ಅಮೇರಿಕಾ ಆರ್ಥಿಕ ಹಿನ್ನಡೆಯಿಂದ ಏಷ್ಯಾದಲ್ಲಿನಿರುದ್ಯೋಗ- ಕೃಷ್ಣಕಾಂತ್‌

ಬೆಂಗಳೂರು : ಅಮೇರಿಕಾ ಆರ್ಥಿಕ ಹಿನ್ನಡೆಯಿಂದ ಪ್ರಸಕ್ತ ವರ್ಷ ಏಷ್ಯಾದಲ್ಲಿ 2 ಕೋಟಿ ಮಂದಿ ನಿರುದ್ಯೋಗಿಗಳಾಗಲಿದ್ದು , ಉದ್ಯೋಗ ಸೃಷ್ಟಿ ಬಗೆಗೆ ಗಮನ ಹರಿಸಬೇಕಾದುದು ಇಂದಿನ ತುರ್ತು ಅಗತ್ಯ ಎಂದು ಉಪ ರಾಷ್ಟ್ರಪತಿ ಕೃಷ್ಣಕಾಂತ್‌ ಅಭಿಪ್ರಾಯಪಟ್ಟಿದ್ದಾರೆ.

ಭಾನುವಾರ ನಗರದಲ್ಲಿ ಪ್ರಾರಂಭವಾದ ‘ಏಷ್ಯಾ ಫೆಸಿಫಿಕ್‌ ಉದ್ಯಮ ಶೃಂಗಸಭೆ-2001’ ಉದ್ಘಾಟಿಸಿ ಮಾತನಾಡುತ್ತಿದ್ದ ಅವರು, ಜಾಗತೀಕರಣ ಹೆಚ್ಚು ಉದ್ಯೋಗಾವಕಾಶ ಸೃಷ್ಟಿಸಿದ್ದರೂ- ಇನ್ನೊಂದೆಡೆ ಉದ್ಯೋಗ ನಷ್ಟವೂ ದೊಡ್ಡ ಪ್ರಮಾಣದಲ್ಲಿ ಕಾಣಿಸಿಕೊಂಡಿರುವ ವಿರೋಧಾಭಾಸ ಕಣ್ಣೆದುರಿಗಿದೆ. ಕಂಪನಿಗಳ ವಿಲೀನ, ಪುನಾರಚನೆ ಇತ್ಯಾದಿಗಳು ಉದ್ಯೋಗ ನಷ್ಟಕ್ಕೆ ಕಾರಣವಾಗಿರಬಹುದು ಎಂದು ಕೃಷ್ಣಕಾಂತ್‌ ಹೇಳಿದರು.

ಜಗತ್ತಿನ ವ್ಯಾಪಾರದ ಅರ್ಧದಷ್ಟು , ವ್ಯಾಪಾರ ಸಾಮರ್ಥ್ಯವನ್ನು ಏಷ್ಯಾ ಫೆಸಿಫಿಕ್‌ ವಾಣಿಜ್ಯ ವಲಯ ಹೊಂದಿದೆ. ಸಾಕಷ್ಟು ನೈಸರ್ಗಿಕ ಹಾಗೂ ಮಾನವ ಸಂಪನ್ಮೂಲಗಳನ್ನು ಹೊಂದಿರುವ ಈ ವಲಯದ ದೇಶಗಳು ಪರಸ್ಪರ ಸಹಕಾರಿ ಮಾರ್ಗಗಳನ್ನು ಹುಡುಕಿಕೊಳ್ಳಬೇಕಾಗಿದೆ, ಲಾಭದಾಯಕ ಉದ್ದಿಮೆಗಳನ್ನಾಗಿ ಪರಿವರ್ತಿಸಿಕೊಳ್ಳಬೇಕಾಗಿದೆ. ಜಾಗತೀಕರಣದ ಸಂದರ್ಭದಲ್ಲಿ ಪ್ರತಿಯಾಂದು ದೇಶವೂ ಎದುರಾದ ಅವಕಾಶಗಳನ್ನು ರಾಜಕೀಯ ಬದ್ಧತೆಯಾಂದಿಗೆ ಬಳಸಿಕೊಳ್ಳಬೇಕಾಗಿದೆ ಎಂದು ಅವರು ಕರೆ ನೀಡಿದರು.

ಬಡತನ ನಿರ್ಮೂಲನೆಗೆ ಐಟಿ ಬಳಕೆ
ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ರಾಜ್ಯಪಾಲರಾದ ವಿ.ಎಸ್‌.ರಮಾದೇವಿ, ಮಾಹಿತಿ ತಂತ್ರಜ್ಞಾನ ಮುಂತಾದ ಆಧುನಿಕ ತಂತ್ರಜ್ಞಾನಗಳನ್ನು ಬಡತನ ನಿರ್ಮೂಲನೆಗೆ ಬಳಸಿಕೊಳ್ಳಲು ಕರೆ ನೀಡಿದರು. ಅಭಿವೃದ್ಧಿ ಜೊತೆಗೇ ಪರಿಸರದ ಬಗ್ಗೆ ಯೋಚಿಸಲು ಅವರು ಕಿವಿ ಮಾತು ಹೇಳಿದರು.

ಪರಿಸರದ ಅಡೆತಡೆಗಳಿಂದಾಗಿ ಆರ್ಥಿಕ ಅಭಿವೃದ್ಧಿ ಕುಂಠಿತವಾಗಿದೆ. ಇದರಿಂದಾಗಿ ಬಡತನ ನಿರ್ಮೂಲನೆ ಕಾರ್ಯಕ್ಕೂ ಧಕ್ಕೆಯಾಗಿದೆ ಎಂದು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಹೇಳಿದರು. ಕೈಗಾರಿಕಾ ಸಚಿವ ಆರ್‌.ವಿ. ದೇಶಪಾಂಡೆ, ಎಫ್‌ಐಸಿಸಿಐ ಅಧ್ಯಕ್ಷ ಚಿರಾಯು ಅಮೀನ್‌, ಎಫ್‌ಕೆಸಿಸಿಐ ಅಧ್ಯಕ್ಷ, ಕೆ.ರಾಮಸ್ವಾಮಿ, ವಾಣಿಜ್ಯ ಮತ್ತು ಕೈಗಾರಿಕಾ ಇಲಾಖೆ ಪ್ರಧಾನ ಕಾರ್ಯದರ್ಶಿ ಬಿ.ಎಸ್‌.ಪಾಟೀಲ್‌ ಕಾರ್ಯಕ್ರಮದಲ್ಲಿ ಹಾಜರಿದ್ದರು.

(ಇನ್ಫೋ ವಾರ್ತೆ)