ಕುಲವನಹಳ್ಳಿಯಲ್ಲಿ ಲಾರಿ ಹರಿದು ಇಬ್ಬರು ಮಕ್ಕಳ ಸಾವು

ಕುಲವನಹಳ್ಳಿ : ಬೆಂಗಳೂರು- ತುಮಕೂರು ರಾಷ್ಟ್ರೀಯ ಹೆದ್ದಾರಿ 4ರ ಬಗಲಲ್ಲೇ ಇರುವ ಕುಲವನಹಳ್ಳಿಯ ಸರ್ಕಾರಿ ಶಾಲೆಯ ಇಬ್ಬರು ಮಕ್ಕಳ ಮೇಲೆ ಗುರುವಾರ ಲಾರಿ ಹರಿದು, ಇಬ್ಬರೂ ಸ್ಥಳದಲ್ಲೇ ಸತ್ತಿದ್ದಾರೆ.

ಎರಡನೇ ಇಯತ್ತೆಯ ರೂಪ (7) ಹಾಗೂ 1ನೇ ಇಯತ್ತೆಯ ವಿನೋದ್‌ (6) ಮೃತಪಟ್ಟ ನತದೃಷ್ಟರು. ಅಜ್ಜಿ ಮನೆಯಲ್ಲಿದ್ದುಕೊಂಡು ಓದುತ್ತಿದ್ದ ಈ ಮಕ್ಕಳ ಸಾವಿನಿಂದ ಕ್ರುದ್ಧರಾದ ಹಳ್ಳಿಯ ಜನ ರಸ್ತೆ ತಡೆ ನಡೆಸಿದರು. ಸುಮಾರು ಒಂದೂವರೆ ತಾಸು ಕಾಲ ರಸ್ತೆ ಸಂಚಾರ ಅಸ್ತವ್ಯಸ್ತವಾಗಿತ್ತು. ಜಿಲ್ಲಾಧಿಕಾರಿ, ಎಸ್ಪಿ ಹಾಗೂ ಶಾಸಕರುಗಳು ಬರಬೇಕೆಂದು ಗ್ರಾಮಸ್ಥರು ಪಟ್ಟು ಹಿಡಿದರು.

ಮೃತ ಮಕ್ಕಳ ತಂದೆ ರಾಮಯ್ಯ ಅವರ ರೋಧನ ಹೃದಯ ವಿದ್ರಾವಕವಾಗಿತ್ತು. ತಾಯಿ ಶಾಂತಮ್ಮ ಮಕ್ಕಳ ಕಳೇಬರ ನೋಡಿ ಮೂರ್ಛೆ ಹೋದರು. ಸ್ಥಳಕ್ಕೆ ಧಾವಿಸಿದ ಬೆಂಗಳೂರು ಗ್ರಾಮಾಂತರ ಜಿಲ್ಲಾಧಿಕಾರಿ ನಾರಾಯಣ ಸ್ವಾಮಿ ಮೃತ ಮಕ್ಕಳ ಕುಟುಂಬಕ್ಕೆ ಮಕ್ಕಳ ಕಲ್ಯಾಣ ನಿಧಿಯಿಂದ ತಲಾ 25 ಸಾವಿರ ರುಪಾಯಿ ನೀಡುವುದಾಗಿ ಭರವಸೆ ಕೊಟ್ಟರು. ಕೊರಟಗೆರೆ ಶಾಸಕ ಚೆನ್ನಿಗಪ್ಪ ಮೃತರ ಕುಟುಂಬಕ್ಕೆ 10 ಸಾವಿರ ರುಪಾಯಿ ಸಹಾಯ ಧನ ನೀಡಿದರು.

ಬೆಂಗಳೂರು ಗ್ರಾಮಾಂತರ ಜಿಲ್ಲಾ ಪಂಚಾಯ್ತಿ ಅಧ್ಯಕ್ಷ ಜೆ.ನರಸಿಂಹ ಸ್ವಾಮಿ ರಸ್ತೆ ಬಗಲಲ್ಲೇ ಇರುವ ಶಾಲೆಯನ್ನು ಸೂಕ್ತ ಹಾಗೂ ಸ್ಥಳಕ್ಕೆ ವರ್ಗಾವಣೆ ಮಾಡುವುದಾಗಿ ಭರವಸೆ ಕೊಟ್ಟರು. ಲಾರಿ ಚಾಲಕ ರೇವಣ ಸಿದ್ದೇಶ್ವರ ಈಗ ಪೊಲೀಸರ ವಶದಲ್ಲಿದ್ದಾರೆ.

(ಇನ್ಫೋ ವಾರ್ತೆ)