ಶ್ರೀಲಂಕಾ ಟೆಸ್ಟ್‌ ಸರಣಿಗೆ ಸಚಿನ್‌ ಅಲಭ್ಯ : ಸ್ಕ್ಯಾನಿಂಗ್‌ ವರದಿ

ಮುಂಬಯಿ : ಭಾರತ ಕ್ರಿಕೆಟ್‌ ತಂಡಕ್ಕೆ ಕವಿದಿರುವ ಮಲುಕಿನ ಮಂಜು ಸದ್ಯಕ್ಕೆ ಕರಗುವ ಸಾಧ್ಯತೆಯಿಲ್ಲ. ಶ್ರೀಲಂಕಾ ಟೆಸ್ಟ್‌ ಸರಣಿಗೂ ಸಚಿನ್‌ ಅಲಭ್ಯ.

ಶುಕ್ರವಾರ ಸಚಿನ್‌ ಅವರ ಬಲಗಾಲಿನ ಹೆಬ್ಬೆರಳ ಸ್ಕ್ಯಾನ್‌ ಮಾಡಿದ ನಂತರ, ಹಿಂದೂಜಾ ಆಸ್ಪತ್ರೆ ವರದಿಗಳು ಸಚಿನ್‌ ಟೆಸ್ಟ್‌ ಸರಣಿಯಲ್ಲಿ ಆಡುವುದಿಲ್ಲ ಎಂದು ಸ್ಪಷ್ಟಪಡಿಸಿವೆ. ಬಲಗಾಲ ಹೆಬ್ಬೆರಳ ಮೂಳೆಯಲ್ಲಿನ ಕೂದಲೆಳೆಯ ಬಿರುಕು ಸಚಿನ್‌ ಸಾಧನೆಯ ಹಾದಿಯ ಸದ್ಯದ ತೊಡರು. ಈ ತೊಂದರೆ ಇನ್ನೂ ಪೂರ್ಣ ಗುಣವಾಗಿಲ್ಲ. ಬಾಧೆ ಕೂಡ ಸಚಿನ್‌ ಅವರನ್ನು ಕಾಡುತ್ತಿದ್ದು, ಅವರಿಗೆ ವಿಶ್ರಾಂತಿಯ ಅಗತ್ಯವಿದೆ ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ.

ಸಚಿನ್‌ ರಹಿತ ತಂಡ ಆಟದಲ್ಲಿ ನಿರಂತರ ಗೆಲುವಿನ ಹಾದಿ ಕಂಡುಕೊಳ್ಳುವಲ್ಲಿ ವಿಫಲವಾಗಿರುವುದು ಒಂದು ದಿನದ ಪಂದ್ಯಗಳ ತ್ರಿಕೋನ ಸರಣಿಯಲ್ಲಿ ಈಗಾಗಲೇ ಸಾಬೀತಾಗಿದೆ. ಇನ್ನು ಶ್ರೀಲಂಕಾ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ ಸಚಿನ್‌ ಇಲ್ಲ ಎಂಬ ಮಾನಸಿಕ ಹಿನ್ನಡೆ ಸ್ಥಿತಿಯಿಂದ ಭಾರತ ತಂಡ ಹೊರ ಬರುತ್ತದೆಯೇ? ಕಾದು ನೋಡಬೇಕು. ತಾವು ಆಡದಿರುವ ಬಗ್ಗೆ ಸಚಿನ್‌ ಈವರೆಗೆ ಏನೂ ಹೇಳಿಲ್ಲ.

(ಇನ್ಫೋ ವಾರ್ತೆ)