ಶಿವಮೊಗ್ಗ ಜಿಲ್ಲೆಯಲ್ಲಿ ಕಡಿಮೆ ಮೊತ್ತದ ಸ್ಟಾಂಪ್ಪೇಪರ್ಗೆ ಬರ
ಶಿವಮೊಗ್ಗ : ಶಿವಮೊಗ್ಗ ಜಿಲ್ಲೆ ಸ್ಟಾಂಪ್ ಪೇಪರ್ ಬರ ಎದುರಿಸುತ್ತಿದೆ. ಉಕ್ಕಿನ ನಗರಿ ಭದ್ರಾವತಿಯಲ್ಲಿರುವ ಸ್ಟಾಂಪ್ ವೆಂಡರ್ಗಳು ಸಲ್ಲಿಸಿದ ಮನವಿ ಪತ್ರದ ಮೇರೆಗೆ ಶಿವಮೊಗ್ಗ ಜಿಲ್ಲೆಯಲ್ಲಿ ಕಳೆದೆರಡು ತಿಂಗಳುಗಳಿಂದ 1 ರಿಂದ 5 ಮತ್ತು 10, 20 ರುಪಾಯಿಗಳ ಸ್ಟಾಂಪ್ಪೇಪರ್ ಮತ್ತು ಕೋರ್ಟ್ ಫೀ ಸ್ಟಾಂಪ್ ದೊರಕದ ಸ್ಥಿತಿ ನಿರ್ಮಾಣವಾಗಿದೆ.
ಸಣ್ಣ ಪುಟ್ಟ ವ್ಯವಹಾರ - ಒಪ್ಪಂದಗಳಿಗೆ ಅಲ್ಪ ಮೊತ್ತದ ಸ್ಟಾಂಪ್ ಪೇಪರ್ಗಳು ದೊರಕದೆ ನಾಗರಿಕರು, ಕನಿಷ್ಠ 50 ಇಲ್ಲವೇ 100 ರುಪಾಯಿಗಳ ಸ್ಟಾಂಪ್ ಪೇಪರ್ ಖರೀದಿಸುವ ಪರಿಸ್ಥಿತಿ ಇದೆ. ಈ ವಿಷಯವನ್ನು ವಿಧಾನ ಪರಿಷತ್ ಸದಸ್ಯ ಡಿ.ಎಚ್. ಶಂಕರಮೂರ್ತಿ ಅವರು ಕಂದಾಯ ಸಚಿವ ಎಚ್.ಸಿ. ಶ್ರೀಕಂಠಯ್ಯ ಅವರಿಗೆ ಬರೆದಿರುವ ಪತ್ರದಲ್ಲಿ ತಿಳಿಸಿದ್ದಾರೆ.
ಮನೆ ಬಾಡಿಗೆ ಕರಾರು ಇತ್ಯಾದಿ ವ್ಯವಹಾರಗಳಿಗೆ 10, 20 ರುಪಾಯಿ ಸ್ಟಾಂಪ್ ಪೇಪರ್ ಸಿಗದಿರುವ ಕಾರಣ, ಶಿವಮೊಗ್ಗ ಜಿಲ್ಲೆಯ ನಾಗರಿಕರು ಹೆಚ್ಚಿನ ವೆಚ್ಚ ಭರಿಸಬೇಕಾದ ಸ್ಥಿತಿ ನಿರ್ಮಾಣ ಆಗಿದೆ. ಇದರಿಂದಾಗಿ ನಾಕರಿಕರು ಮತ್ತು ಸ್ಟಾಂಪ್ ಪೇಪರ್ ಮಾರಾಟಗಾರರ ನಡುವೆ ನಿತ್ಯ ಘರ್ಷಣೆ ನಡೆಯುತ್ತಿದೆ ಎಂದೂ ಅವರು ತಿಳಿಸಿದ್ದಾರೆ.
ಸ್ಟಾಂಪ್ ಪೇಪರ್ಗಳ ಕೊರತೆಯಿಂದ ನಕಲಿ ಸ್ಟಾಂಪ್ಪೇಪರ್ಗಳ ಹಾವಳಿ ಸೃಷ್ಟಿಯಾಗುವ ಸಂಭವವೂ ಇದೆ. ಈ ಹಿನ್ನೆಲೆಯಲ್ಲಿ ಕೂಡಲೇ ಕ್ರಮ ಕೈಗೊಂಡು, ಕಡಿಮೆ ಮೊತ್ತದ ಕೋರ್ಟ್ ಫೀ ಸ್ಟಾಂಪ್ ಹಾಗೂ ಸ್ಟಾಂಪ್ ಪೇಪರ್ಗಳು ದೊರೆಯುವಂತೆ ಮಾಡಬೇಕೆಂದು ಅವರು ಸಚಿವರನ್ನು ಕೋರಿದ್ದಾರೆ.