ತಮಿಳುನಾಡಿನ ಭಕ್ತನಿಂದ ಕೊಲ್ಲೂರು ದೇವಿಗೆ ಸ್ವರ್ಣ ಸಿಂಹವಾಹನ

ಕುಂದಾಪುರ : ಕೊಲ್ಲೂರು ಮೂಕಾಂಬಿಕಾ ದೇವಿಯ ವಾಹನವಾದ ಸಿಂಹದ ಮೂರ್ತಿಗೆ ತಮಿಳುನಾಡಿನ ಭಕ್ತನೋರ್ವ ಸುಮಾರು 9 ಲಕ್ಷ ರೂಪಾಯಿ ವೆಚ್ಚದ ಚಿನ್ನದ ಮುಖವಾಡವನ್ನು ಆಗಸ್ಟ್‌ 31ರ ಶುಕ್ರವಾರ ಸಮರ್ಪಿಸಲಿದ್ದಾರೆ.

1 ಕೆ.ಜಿ. 800 ಗ್ರಾಂ ತೂಕದ ಸ್ವರ್ಣಮಯ ಸಿಂಹದ ಮುಖವಾಡವನ್ನು ಕೊಲ್ಲೂರು ದೇವಿಗೆ ಸಮರ್ಪಿಸಲಿರುವ ಭಕ್ತ ತಮ್ಮ ಹೆಸರನ್ನು ಬಹಿರಂಗಪಡಿಸಬಾರದೆಂದು ಕೇಳಿಕೊಂಡಿರುವುದಾಗಿ ದೇವಳದ ಧರ್ಮದರ್ಶಿ ಬಿ.ಎಂ. ಸುಕುಮಾರ ಶೆಟ್ಟಿ ಹೇಳಿದ್ದಾರೆ. ಇಷ್ಟು ವರುಷಗಳಲ್ಲಿ ಅಲಂಕಾರ ಪೂಜೆಗೆ ದೇವಿಯ ವಾಹನವಾಗಿ ಬೆಳ್ಳಿಯ ಸಿಂಹವನ್ನು ಬಳಸಲಾಗುತಿತ್ತು. ಇದೀಗ ಸ್ವರ್ಣ ಸಿಂಹ ಶುಕ್ರವಾರ ದಂದು ಮೂಕಾಂಬಿಕಾ ದೇವಿಗೆ ಅಲಂಕಾರವಾಗಲಿದೆ.

ತಮ್ಮ ಬಹುವರ್ಷದ ಹಂಬಲ ಇದಾಗಿದ್ದು ಈವರ್ಷ ಚಿನ್ನದ ಸಿಂಹ ಮುಖವಾಡವನ್ನು ದೇವಿಗರ್ಪಿಸಲು ಸಾಧ್ಯವಾಗಿದೆ ಎಂದು ಆ ಭಕ್ತರು ಹೇಳಿಕೊಂಡಿದ್ದಾರೆ. ಶುಕ್ರವಾರ ನಡೆಯಲಿರುವ ಸ್ವರ್ಣ ಸಿಂಹ ವಾಹಿನಿ ದೇವಿಯ ಅಲಂಕಾರ ವಿಶೇಷ ಪೂಜೆಗೆ ಕೊಲ್ಲೂರಿನಲ್ಲಿ ಸಿದ್ಧತೆಗಳನ್ನು ನಡೆಸಲಾಗುತ್ತಿದೆ ಎಂದು ಸುಕುಮಾರ ಶೆಟ್ಟಿ ತಿಳಿಸಿದ್ದಾರೆ.

(ಇನ್ಫೋ ವಾರ್ತೆ)