‘ಧೂಮಪಾನ ನಿಷೇಧ ಮಸೂದೆ ಹಿಂತೆಗೆದುಕೊಳ್ಳಲಾಗುವುದು’

ಮಂಗಳೂರು : ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ನಿಷೇಧಿಸುವ ನಿರ್ಧಾರವನ್ನು ಕೈ ಬಿಡುವುದಾಗಿ ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ತಮಗೆ ಭರವಸೆ ನೀಡಿದ್ದಾರೆ ಎಂದು ಕೇಂದ್ರ ಮಾಜಿ ಸಚಿವ ಬಿ. ಜನಾರ್ಧನ ಪೂಜಾರಿ ಹೇಳಿದ್ದಾರೆ.

ದೆಹಲಿಯಿಂದ ವಾಪಾಸಾದ ಪೂಜಾರಿ ಅವರ ಬಳಿ ಬೀಡಿ ಕಾರ್ಮಿಕರು ಸಾರ್ವಜನಿಕ ಸ್ಥಳದಲ್ಲಿ ಧೂಮಪಾನ ನಿಷೇಧವನ್ನು ವಿರೋಧಿಸಿ ಮನವಿ ಸಲ್ಲಿಸಿದ್ದರು. ಈ ಕುರಿತು ದೂರವಾಣಿ ಮೂಲಕ ಮುಖ್ಯಮಂತ್ರಿಗಳ ಬಳಿ ಪೂಜಾರಿ ಅವರು ಮಾತನಾಡಿದ್ದು, ಧೂಮಪಾನ ನಿಷೇಧದ ನಿರ್ಧಾರವನ್ನು ಕೈ ಬಿಡಲಾಗುವುದು ಎಂದು ಕೃಷ್ಣ ತಮಗೆ ಭರವಸೆ ನೀಡಿರುವುದಾಗಿ ಪೂಜಾರಿ ಹೇಳಿದರು.

ಸೋಮವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಪೂಜಾರಿ, ಧೂಮಪಾನ ನಿಷೇಧ ಮಸೂದೆಯನ್ನು ಜಾರಿಗೆ ತರುವುದಿಲ್ಲ , ಅಲ್ಲದೆ ಯಾವ ಬೆಲೆಯನ್ನಾದರೂ ತೆತ್ತು ಬೀಡಿ ಕಾರ್ಮಿಕರ ಹಿತಾಸಕ್ತಿಯನ್ನು ಕಾಪಾಡುವುದಾಗಿ ಮುಖ್ಯಮಂತ್ರಿಗಳು ತಮಗೆ ಮಾತುಕೊಟ್ಟಿದ್ದಾರೆ ಎಂದರು.

ಧೂಮಪಾನ ನಿಷೇಧ ಮಸೂದೆಯ ಬಗ್ಗೆ ಬೀಡಿ ಕಾರ್ಮಿಕರ ವಿರೋಧ ಅರ್ಥವಾಗುತ್ತದೆ. ಆದರೆ, ಹಲವು ದಶಕಗಳ ಹಿಂದೆಯೇ ಸಿನೆಮಾ ಥಿಯೇಟರ್‌ ಮತ್ತು ಸರಕಾರೀ ಕಚೇರಿಗಳಲ್ಲಿ ಧೂಮಪಾನವನ್ನು ನಿಷೇಧಿಸಲಾಗಿದೆ. ಪ್ರಸ್ತುತ ಮಸೂದೆಯ ಬಗ್ಗೆ ಬೀಡಿ ಕಾರ್ಮಿಕರು ಧೃತಿಗೆಡುವ ಅಗತ್ಯವಿಲ್ಲ ಎಂದು ಪೂಜಾರಿ ಬೀಡಿ ಕಾರ್ಮಿಕರಿಗೆ ಸಮಾಧಾನ ಹೇಳಿದರು.

(ಇನ್ಫೋ ವಾರ್ತೆ)