ಯು.ಆರ್‌. ರಾವ್‌ಗೆ ನ್ಯಾಷನಲ್‌ ಇಂಜಿನಿಯರಿಂಗ್‌ ಅಕಾಡೆಮಿ ಪ್ರಶಸ್ತಿ

ಬೆಂಗಳೂರು : ಬಾಹ್ಯಾಕಾಶ ಆಯೋಗದ ಮಾಜಿ ಅಧ್ಯಕ್ಷ ಪ್ರೊ. ಯು. ಆರ್‌. ರಾವ್‌ ಅವರು ಇಂಜಿನಿಯರಿಂಗ್‌ ಕ್ಷೇತ್ರಕ್ಕೆ ತಮ್ಮ ಜೀವನಾದ್ಯಂತ ಸಲ್ಲಿಸಿದ ಕೊಡುಗೆಯನ್ನು ಮನ್ನಿಸಿ ‘ಇಂಡಿಯನ್‌ ನ್ಯಾಷನಲ್‌ ಅಕಾಡೆಮಿ ಆಫ್‌ ಇಂಜಿನಿಯರಿಂಗ್‌’ ಅವರನ್ನು ಪುರಸ್ಕರಿಸಲಿದೆ.

ಇಂಜಿನಿಯರಿಂಗ್‌ ಅಧ್ಯಯನ, ಇಂಜಿನಿಯರಿಂಗ್‌ ಶಿಕ್ಷಣ ಅಥವಾ ಇಂಜಿನಿಯರಿಂಗ್‌ ಕ್ಷೇತ್ರದ ತಾಂತ್ರಿಕ ನಿರ್ವಹಣೆಯಲ್ಲಿನ ಸಾಧನೆಗಾಗಿ ಈ ಪ್ರಶಸ್ತಿಯನ್ನು ನ್ಯಾಷನಲ್‌ಅಕಾಡೆಮಿಯು ನೀಡುತ್ತಾ ಬಂದಿದೆ. ಪ್ರಸ್ತುತ ಬಾಹ್ಯಾಕಾಶ ತಂತ್ರಜ್ಞಾನ ಅಭಿವೃದ್ಧಿಗೆ ಶ್ರಮಿಸಿದ ಯು. ಆರ್‌ ರಾವ್‌ ಅವರ ಸಾಧನೆಯನ್ನು ಗುರುತಿಸಿ ಈ ಮನ್ನಣೆ ನೀಡಲಾಗುತ್ತಿದೆ. ಶುಕ್ರವಾರದ ಇಸ್ರೋ ಪ್ರಕಟಣೆ ಈ ವಿಷಯವನ್ನು ತಿಳಿಸಿದ್ದು ಈ ಪುರಸ್ಕಾರಕ್ಕೆ ಪಾತ್ರರಾಗಿರುವ 9ನೇ ವ್ಯಕ್ತಿ ಯು.ಆರ್‌. ರಾವ್‌ ಎಂದು ಹೇಳಿದೆ.

ಪ್ರಶಸ್ತಿಯನ್ನು ಡಿಸೆಂಬರ್‌ 28ರಂದು ನಡೆವ ನ್ಯಾಷನಲ್‌ ಅಕಾಡೆಮಿಯ ವಾರ್ಷಿಕ ಉತ್ಸವದಲ್ಲಿ ಪ್ರದಾನ ಮಾಡಲಾಗುವುದು.

ಈ ಹಿಂದೆ ಡಾ. ಅಬುಲ್‌ ಕಲಮ್‌, ಸತೀಶ್‌ ಧವನ್‌, ಪ್ರೊ. ಜೈ ಕೃಷ್ಣ , ಡಾ. ಎ. ರಾಮಚಂದ್ರನ್‌ , ಡಾ. ಹೋಮಿ ಸೇತ್ನಾ ಈ ಪ್ರಶಸ್ತಿ ಪಾತ್ರರಾಗಿದ್ದಾರೆ.

(ಪಿಟಿಐ)