ಮುಂದಿನ ವರ್ಷ ದೂರಸಂಪರ್ಕ ಇಲಾಖೆಯಿಂದಮೊಬೈಲ್‌ ಸೇವೆ

ಬೆಂಗಳೂರು : ದೂರ ಸಂಪರ್ಕ ಇಲಾಖೆಯು ಬರುವ ಮಾರ್ಚ್‌ ತಿಂಗಳಿನಿಂದ ಮೊಬೈಲ್‌ ಸೇವೆಯನ್ನು ಪ್ರಾರಂಭಿಸಲು ನಿರ್ಧರಿಸಿದೆ.

ಖಾಸಗಿ ಮೊಬೈಲ್‌ ಕಂಪೆನಿಗಳ ತೀವ್ರ ಪೈಪೋಟಿಯ ನಡುವೆ ಈ ಸೇವೆ ಆರಂಭವಾಗಲಿದ್ದು, 2001-01ನೇ ಸಾಲಿನಲ್ಲಿ 92 ಸಾವಿರ ಮೊಬೈಲ್‌ ಸೇರಿದಂತೆ ಒಟ್ಟು 5 ಲಕ್ಷ ದೂರವಾಣಿ ಸಂಪರ್ಕಗಳನ್ನು ಕಲ್ಪಿಸಲಾಗುವುದು. ಈ ವಿಷಯವನ್ನು ರಾಜ್ಯ ದೂರಸಂಪರ್ಕ ಇಲಾಖೆಯ ಪ್ರಧಾನ ವ್ಯವಸ್ಥಾಪಕ ಕೆ. ಪದ್ಮನಾಭನ್‌ ಸೋಮವಾರದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ರಾಜ್ಯದ ಹೆದ್ದಾರಿ ವ್ಯಾಪ್ತಿಯ 41 ಕೇಂದ್ರಗಳೂ ಸೇರಿದಂತೆ ನಗರ ಹಾಗೂ ಪಟ್ಟಣ ಪ್ರದೇಶಗಳ 197 ಕೇಂದ್ರಗಳಲ್ಲಿ ಮೊಬೈಲ್‌ ಸೇವಾ ನಿರ್ವಹಣ ಕೇಂದ್ರಗಳನ್ನು ಸ್ಥಾಪಿಸಲಾಗುವುದು. ಈಗಾಗಲೇ ಇದಕ್ಕೆ ಸಂಬಂಧಿಸಿದಂತೆ ಟೆಂಡರ್‌ ಕರೆಯಲಾಗಿದೆ. ಮೋಟೋರೋಲಾ ಕಂಪೆನಿಗೆ ಇದರ ನಿರ್ವಹಣಾ ಜವಾಬ್ದಾರಿಯನ್ನು ವಹಿಸಲಾಗುವುದು.

ಮುಂದಿನ ವರ್ಷ ಫೆಬ್ರವರಿಯಲ್ಲಿ ಪ್ರಾಯೋಗಿಕ ಮೊಬೈಲ್‌ ಸೇವೆಯನ್ನು ಆರಂಭವಾಗಲಿದೆ. ಆದರೆ ದರ ನಿಗದಿಪಡಿಸುವ ಕುರಿತು ನಿರ್ಧಾರವಾಗಿಲ್ಲ ಎಂದು ಪದ್ಮನಾಭನ್‌ ಹೇಳಿದರು.

(ಇನ್ಫೋ ವಾರ್ತೆ)