ಇಸ್ರೋದ ‘ಚಂದ್ರನತ್ತ ನಾವು’ ಯೋಜನೆಗೆ ಕೇಂದ್ರದ ಸಮ್ಮತಿ

ಮಧುರೈ : ಚಂದ್ರನಲ್ಲಿಗೆ ‘ಪೇ- ಲೋಡ್‌’ ರವಾನಿಸುವ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಇಲಾಖೆ (ಇಸ್ರೋ)ಯ ಮಹತ್ತರ ಯೋಜನೆಗೆ ಕೇಂದ್ರ ಸರ್ಕಾರದ ಅನುಮತಿ ದೊರೆತಿದೆ ಎಂದು ಭಾರತ ಸರ್ಕಾರದ ಮುಖ್ಯ ವೈಜ್ಞಾನಿಕ ಸಲಹೆಗಾರ ಎ.ಪಿ.ಜೆ.ಅಬುಲ್‌ ಕಲಾಂ ತಿಳಿಸಿದ್ದಾರೆ.

ತ್ಯಾಗರಾಜ ಎಂಜಿನಿಯರಿಂಗ್‌ ಕಾಲೇಜಿನಲ್ಲಿ ಸೋಮವಾರ ತ್ಯಾಗರಾಜ ಅಭಿವೃದ್ಧಿ ಸಂಶೋಧನಾ ಕೇಂದ್ರಕ್ಕೆ ಕೆಸರುಗಲ್ಲು ಹಾಕಿ, ಅವರು ಮಾತಾಡುತ್ತಿದ್ದರು. ಚಂದ್ರನ ಮೇಲೆ ಇಂತಹ ಮಹತ್ತರ ಯೋಜನೆ ನಡೆಸಲು ಭಾರತ ಸರ್ವಶಕ್ತ. ತಂತ್ರಜ್ಞಾನ ಹಾಗೂ ಬುದ್ಧಿಮತ್ತೆ ನಮ್ಮಲ್ಲಿ ಸಾಕಷ್ಟು ಇದೆ ಎಂದು ಹೇಳಿದರು.

ದೂರಗಾಮಿ ಗುರಿಗಳನ್ನು ಗೊತ್ತುಡಿಸಿದ ವಿಕ್ರಂ ಸಾರಾಭಾಯಿ ತಮ್ಮ ಮಾದರಿ ವ್ಯಕ್ತಿ ಎಂದ ಕಲಾಂ, ವಿಜ್ಞಾನ ಹಾಗೂ ತಂತ್ರಜ್ಞಾನ, ರಾಜಕೀಯ, ಉದ್ದಿಮೆ ಮೊದಲಾದ ಕ್ಷೇತ್ರಗಳಲ್ಲಿ ದೇಶಕ್ಕೆ ದಕ್ಷ ನಾಯಕರ ಅಗತ್ಯವಿದೆ. ಯುವಕರ ತುಡಿತ ಹಾಗೂ ಕಷ್ಟ ಪಟ್ಟು ದುಡಿಯುವ ಮನೋಭಾವ- ಇವೆರಡರ ಸಮ್ಮಿಲನ ಭಾರತವನ್ನು ಅಭಿವೃದ್ಧಿ ಹೊಂದಿದ ದೇಶವನ್ನಾಗಿ ಪರಿವರ್ತಿಸುವಷ್ಟು ಶಕ್ತ ಎಂದರು.

ಶೋಧನಾ ಶಕ್ತಿಯುಳ್ಳ ನಾವು, ಭಾರತೀಯರು ಅಳುಕಿನಿಂದ ಹೊರಬರಬೇಕು ಎಂಬ ಸರ್‌ ಸಿ.ವಿ.ರಾಮನ್‌ ಅವರ ಮಾತನ್ನು ಕಲಾಂ ನೆನಪಿಸಿಕೊಂಡರು. ಚಿಂತನೆ- ಕನಸುಗಳನ್ನು ನೂತನ ಯೋಜನೆಗಳನ್ನಾಗಿಸುವ ಧೋರಣೆ ಬಲವಾಗಬೇಕು ಎಂದರು. ಮಾಹಿತಿ ತಂತ್ರಜ್ಞಾನಕ್ಕೆ ಸಂಬಂಧಿಸಿದ ಬಿ.ಟೆಕ್‌ ಎಂಬ ಕೋರ್ಸು ಹಾಗೂ ಸಂಶೋಧನಾ ಪ್ರಕಟಣೆಗಳನ್ನೂ ಡಾ.ಕಲಾಂ ಬಿಡುಗಡೆ ಮಾಡಿದರು.

(ಪಿಟಿಐ)