ಹೈಸ್ಪೀಡ್‌ ಕನೆಕ್ಟಿವಿಟಿ ಕೋರಿಯೂ ತೆಪ್ಪಗಿರುವ ಐ.ಟಿ. ಕಂಪನಿಗಳು

ಬೆಂಗಳೂರು : ಅಮೆರಿಕೆಯ ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಹಿನ್ನಡೆ ಬೆಂಗಳೂರಿನ ಸಾಫ್ಟ್‌ವೇರ್‌ ಹಾಗೂ ಐ.ಟಿ. ಕಂಪನಿಗಳ ಮೇಲೂ ತೀವ್ರ ಪರಿಣಾಮಬೀರಿದೆ. ಈ ಹಿಂದೆ ಹೈಸ್ಪೀಡ್‌ ಕನೆಕ್ಟಿವಿಟಿ ಸೌಲಭ್ಯ ನೀಡುವಂತೆ ಕೋರಿ ದೂರಸಂಪರ್ಕ ಇಲಾಖೆಗೆ ಅರ್ಜಿ ಸಲ್ಲಿಸಿದ್ದ ಕಂಪನಿಗಳು ಈಗ ಹಿಂದೆ ಸರಿದಿವೆ.

ಈ ಹಿಂದೆ 64 ಕಂಪನಿಗಳು ಹೈಸ್ಪೀಡ್‌ ಕನೆಕ್ಟಿವಿಟಿ ಸೌಲಭ್ಯ ಕೋರಿ ಅರ್ಜಿ ಸಲ್ಲಿಸಿದ್ದವು. ಈಗ ಈ ಸೌಲಭ್ಯ ನೀಡಲು ಬೆಂಗಳೂರು ಟೆಲಿಕಾಂ ಜಿಲ್ಲೆ ಸಮರ್ಥವಾಗಿದೆಯಾದರೂ, ಆ ಸೌಲಭ್ಯ ಪಡೆಯಲು ಕಂಪನಿಗಳಿಗೆ ಆರ್ಥಿಕ ಸಾಮರ್ಥ್ಯ ಇಲ್ಲ. ಈ ಸಂಬಂಧ ಯಾವುದೇ ಕಂಪನಿಯೂ ಮುಂದೆ ಬಂದಿಲ್ಲ ಎಂದು ಕರ್ನಾಟಕ ಟೆಲಿಕಾಂ ವೃತ್ತದ ಚೀಫ್‌ ಜನರಲ್‌ ಮ್ಯಾನೇಜರ್‌ ಕೆ. ಪದ್ಮನಾಭನ್‌ ತಿಳಿಸಿದ್ದಾರೆ.

ಹೈಸ್ಪೀಡ್‌ ಕನೆಕ್ಟಿವಿಟಿ ಸೌಲಭ್ಯಕ್ಕೆ ಅರ್ಜಿ ಸಲ್ಲಿಸಿದ್ದ 64 ಕಂಪನಿಗಳ ಪೈಕಿ 14 ಕಂಪನಿಗಳು 2 ಎಂ.ಬಿ. ಸಾಮರ್ಥ್ಯದ ಹಾಗೂ 50 ಕಂಪನಿಗಳು 64 ಕೆಬಿಪಿಎಸ್‌ ಸಾಮರ್ಥ್ಯದ ಸೇವೆ ಬಯಸಿದ್ದವು ಎಂದ ಅವರು, ಹಾಲಿ ಬೆಂಗಳೂರಿನಲ್ಲಿ ಎರಡು ಎಂ.ಬಿ.ಯ 800 ಗ್ರಾಹಕರನ್ನು ಹಾಗೂ 64 ಕೆಬಿಪಿಎಸ್‌ ಸಾಮರ್ಥ್ಯದ 1400 ಗ್ರಾಹಕರನ್ನು ಮಾತ್ರ ಹೊಂದಿದೆ ಎಂದು ತಿಳಿಸಿದರು.

ರಾಜ್ಯದೆಲ್ಲೆಡೆ ಆಪ್ಟಿಕ್‌ ಫೈಬರ್‌ ಕೇಬಲ್ಸ್‌ ಮತ್ತು ರೇಡಿಯೋ ಸಿಸ್ಟಮ್ಸ್‌ ಅನ್ನು ಅಳವಡಿಸಲಾಗಿರುವ ಹಿನ್ನೆಲೆಯಲ್ಲಿ ರಾಜ್ಯದ ಯಾವುದೇ ಸ್ಥಳದಿಂದಲಾದರೂ, ಯಾವುದೇ ಬ್ಯಾಂಡ್‌ ವಿಡ್ತ್‌ನಲ್ಲಿ ಲೀಸ್‌ ಲೈನ್‌ ಸಂಪರ್ಕ ನೀಡಲು ಕರ್ನಾಟಕ ಟೆಲಿಕಾಂ ವೃತ್ತ ಸಿದ್ಧವಿದೆ ಎಂದು ಪದ್ಮನಾಭನ್‌ ಹೇಳಿದರು.