ವೇಶ್ಯೆಯರ ಆಮಿಷ : ಸೇನೆಯಿಂದ ತೆಹಲ್ಕಾಹಗರಣದ ಮರು ವಿಚಾರಣೆ?

ನವದೆಹಲಿ : ಲಂಚ ಹಗರಣ ಬಯಲು ಮಾಡುವ ನಿಟ್ಟಿನಲ್ಲಿ ಸೇನಾಧಿಕಾರಿಗಳಿಗೆ ವೇಶ್ಯೆಯರ ಆಮಿಷ ಒಡ್ಡಲಾಗಿದೆ ಎಂಬ ಹೊಸ ವಿಷಯ ಬಹಿರಂಗಗೊಂಡಿರುವ ಹಿನ್ನೆಲೆಯಲ್ಲಿ ಇಡೀ ತೆಹಲ್ಕಾ ಹಗರಣದ ಬಗ್ಗೆ ಸೇನೆಯೂ ಮರು ವಿಚಾರಣೆ ನಡೆಸುವ ಸಾಧ್ಯತೆ ಇದೆ ಎಂದು ಸೇನಾ ಮೂಲಗಳಿಂದ ತಿಳಿದುಬಂದಿದೆ.

ಈಗಾಗಲೇ ತೆಹಲ್ಕಾ ಹಗರಣದ ಬಗ್ಗೆ ವಿಚಾರಣೆ ನಡೆಸುತ್ತಿರುವ ನ್ಯಾಯಮೂರ್ತಿ ವೆಂಕಟಸ್ವಾಮಿ ಆಯೋಗ ಕೂಡ ಪತ್ರಿಕೆಗಳಲ್ಲಿ ವರದಿಯಾಗಿರುವ ಈ ಹೊಸ ವಿಷಯದ ಬಗ್ಗೆ ಗುರುವಾರ ವಿಚಾರಣೆ ನಡೆಸಲಿದೆ ಎಂದು ಆಯೋಗದ ವಕ್ತಾರರ ಆನಂದ್‌ ಸುದ್ದಿ ಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಸಭೆ : ತೆಹಲ್ಕಾ ಭ್ರಷ್ಟಾಚಾರ ಬಯಲಿಗೆಳೆಯುವ ಹೆಸರಿನಲ್ಲಿ ಸೇನಾಧಿಕಾರಿಗಳಿಗೆ ವೇಶ್ಯೆಯರ ಆಮಿಷ ಒಡ್ಡುವ ಮೂಲಕ ದೇಶದ್ರೋಹವೆಸಗಿದೆ ಎಂದು ಆರೋಪಿಸಿ, ಬುಧವಾರ ಸುಗಮ ಕಲಾಪಕ್ಕೆ ಆಡಳಿತ ಪಕ್ಷದ ಸದಸ್ಯರು ಅಡ್ಡಿ ಪಡಿಸಿದ ಹಿನ್ನೆಲೆಯಲ್ಲಿ ಸುಗಮವಾಗಿ ಸಂಸತ್‌ ಕಲಾಪ ನಡೆಸುವ ಉದ್ದೇಶದಿಂದ ಲೋಕಸಭಾಧ್ಯಕ್ಷ ಜಿ.ಎಂ.ಸಿ. ಬಾಲಯೋಗಿ ಅವರು ಸರ್ವಪಕ್ಷ ನಾಯಕರ ಸಭೆಯನ್ನು ಗುರುವಾರ ಕರೆದಿದ್ದಾರೆ. ಕಲಾಪಕ್ಕೆ ಅಡ್ಡಿಪಡಿಸುವ ಸದಸ್ಯರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವ ಬಗ್ಗೆಯೂ ಸಭೆಯಲ್ಲಿ ಪ್ರಸ್ತಾಪವಾಗುವ ಸಾಧ್ಯತೆ ಇದೆ.

ವಾರ್ತಾಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...