ಪಾಕ್‌ವಿರುದ್ಧ ಆಡದಿರಲು ಸೋಲುವ ಭಯ ಕಾರಣ-ವಾಸಿಂ ಅಕ್ರಂ

ಬೆಂಗಳೂರು : ಏಷ್ಯನ್‌ ಕ್ರಿಕೆಟ್‌ ಟೆಸ್ಟ್‌ ಚಾಂಪಿಯನ್‌ಷಿಪ್‌ನಲ್ಲಿ ಭಾಗವಹಿಸಲು ನಿರಾಕರಿರುವ ಭಾರತದ ಕ್ರಮದ ಹಿನ್ನೆಲೆಯಲ್ಲಿ ರಾಜಕೀಯ ಭಿನ್ನಾಭಿಪ್ರಾಯಗಳಿಗಿಂತ ಪಾಕಿಸ್ತಾನ ವಿರುದ್ಧ ಸೋಲುವ ಭಯವೇ ಪ್ರಮುಖ ಕಾರಣವಾಗಿದೆ ಎಂದು ಪಾಕಿಸ್ತಾನ ಕ್ರಿಕೆಟ್‌ ತಂಡದ ಮಾಜಿ ನಾಯಕ ವಾಸಿಂ ಅಕ್ರಂ ಗುರುವಾರ ಅಭಿಪ್ರಾಯಪಟ್ಟಿದ್ದಾರೆ.

ಪಾಕಿಸ್ತಾನದಲ್ಲಿ ಆಡಲು ನಿರಾಕರಿಸಿರುವ ಭಾರತದ ನಿರ್ಧಾರದಿಂದಾಗಿ ತಾವು ಹತಾಶರಾಗಿರುವುದಾಗಿ ತಿಳಿಸಿರುವ ಅಕ್ರಂ, ನಮ್ಮ ವಿರುದ್ಧ ಭಾರತಕ್ಕೆ ಸೋಲುವ ಭೀತಿಯೇ ಈ ನಿರ್ಧಾರಕ್ಕೆ ಕಾರಣ ಎಂದರು. ಭಾರತದ ಈ ನಿರ್ಧಾರ ಕೋಟ್ಯಂತರ ಕ್ರಿಕೆಟ್‌ ಅಭಿಮಾನಿಗಳಿಗೆ ಬೇಸರ ತಂದಿದೆ ಎಂದು ಅಕ್ರಂ ಹೇಳಿರುವುದಾಗಿ ಸಿಫಿ.ಕಾಂ ವರದಿ ಮಾಡಿದೆ.

1999 ರಲ್ಲಿ ಭಾರತ ಪ್ರವಾಸ ಕೈಗೊಂಡಾಗ ಪಾಕಿಸ್ತಾನದ ಆಟಗಾರರು ಹಲವಾರು ಬೆದರಿಕೆಗಳನ್ನು ಎದುರಿಸಬೇಕಾಯಿತು. ಆದರೆ, ನಾವು ಯಾವಾಗಲೂ ಧನಾತ್ಮಕ ಆಟಕ್ಕೆ ಒತ್ತು ನೀಡುತ್ತೇವೆ ಎಂದು ಅವರು ಹೇಳಿದರು. ನಮ್ಮ ವಿರುದ್ಧ ಆಡಲು ಭಾರತ ಏಕೆ ಮುಜುಗರ ಪಡುತ್ತದೆಂದು ತಮಗೆ ತಿಳಿಯದು ಎಂದು ಪ್ರಶ್ನೆಯಾಂದಕ್ಕೆ ಅವರು ಉತ್ತರಿಸಿದರು.

ಪಾಕಿಸ್ತಾನದೊಂದಿಗೆ ಆಡದಿದ್ದರೆ ಕಾಶ್ಮೀರ ಸಮಸ್ಯೆಯನ್ನು ಪರಿಹರಿಸಿಕೊಳ್ಳಬಹುದೆಂದು ಭಾರತ ಭಾವಿಸಿದೆಯೇ ಎಂದು ಸುದ್ದಿಗೋಷ್ಠಿಯಲ್ಲಿ ಹಾಜರಿದ್ದ ಪಾಕ್‌ನ ಮಾಜಿ ಟೆಸ್ಟ್‌ ಆಟಗಾರ ಹಸೀಬ್‌ ಇಹ್ಸಾನ್‌ ಗೇಲಿ ಮಾಡಿದರು. ಮತ್ತೊಬ್ಬ ಮಾಜಿ ಆಟಗಾರ ಇಂತಿಕಾಬ್‌ ಅಲಂ ಅವರು- ಇತರ ಎಲ್ಲ ಆಟಗಳಲ್ಲಿ ಪಾಕಿಸ್ತಾನದೊಂದಿಗೆ ಆಡುವ ಬಗ್ಗೆ ಭಿನ್ನಾಭಿಪ್ರಾಯ ಇಲ್ಲದಿರುವಾಗ, ಈ ತಾರತಮ್ಯ ಕ್ರಿಕೆಟ್‌ಗೆ ಮಾತ್ರ ಏಕೆ ಸೀಮಿತ ಎಂದು ಪ್ರಶ್ನಿಸಿದರು.

(ಇನ್ಫೋ ವಾರ್ತೆ)