸಿ.ಎ), ಅತ್ಯಾಧುನಿಕ ಹಗುರ ಹೆಲಿಕಾಪ್ಟರ್‌ ಮೊದಲಾದವುಗಳನ್ನು ಸಂಗ್ರಹಾಲಯದಲ್ಲಿ ಪ್ರದರ್ಶನಕ್ಕಿಡಲಾಗಿದೆ.

ಪ್ರವಾಸಿ ತಾಣ : ಯುವ ಜನತೆಗೆ ಅದರಲ್ಲೂ ವಿಮಾನಯಾನ ಸೇವಾ ಕ್ಷೇತ್ರದ ಉದ್ಯೋಗ ಆಕಾಂಕ್ಷಿಗಳಿಗೆ ಮಾರ್ಗದರ್ಶನ ಕೇಂದ್ರವೂ ಈಗಿರುವ ಈ ವಸ್ತು ಸಂಗ್ರಹಾಲಯ, ಬೆಂಗಳೂರು ಪ್ರವಾಸಿಗರ ಆಕರ್ಷಣೆಯ ಕೇಂದ್ರವಾಗುವುದರಲ್ಲಿ ಸಂಶಯವಿಲ್ಲ.

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...