ಸೂಕ್ಷ್ಮಪ್ರದೇಶದ ಪಟ್ಟಿಯಲ್ಲಿ ಬೆಂಗಳೂರು ವಿಮಾನ ನಿಲ್ದಾಣ

ಬೆಂಗಳೂರು : ಜುಲೈ ತಿಂಗಳಲ್ಲಿ ನಡೆದ ಕೊಲಂಬೋ ವಿಮಾನ ನಿಲ್ದಾಣ ಸ್ಪೋಟದ ಹಿನ್ನಲೆಯಲ್ಲಿ ಬೆಂಗಳೂರು ವಿಮಾನ ನಿಲ್ದಾಣ ಸೇರಿದಂತೆ ಕೊಲ್ಕತ, ಕೊಚ್ಚಿ , ತಿರುವನಂತಪುರಂ ಮತ್ತು ಕೊಯಮುತ್ತೂರು ವಿಮಾನನಿಲ್ದಾಣ ಗಳನ್ನು ನಾಗರಿಕ ವಿಮಾನಯಾನ ಇಲಾಖೆಯು ಸೂಕ್ಷ್ಮ ಪ್ರದೇಶವೆಂದು ಗುರುತಿಸಿದೆ. ದೆಹಲಿ, ಮುಂಬಯಿ, ಚೆನೈ, ಜಮ್ಮು ಹಾಗೂ ಶ್ರೀನಗರ ವಿಮಾನ ನಿಲ್ದಾಣಗಳನ್ನು ಅತೀ ಸೂಕ್ಷ್ಮ ಪ್ರದೇಶವೆಂದು ಪರಿಗಣಿಸಲಾಗಿದೆ.

ವಿಮಾನ ನಿಲ್ದಾಣ ಕಚೇರಿಗಳಿಗೆ ಈ ಕುರಿತ ಸುತ್ತೋಲೆಯನ್ನು ಈಗಾಗಲೇ ಕಳುಹಿಸಲಾಗಿದೆ ಎಂದು ಟೈಂಸ್‌ ಆಫ್‌ ಇಂಡಿಯಾ ವರದಿ ಹೇಳಿದೆ. ಹೆಚ್ಚುತ್ತಿರುವ ಭೂಗತ ಮಾಫಿಯಾದ ಕುರಿತು ನಿಗಾ ವಹಿಸುವಂತೆ ಗೃಹ ಸಚಿವಾಲಯಬೆಂಗಳೂರು ವಿಮಾನ ನಿಲ್ದಾಣದ ಅಧಿಕಾರಿಗಳಿಗೆ ಆದೇಶಿಸಿದೆ.

ಅತೀ ಸೂಕ್ಷ್ಮ ವೆಂದು ಗುರುತಿಸಲಾಗಿರುವ ವಿಮಾನನಿಲ್ದಾಣಗಳಲ್ಲಿ ರಾಷ್ಟ್ರೀಯ ಸುರಕ್ಷಾ ಪಹರೆ ಮತ್ತು ಇಂಡೋ- ಟಿ-ಬೆಟಿಯನ್‌ ಗಡಿಭದ್ರತಾ ಕಮಾಂಡೋಗಳನ್ನು ವಿಸ್ತರಿಸಲಾಗಿದೆ. ಸೂಕ್ಷ್ಮವೆಂದು ಪರಿಗಣಿಸಿರುವ ವಿಮಾನ ನಿಲ್ದಾಣಗಳಲ್ಲಿ ಸಶಸ್ತ್ರ ಪಹರೆಯನ್ನು ನೇಮಿಸಲಾಗಿದೆ.

ಕೊಲಂಬೋ ವಿಮಾನ ನಿಲ್ದಾಣಕ್ಕೆ ಎಲ್ಲ ರೀತಿಯಿಂದಲೂ ಭದ್ರತೆ ಒದಗಿಸಿದ್ದರೂ ಎಲ್‌ಟಿಟಿಈ ಗೆರಿಲ್ಲಾಗಳು ಡ್ರೆೃನೇಜ್‌ ಮುಖಾಂತರ ಪ್ರವೇಶಿಸಿದ್ದರು. ಈ ಹಿನ್ನೆಲೆಯಲ್ಲಿ ಕೇಂದ್ರ ಕೈಗಾರಿಕಾ ರಕ್ಷಣಾ ಪಡೆ ಮತ್ತು ಪೊಲೀಸರಿಗೆ ವಿಮಾನ ನಿಲ್ದಾಣಗಳಲ್ಲಿ ಪಾಲಿಸಬೇಕಾದ ಕಟ್ಟು ನಿಟ್ಟಿನ ಕ್ರಮಗಳ ಬಗ್ಗೆ ವಿವರಿಸಲಾಗಿದೆ.

ಬೆಂಗಳೂರು ವಿಮಾನ ನಿಲ್ದಾಣದ ಹೊರ ಆವರಣದ ಬಳಿ ರಕ್ಷಣಾಧಿಕಾರಿಗಳು ಮತ್ತು ಶ್ವಾನ ದಳ ಜಾಗೃತ ಸ್ಥಿತಿಯಲ್ಲಿವೆ. ರಾತ್ರಿ ಹೊನಲು ಬೆಳಕಿನ ವ್ಯವಸ್ಥೆಯಾಂದಿಗೆ ಯಾವುದೇ ಪರಿಸ್ಥಿತಿಯನ್ನು ಎದುರಿಸಲು ‘ಶೀಘ್ರ ಕ್ರಿಯಾ ಪಡೆ’ ಯನ್ನು ರಚಿಸಲಾಗಿದೆ. ಆಗಸ್ಟ್‌ 15ರಂದು ಲಷ್ಕರ್‌ - ಇ- ತೋಯಿಬಾ ಉಗ್ರಗಾಮಿಗಳ ದಾಳಿಯನ್ನೂ ಶಂಕಿಸಲಾಗಿದ್ದು ಈ ಮುಂಜಾಗ್ರತಾ ಕ್ರಮಗಳನ್ನು ಇನ್ನಷ್ಟು ಬಿಗಿಗೊಳಿಸಲಾಗಿದೆ

(ಇನ್ಫೋ ವಾರ್ತೆ)