ಟೆಲಿಕಾಂ : ಕೇಂದ್ರದ ಏಕಸ್ವಾಮ್ಯದ ವಿರುದ್ಧ ಕೃಷ್ಣ-ಚಂದ್ರಬಾಬು ಧ್ವನಿ

ಬೆಂಗಳೂರು : ಮಾಹಿತಿ ತಂತ್ರಜ್ಞಾನಕ್ಕೆ ಒತ್ತು ಕೊಡುತ್ತಿರುವ ಮತ್ತು ದೇಶದ ಸಿಲಿಕಾನ್‌ ವ್ಯಾಲಿ ಪಟ್ಟಕ್ಕೆ ಪರಸ್ಪರ ಸ್ಪರ್ಧೆಯಲ್ಲಿದ್ದ ಕರ್ನಾಟಕ ಮತ್ತು ಆಂಧ್ರಪ್ರದೇಶದ ಮುಖ್ಯಮಂತ್ರಿಗಳಿಬ್ಬರೂ ದೂರಸಂಪರ್ಕ ಕ್ಷೇತ್ರದಲ್ಲಿ ಕೇಂದ್ರ ಸರಕಾರದ ಏಕಸ್ವಾಮ್ಯವನ್ನು ಅಂತ್ಯಗೊಳಿಸಬೇಕು ಎಂದಿದ್ದಾರೆ.

ಅದು ಕರ್ನಾಟಕ ಮುಖ್ಯಮಂತ್ರಿ ಎಸ್‌. ಎಂ.ಕೃಷ್ಣ ಮತ್ತು ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್‌. ಚಂದ್ರಬಾಬು ನಾಯ್ಡು ಅವರ ಜಂಟಿ ಸುದ್ದಿಗೋಷ್ಠಿ. ನಗರದಲ್ಲಿ ಮಂಗಳವಾರ ಆಯೋಜಿಸಲಾಗಿದ್ದ, ಮಾಹಿತಿ ಮತ್ತು ಸಂಪರ್ಕ ತಂತ್ರಜ್ಞಾನದ ಬಗೆಗಿನ ಪ್ರಾದೇಶಿಕ ಸಭೆಯಲ್ಲಿ ಭಾಗವಹಿಸಿದ ನಂತರದ ಸುದ್ದಿ ಗೋಷ್ಠಿಯಲ್ಲಿ ಅವರು ಭಾಗವಹಿಸಿದ್ದರು.

ದೂರಸಂಪರ್ಕ ವಿಭಾಗದ ನಿಬಂಧನೆಗಳ ಮಿತಿಯನ್ನು ವಿಸ್ತರಿಸಬೇಕು ಎಂಬುದು ಉಭಯ ರಾಜ್ಯದ ಮುಖ್ಯಮಂತ್ರಿಗಳ ಏಕ ಅಭಿಪ್ರಾಯ. ಕೇಂದ್ರದ ಕ್ರಮಗಳ ಬಗೆಗೆ ಮಾತನಾಡುತ್ತಾ ಎಸ್‌. ಎಂ. ಕೃಷ್ಣ, ಏಕಸ್ವಾಮ್ಯದ ಮನೋಭಾವವನ್ನು ನಿಲ್ಲಿಸಬೇಕು. ಆದರೆ ಹಳೇ ಅಭ್ಯಾಸಗಳು ಅಷ್ಟು ಬೇಗ ಮರೆತುಹೋಗುವುದಿಲ್ಲ . ಅಸಾಮರ್ಥ್ಯದಿಂದಾಗಿ ಯೋಜನೆಗಳು ನಿಧಾನ ಗತಿಯಲ್ಲಿ ಸಾಗುತ್ತಿವೆ. ಆದರೆ ಅವಸರದ ದೇಶದಲ್ಲಿ ನಾವು ಬದುಕುತ್ತಿದ್ದೇವೆ. ರಾಜ್ಯಗಳ ಆಡಳಿತ ಚುಕ್ಕಾಣಿ ಹಿಡಿದವರು ಕೈಲಾದಷ್ಟು ಪ್ರಯತ್ನ ಮಾಡುತ್ತಲೇ ಇದ್ದಾರೆ ಎಂದರು.

ಚಂದ್ರಬಾಬು ನಾಯ್ಡು ಅವರ ಪ್ರಕಾರ- ಟೆಲಿಕಾಂ ಕ್ಷೇತ್ರದ ನಿಬಂಧನೆಗಳ ಮಿತಿಗಳನ್ನು ವಿಸ್ತರಿಸುವುದು ಅನಿವಾರ್ಯ ಮತ್ತು ರಾಷ್ಟ್ರದ ಹಿತಾಸಕ್ತಿಯ ಪ್ರಶ್ನೆಯೂ ಹೌದು. ಎನ್‌ಡಿಎ ಒಕ್ಕೂಟದಲ್ಲಿ ನಾಯ್ಡು ಪಕ್ಷ ಮುಖ್ಯ ಸ್ಥಾನ ಪಡೆದಿದ್ದು ಯಾವುದೇ ಬದಲಾವಣೆಗೆ ನಿಮ್ಮ ಪಕ್ಷ ಸರಕಾರದ ಮೇಲೆ ಒತ್ತಡ ತರಬಹುದಲ್ಲವೇ ಎಂಬ ಪ್ರಶ್ನೆಗೆ ಗುಣಾತ್ಮಕ ರಾಜಕೀಯಕ್ಕೇ ನಮ್ಮ ಪಕ್ಷದ ಬೆಂಬಲ ಎಂದು ನಾಯ್ಡು ಉತ್ತರಿಸಿದರು.

ಏಷ್ಯನ್‌ ಡೆವಲಪ್‌ಮೆಂಟ್‌ ಬ್ಯಾಂಕ್‌, ಕೇಂದ್ರ ಐಟಿ ಸಚಿವಾಲಯ ಮತ್ತು ರಾಜ್ಯ ಐಟಿ ವಿಭಾಗ ಈ ಸಭೆಯನ್ನು ನಗರದಲ್ಲಿ ಆಯೋಜಿಸಿತ್ತು.

(ಪಿಟಿಐ)