ರಾಜ್ಯ ತುಳು ಅಕಾಡೆಮಿ ಮುಚ್ಚುವುದಕ್ಕೆತುಳುಕೂಟದ ವಿರೋಧ

ಮಂಗಳೂರು : ತುಳು ಒಕ್ಕೂಟದ ಧುರೀಣರಾದ ದಾಮೋದರ್‌ ನಿಸರ್ಗ, ಚಂದ್ರಶೇಖರ್‌ ಶೆಟ್ಟಿ ಮತ್ತಿತರರು ರಾಜ್ಯ ತುಳು ಅಕಾಡೆಮಿಯನ್ನು ಮುಚ್ಚುವ ಪ್ರಸ್ತಾವವನ್ನು ತೀವ್ರವಾಗಿ ಪ್ರತಿಭಟಿಸಿದ್ದಾರೆ.

ಕರಾವಳಿ ಪ್ರದೇಶದಲ್ಲಿ ತುಳು ಅಕಾಡೆಮಿ ಸಕ್ರಿಯವಾಗಿ ಕೆಲಸ ನಿರ್ವಹಿಸುತ್ತಿದೆ. ತುಳು ಜಾನಪದ ಕಲೆ ಮತ್ತು ಸಾಹಿತ್ಯವನ್ನು ಪ್ರೋತ್ಸಾಹಿಸುವುದರ ಜೊತೆಗೆ ಕನ್ನಡ ಸಾಹಿತ್ಯ ಅಭಿವೃದ್ಧಿಗೂ ಶ್ರಮಿಸುತ್ತಿದೆ. ಅಂತಹ ಅಕಾಡೆಮಿಯನ್ನು ಮುಚ್ಚುವ ನಿರ್ಧಾರ ತೆಗೆದುಕೊಳ್ಳುವುದು ಸರಿಯಲ್ಲ ಎಂದು ತುಳುಕೂಟದ ಹಿರಿಯರು ಮಾಧ್ಯಮ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಯಾವುದೇ ಮುನ್ಸೂಚನೆ, ಅಥವಾ ಕಾರಣಗಳಿಲ್ಲದೆ ತುಳು ಅಕಾಡೆಮಿಯನ್ನು ಮುಚ್ಚುವ ಪ್ರಸ್ತಾಪ ವ್ಯಕ್ತವಾಗಿರುವುದು ಕರಾವಳಿ ಮತ್ತು ರಾಜ್ಯದ 30 ಲಕ್ಷ ತುಳುವರಿಗೆ ಶಾಕ್‌ ನೀಡಿದೆ. ಕಳೆದ ಆರು ವರ್ಷಗಳಿಂದ ಪ್ರಾಚೀನ ತುಳು ಸಂಸ್ಕೃತಿ ಮತ್ತು ಜನ ಜೀವನದ ಬಗೆಗೆ ಒಂದಲ್ಲ ಒಂದು ರೀತಿಯಲ್ಲಿ ಅಧ್ಯಯನ ನಡೆಸುತ್ತಾ ಬಂದಿರುವ ಅಕಾಡೆಮಿಯನ್ನು ಪ್ರೋತ್ಸಾಹಿಸುವ ಬದಲು ಶಾಸಕಾಂಗ ಸಮಿತಿ ಮುಚ್ಚಲು ಸಲಹೆ ಮಾಡಿರುವುದು ಸರಿಯಲ್ಲ ಎಂದು ತುಳು ಕೂಟ ಅಭಿಪ್ರಾಯ ಪಟ್ಟಿದೆ.

ಸಮಿತಿಯ ಸಲಹೆಯನ್ನು ಕಣ್ಣು ಮುಚ್ಚಿ ಒಪ್ಪಿಕೊಳ್ಳದೇ, ಸರಕಾರವು ತುಳು ಅಕಾಡೆಮಿಯ ಕೆಲಸ ಕಾರ್ಯಗಳನ್ನು ಮರುಪರಿಶೀಲಿಸಿ ಅಕಾಡೆಮಿಗೆ ಮತ್ತಷ್ಟು ಪ್ರೋತ್ಸಾಹ ನೀಡಬೇಕು ಎಂದು ತುಳುಕೂಟದ ಮುಂದಾಳುಗಳು ಒತ್ತಾಯಿಸಿದ್ದಾರೆ.

(ಇನ್ಫೋ ವಾರ್ತೆ)