ಮೈಸೂರಿನಲ್ಲಿ ಉಚಿತ ತುರ್ತು ಚಿಕಿತ್ಸಾ ಅಂಬ್ಯುಲೆನ್ಸ್‌ ಸೇವೆ ಆರಂಭ

ಮೈಸೂರು: ನಗರದ ಬಿಜಿಎಸ್‌ ಅಪೊಲೋ ಆಸ್ಪತ್ರೆಯಲ್ಲಿ ಪ್ರಥಮ ಉಚಿತ ತುರ್ತು ಚಿಕಿತ್ಸಾ ಸಂಚಾರಿ ಅಂಬ್ಯುಲೆನ್ಸ್‌ ಮಂಗಳವಾರದಿಂದ ಆರಂಭವಾಗಿದೆ.

ಅತ್ಯಂತ ಕ್ಲಿಷ್ಟ ಪರಿಸ್ಥಿತಿಯಲ್ಲಿ ತುರ್ತುಚಿಕಿತ್ಸೆ ನೀಡಲು ರೋಗಿಯನ್ನು ಆಸ್ಪತ್ರೆಗೆ ಸಾಗಿಸುವುದು ಕಷ್ಟವಾಗುವ ಸಂದರ್ಭದಲ್ಲಿ ಈ ಸಂಚಾರಿ ತುರ್ತು ಚಿಕಿತ್ಸಾ ಆಸ್ಪತ್ರೆ ಸಹಾಯಕ್ಕೆ ಬರಲಿದೆ. ಈ ವಾಹನದಲ್ಲಿ ವೈದ್ಯರು ಮತ್ತು ಸಹಾಯಕರೊಬ್ಬರು ಇರುತ್ತಾರೆ.

ಸದ್ಯದಲ್ಲಿಯೇ ಈ ಅಂಬ್ಯುಲೆನ್ಸ್‌ ಮಾದರಿಯ ಸಂಚಾರಿ ಆಸ್ಪತ್ರೆಗೆ ಫೋನ್‌ ಸಂಪರ್ಕ ದೊರಕಲಿದ್ದು , ಈಗಾಗಲೇ ಸಾರ್ವಜನಿಕರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ಫೋನ್‌ ನಂಬರ್‌ನ್ನು ನೀಡಲಾಗಿದೆ. ತುರ್ತು ಚಿಕಿತ್ಸಾ ಅಂಬ್ಯುಲೆನ್ಸ್‌ನ ಅಗತ್ಯ ಇರುವವರು 566666 ಈ ನಂಬರಿಗೆ ಉಚಿತವಾಗಿ ಫೋನಾಯಿಸಿ ರೋಗಿ ಇರುವ ಸ್ಥಳದ ವಿವರ ನೀಡಬಹುದು.

ರೋಗಿಗೆ ಪ್ರಥಮ ಚಿಕಿತ್ಸೆ ನೀಡಿ, ಆತನನ್ನು ತಕ್ಷಣ ಅದೇ ವ್ಯಾನಿನಲ್ಲಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗುವುದು . ರೋಗಿ ಯಾವ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯ ಬಯಸುತ್ತಾನೋ ಅದೇ ಆಸ್ಪತ್ರೆಗೆ ಆತನನ್ನು ಕರೆದೊಯ್ಯಲಾಗುವುದು. ತುರ್ತು ಚಿಕಿತ್ಸಾ ಅಂಬ್ಯುಲೆನ್ಸ್‌ ಅಲ್ಲದೇ ಇತರ ನಾಲ್ಕು ಅಂಬ್ಯುಲೆನ್ಸ್‌ ಸೇವೆಯನ್ನೂ ಆಸ್ಪತ್ರೆ ಮಂಗಳವಾರ ಆರಂಭಿಸಿದೆ.

(ಪಿಟಿಐ)