ಸೇಂಟ್‌ ಜೋಸೆಫ್‌ ಕಾಲೇಜಿನಲ್ಲಿ ಬಾಹ್ಯಾಕಾಶ ವಿಜ್ಞಾನ ಕೋರ್ಸು

ಬೆಂಗಳೂರು : ನಗರದ ಸೈಂಟ್‌ಜೋಸೆಫ್‌ ಕಾಲೇಜು, ಇಸ್ರೋದ ಸಹಯೋಗದೊಂದಿಗೆ ಬಾಹ್ಯಾಕಾಶ ವಿಜ್ಞಾನದಲ್ಲಿ ಡಿಪ್ಲೊಮಾ ಪದವಿ ತರಗತಿಗಳನ್ನು ಆರಂಭಿಸಿದೆ.

ಇಸ್ರೋ ಆಧ್ಯಕ್ಷ ಡಾ. ಕೆ. ಕಸ್ತೂರಿ ರಂಗನ್‌ ಶನಿವಾರ ಈ ಹೊಸ ಕೋರ್ಸನ್ನು ಉದ್ಘಾಟಿಸಿದರು. ಕಾಲೇಜಿನ ಭೌತ ಶಾಸ್ತ್ರ ವಿಭಾಗದ ಮುಖ್ಯಸ್ಥ ಪ್ರೊ. ಕೆ. ನಾಗರಾಜನ್‌, ಹೊಸ ಪದವಿ ತರಗತಿಗೆ ಈಗಾಗಲೇ 250 ಅರ್ಜಿಗಳು ಬಂದಿವೆ. ಅವುಗಳಲ್ಲಿ 44 ವಿದ್ಯಾರ್ಥಿಗಳನ್ನು ಪದವಿ ತರಗತಿಗೆ ತೆಗೆದುಕೊಂಡಿರುವುದಾಗಿ ಹೇಳಿದ್ದಾರೆ. ವಿದ್ಯಾರ್ಥಿಗಳಲ್ಲಿದ್ದ ಆಸಕ್ತಿಯನ್ನು ಗುರುತಿಸಿ, ಪಿಯುಸಿ ಮತ್ತು ಇಂಜಿನಿಯರಿಂಗ್‌ ಪದವೀಧರರನ್ನೂ ಕೋರ್ಸಿಗೆ ಆಯ್ಕೆ ಮಾಡಲಾಗಿದೆ.

ಫೆಬ್ರವರಿ ಕೊನೇ ವಾರದಲ್ಲಿ ಕೋರ್ಸು ಮುಕ್ತಾಯವಾಗಲಿದೆಯಾದ್ದರಿಂದ ವಿದ್ಯಾರ್ಥಿಗಳಿಗೆ ವಿಶ್ವವಿದ್ಯಾಲಯದ ಪರೀಕ್ಷೆ ಬರೆಯಲು ತೊಂದರೆಯಿರುವುದಿಲ್ಲ. ಬಾಹ್ಯಾಕಾಶ ವಿಜ್ಞಾನ ತರಗತಿ ಶನಿವಾರ ಮತ್ತು ಭಾನುವಾರ ನಡೆಯುತ್ತದೆ. ತರಗತಿಯ ಹೊರತಾಗಿ ವಿದ್ಯಾರ್ಥಿಗಳು ಕೋರ್ಸ್‌ ಅವಧಿಯಲ್ಲಿ ಪ್ರೊಜೆಕ್ಟ್‌ ಒಂದನ್ನು ಮಾಡಬೇಕಾಗುತ್ತದೆ.

ರಾಮನ್‌ ರಿಸರ್ಚ್‌ ಸಂಸ್ಥೆಯ ಡಾ. ಜಿ. ಶ್ರೀನಿವಾಸನ್‌ ಅವರ ಕೋರ್ಸನ್ನು ನಿರ್ವಹಿಸಲಿದ್ದಾರೆ. ಇಸ್ರೋ ಹಾಗೂ ರಾಮನ್‌ ರಿಸರ್ಚ್‌ ಸಂಸ್ಥೆಗಳ ವಿಜ್ಞಾನಿಗಳು ಮತ್ತು ಇಂಜಿನಿಯರ್‌ಗಳು ತರಗತಿಗಳನ್ನು ತೆಗೆದುಕೊಳ್ಳುತ್ತಾರೆ. ಕೋರ್ಸ್‌ನ ಶುಲ್ಕ 1,000 ರೂಪಾಯಿ. ಈ ಕೋರ್ಸಿಗೆ ವಿಶ್ವವಿದ್ಯಾಲಯದ ಮಾನ್ಯತೆ ಇರುವುದಿಲ್ಲ. ಆದರೆ ಇಸ್ರೋ ಮತ್ತು ಕಾಲೇಜು ಸಂಯುಕ್ತವಾಗಿ ಡಿಪ್ಲೊಮಾ ಸರ್ಟಿಫಿಕೇಟ್‌ ನೀಡಲಿದೆ.

(ಇನ್ಫೋ ವಾರ್ತೆ)