ಆರ್ಥಿಕ ಹಿನ್ನಡೆ : ಏಷ್ಯಾದ 2 ಮಿಲಿಯನ್‌ ಮಂದಿ ಕೆಲಸಕ್ಕೆ ಕುತ್ತು?

ಸಿಂಗಪೂರ: ವಿಶ್ವಮಟ್ಟದಲ್ಲಿ ಉಂಟಾಗಿರುವ ಆರ್ಥಿಕ ಹಿನ್ನಡೆಯಿಂದಾಗಿ ಪ್ರಸಕ್ತ ವರ್ಷ ಏಷ್ಯಾದಲ್ಲಿ 2 ಮಿಲಿಯನ್‌ ಉದ್ಯೋಗಿಗಳು ತಮ್ಮ ಕೆಲಸ ಕಳೆದುಕೊಳ್ಳಲಿದ್ದಾರೆ ಎಂದು ಸಿಂಗಪೂರ್‌ ಪತ್ರಿಕೆಯಾಂದು ನಡೆಸಿದ ಸಮೀಕ್ಷೆಯಿಂದ ತಿಳಿದುಬಂದಿದೆ.

ಸಿಂಗಪೂರ್‌, ಮಲೇಷಿಯಾ, ಥೈಲ್ಯಾಂಡ್‌, ಫಿಲಿಪೈನ್ಸ್‌, ಜಪಾನ್‌, ಇಂಡೋನೇಷಿಯಾ, ಹಾಂಗ್‌ಕಾಂಗ್‌, ದಕ್ಷಿಣ ಕೊರಿಯಾ, ಬಾಂಗ್ಲಾದೇಶದ ಸರಕಾರಿ ಅಧಿಕಾರಿಗಳು ನೀಡಿರುವ ಅಂಕಿ ಅಂಶಗಳನ್ನು ಆಧರಿಸಿ ಸಿಂಗಪೂರ್‌ ಮೂಲದ ಪತ್ರಿಕೆ ನಡೆಸಿರುವ ಸಮೀಕ್ಷೆ ಪ್ರಕಾರ 2ಲಕ್ಷ ಮಂದಿ ಉದ್ಯೋಗ ವಂಚಿತರಾಗುತ್ತಾರೆ.

ಸಮೀಕ್ಷೆಯ ದೃಷ್ಟಿಯಿಂದ ಪತ್ರಿಕೆಯು 21.1 ದಶಲಕ್ಷ ಜನರನ್ನು ಸಂಪರ್ಕಿಸಿ, ಅಭಿಪ್ರಾಯ ಸಂಗ್ರಹಿಸಿದೆ. ಈ ಸಮೀಕ್ಷೆಯ ರೀತ್ಯ ಈಗಷ್ಟೇ ಉದ್ಯೋಗ ಕಳೆದುಕೊಳ್ಳುವ ಪ್ರಕ್ರಿಯೆ ಆರಂಭವಾಗಿದೆ. ಈ ವರ್ಷದ ಅಂತ್ಯದ ವೇಳೆಗೆ ಏಷ್ಯಾದಲ್ಲಿ ಹತ್ತಿರ ಹತ್ತಿರ 2 ದಶಲಕ್ಷ ಮಂದಿ ತಮ್ಮ ಉದ್ಯೋಗ ಕಳೆದುಕೊಳ್ಳುತ್ತಾರೆ.

ಇದಕ್ಕೆ ಮೂಲ ಕಾರಣ ಏಷ್ಯಾದ ರಫ್ತು ಉತ್ಪನ್ನಗಳಿಗೆ ಅಮೆರಿಕೆಯಲ್ಲಿ ಬೇಡಿಕೆ ಕುಸಿದಿರುವುದೇ ಆಗಿದೆ. ಜಾಗತಿಕ ಮಟ್ಟದಲ್ಲಿ ವಿದ್ಯುನ್ಮಾನ ಕ್ಷೇತ್ರದ ಹಿನ್ನಡೆ, ಆರ್ಥಿಕ ಬದಲಾವಣೆ, ರಾಜಕೀಯ ಅಸ್ಥಿರತೆ ಮೊದಲಾದ ಕಾರಣಗಳೂ ಈ ಉದ್ಯೋಗ ವಂಚನೆಗೆ ಪೂರಕವಾಗಿವೆ ಎಂದಿದೆ ಸಮೀಕ್ಷೆ.