ಅಂತರರಾಷ್ಟ್ರೀಯ ಚಿತ್ರೋತ್ಸವದಲ್ಲಿ ಪೆಪ್ಸಿಕೋಲಾದ ಭರಾಟೆಯಿರದು

ಬೆಂಗಳೂರು : ಅಕ್ಟೋಬರ್‌ ತಿಂಗಳಿನಲ್ಲಿ ನಗರದಲ್ಲಿ ನಡೆಯಲಿರುವ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವ ವೇದಿಕೆಯಲ್ಲಿ ಪೆಪ್ಸಿ , ಕೋಕಾ ಕೋಲಾ, ಬಿಯರ್‌ಗಳ ಜಾಹೀರಾತು ಭರಾಟೆಯಿರುವುದಿಲ್ಲ.

ಮದ್ಯ, ತಂಬಾಕು, ಮತ್ತು ತಂಪು ಪಾನೀಯಗಳು ಚಲನ ಚಿತ್ರೋತ್ಸವದ ಪ್ರಾಯೋಜಕತ್ವ ವಹಿಸಲು ಪ್ರೋತ್ಸಾಹ ನೀಡದಿರುವಂತೆ ಕೇಂದ್ರ ಸರಕಾರವು ರಾಜ್ಯ ಸರಕಾರಕ್ಕೆ ಆದೇಶ ನೀಡಿದೆ. ಆದ್ದರಿಂದ ಚಿತ್ರೋತ್ಸವ ವೇದಿಕೆಯಲ್ಲಿ ಪೆಪ್ಸಿ, ಕೋಕಾ ಕೋಲಾ, ಮದ್ಯ ಮತ್ತು ತಂಬಾಕು ಕಂಪೆನಿಗಳ ಜಾಹೀರಾತುಗಳನ್ನು ಪ್ರದರ್ಶಿಸಲಾಗುವುದಿಲ್ಲ.

ಈ ಜಾಹೀರಾತುದಾರರು ಪ್ರದರ್ಶನ ವಿಭಾಗದಲ್ಲಿ ಅಥವಾ ಇನ್ನಿತರ ಜಾಗಗಳಲ್ಲಿ ಜಾಹೀರಾತುದಾರರು ಫಲಕಗಳನ್ನು ಬೇಕಿದ್ದಲ್ಲಿ ಹಾಕಿಕೊಳ್ಳಬಹುದು ಎಂದು ರಾಜ್ಯ ವಾರ್ತಾ ಸಚಿವ ಬಿ.ಕೆ. ಚಂದ್ರಶೇಖರ್‌ ಸೋಮವಾರದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಚಿತ್ರೋತ್ಸವಕ್ಕೆ ಸಂಬಂಧಿಸಿದಂತೆ ಸರಕಾರವು ಸದ್ಯಕ್ಕೆ ಮಾಹಿತಿ ತಂತ್ರಜ್ಞಾನ ಕಂಪೆನಿಗಳ ಜಾಹೀರಾತನ್ನು ಅವಲಂಬಿಸಿದೆ. ಚಿತ್ರೋತ್ಸವದ ಖರ್ಚಿನಲ್ಲಿ ಸರಕಾರದ ಪಾಲು 2 ಕೋಟಿ ರೂಪಾಯಿ. ಈ ಮೊತ್ತವನ್ನು ಹೊಸದಾಗಿ ಆರಂಭವಾದ ಐಟಿ ಕಂಪೆನಿಗಳ ಜಾಹೀರಾತನ್ನು ಪ್ರೋತ್ಸಾಹಿಸುವ ಮೂಲಕ ಸಂಗ್ರಹಿಸಲು ಯತ್ನಿಸಲಾಗುವುದು ಎಂದು ಬಿಕೆಸಿ ಹೇಳಿದರು.

(ಇನ್ಫೋ ವಾರ್ತೆ)