ಬಾಗಲಕೋಟೆ ಸೇತುವೆ ಬಳಿ ರೈಲಿಗೆ ಸಿಕ್ಕಿ 7 ಜನರ ಸಾವು

ಬಾಗಲಕೋಟೆ : ಬಾಗಲಕೋಟೆ ಬಳಿ ಮಲಪ್ರಭಾ ಸೇತುವೆಯ ಮೇಲೆ ನಡೆದುಕೊಂಡು ಹೋಗುತ್ತಿದ್ದ 7 ಮಂದಿ ಸೋಮವಾರ ಬೆಳಗ್ಗೆ ರೈಲಿಗೆ ಸಿಕ್ಕಿ ಸಾವನ್ನಪ್ಪಿದ್ದಾರೆ ಎಂದು ಬಾಗಲಕೋಟೆಯಿಂದ ಬಂದಿರುವ ಪ್ರಾಥಮಿಕ ವರದಿಗಳು ತಿಳಿಸಿವೆ.

ಬಿಜಾಪುರದಿಂದ ಗದಗ್‌ ಕಡೆಗೆ ಹೋಗುತ್ತಿದ್ದ ಪ್ಯಾಸೆಂಜರ್‌ ರೈಲು ಹಾಯ್ದ ಪರಿಣಾಮವಾಗಿ ಸೇತುವೆಯನ್ನು ದಾಟುತ್ತಿದ್ದ 7 ಜನರು ಸಾವಿಗೀಡಾಗಿದ್ದಾರೆ. ಮೃತಪಟ್ಟವರ ಪೈಕಿ 6 ಮಂದಿ ಮಹಿಳೆಯರು ಎಂದು ಬಾಗಲಕೋಟೆಯ ಪೊಲೀಸ್‌ ಸೂಪರಿಂಟೆಂಡೆಂಟ್‌ ತಿಳಿಸಿದ್ದಾರೆ.

ರೈಲು ಅಪಘಾತದಲ್ಲಿ ಮೂವರು ಸ್ಥಳದಲ್ಲೇ ಸಾವನ್ನಪ್ಪಿದರೆ, ಉಳಿದ ನಾಲ್ವರು ನದಿಗೆ ಬಿದ್ದು ಮೃತಪಟ್ಟಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಸತ್ತವರನ್ನು ಬಾಗಲಕೋಟೆ ಬಳಿಯ ಕೌಲಪೇಟ ನಿವಾಸಿಗಳಾದ ಸಿದ್ದಮ್ಮ ಸುಂಕದ (30), ಶ್ರೀಶೈಲ ಕವಳ್ಳಿ (70), ಲಕ್ಷ್ಮೀಬಾಯಿ ಹಿರೇಗೌಡರ (45), ಭಾರತಿಮಠ (35), ಸಾವಿತ್ರಿ ದಾವಣಗೆರೆ (18) ಮತ್ತು ಪಾರವ್ವ (30) ಎಂದು ಗುರುತಿಸಲಾಗಿದೆ. ಒಂದು ಮಗುವಿನ ಶವ ಪತ್ತೆಯಾಗಿಲ್ಲ.

(ಇನ್‌ಫೋ ವಾರ್ತೆ)