ಉಡುಪಿಯಲ್ಲಿ ಶಾಸ್ತ್ರೀಯ ನೃತ್ಯ ಕಲಾವಿದರ ರಾಜ್ಯ ಸಮಾವೇಶ

ಉಡುಪಿ : ಸೆಪ್ಟೆಂಬರ್‌ 8 ಮತ್ತು 9ರಂದು ಅಖಿಲ ಭಾರತೀಯ ಸಂಘಟನೆಯಾದ ಸಂಸ್ಕಾರ ಭಾರತಿ ರಾಜ್ಯ ಮಟ್ಟದ ಶಾಸ್ತ್ರೀಯ ನೃತ್ಯ ಕಲಾವಿದರ ರಾಜ್ಯ ಮಟ್ಟದ ಸಮಾವೇಶವನ್ನು ಏರ್ಪಡಿಸಿದೆ.

ಸಮಾವೇಶವು ಪ್ರರ್ಯಾಯ ಪೀಠದ ವಿಶ್ವೇಶ ತೀರ್ಥ ಸ್ವಾಮೀಜಿಯವರ ಮಾರ್ಗದರ್ಶನದಲ್ಲಿ ನಡೆಯಲಿದೆ. ಪ್ರಸಕ್ತ ಸಾಮಾಜಿಕ ಸನ್ನಿವೇಶದಲ್ಲಿ ಭಾರತೀಯ ನೃತ್ಯ ಕಲೆಯ ಸಾಧನೆ, ಬೆಳವಣಿಗೆ ಮತ್ತು ಕಲಾವಿದರು ಎದುರಿಸುತ್ತಿರುವ ಸಮಸ್ಯೆಗಳ ಕುರಿತು ಸಮಾವೇಶದಲ್ಲಿ ಚರ್ಚಿಸಲಾಗುವುದು.

ಸಮಾವೇಶವನ್ನು ಅಂತರರಾಷ್ಟ್ರೀಯ ಮಟ್ಟದ ನೃತ್ಯ ಕಲಾವಿದೆ ಚಿತ್ರಾ ವಿಶ್ವೇಶ್ವರನ್‌ ಉದ್ಘಾಟಿಸುತ್ತಾರೆ. ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವೆ ರಾಣಿ ಸತೀಶ್‌ ಉದ್ಘಾಟನಾ ಸಮಾರಂಭದ ಅಧ್ಯಕ್ಷತೆ ವಹಿಸುವರು. ಮೊದಲ ಗೋಷ್ಠಿಯಲ್ಲಿ ನಮ್ಮ ಸರಕಾರದ ಸಾಂಸ್ಕೃತಿಕ ನೀತಿ ಎಂಬ ವಿಷಯದ ಬಗ್ಗೆ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ನಿರ್ದೇಶಕ ಕೆ.ಸಿ. ರಾಮಮೂರ್ತಿ ನಡೆಸಿಕೊಡುತ್ತಾರೆ.

ನೃತ್ಯ ಕಲೆ, ಕಲಾವಿದ ಮತ್ತು ಸಮಾಜ, ನೃತ್ಯಕಲೆ, ಶಿಕ್ಷಣ ಮತ್ತು ಸಂವರ್ಧನೆ ಬಗ್ಗೆ ಗೋಷ್ಠಿಗಳು, ಬಹಿರಂಗ ಸಭೆ ಮತ್ತು ಚರ್ಚಾ ಗೋಷ್ಠಿಗಳನ್ನು ಸಮಾವೇಶದಲ್ಲಿ ಆಯೋಜಿಸಲಾಗಿದೆ.

(ಇನ್ಫೋ ವಾರ್ತೆ)