ವಿಧಾನ ಪರಿಷತ್ತಿನ 19ನೇ ಸಭಾಧ್ಯಕ್ಷರಾಗಿ ಮಾಜಿ ಸಚಿವ ಬಿ.ಎಲ್‌.ಶಂಕರ್‌

ಬೆಂಗಳೂರು : ವಿಧಾನ ಪರಿಷತ್ತಿನ 19 ನೇ ಸಭಾಧ್ಯಕ್ಷರಾಗಿ ಮಾಜಿ ಸಚಿವ ಬಿ.ಎಲ್‌.ಶಂಕರ್‌ ನಿರೀಕ್ಷೆಯಂತೆ ಬಹುಮತದಿಂದ ಆಯ್ಕೆಯಾಗಿದ್ದಾರೆ.

ವಿಧಾನ ಪರಿಷತ್ತಿನ ಅಧ್ಯಕ್ಷ ಸ್ಥಾನಕ್ಕಾಗಿ ಸೋಮವಾರ ನಡೆದ ಚುನಾವಣೆಯಲ್ಲಿ ಪರಿಷತ್ತಿನ 31 ಕಾಂಗ್ರೆಸ್‌ ಸದಸ್ಯರು, ಜಾತ್ಯತೀತ ಜನತಾದಳದ 14 ಮಂದಿ ಹಾಗೂ ನಾಲ್ವರು ತಟಸ್ಥ ಸದಸ್ಯರು ಶಂಕರ್‌ ಪರವಾಗಿ ಮತ ಚಲಾಯಿಸಿದರು. ಸಂಯುಕ್ತ ಜನತಾದಳದ ಸದಸ್ಯರು ಚುನಾವಣೆಯಲ್ಲಿ ತಟಸ್ಥ ನೀತಿ ಅನುಸರಿಸಿದರೆ, ಬಿಜೆಪಿಯ 14 ಮಂದಿ ಸದಸ್ಯರು ಶಂಕರ್‌ ವಿರುದ್ಧವಾಗಿ ಓಟು ಹಾಕಿದರು.

ಶಂಕರ್‌ ಆಯ್ಕೆಗೆ ಮುನ್ನ ಬಿಜೆಪಿಯ ಡಾ.ತಂಗಾ ಹಾಗೂ ಸಂಯುಕ್ತ ಜನತಾದಳದ ಶಾಣಪ್ಪ ಅವರ ಹೆಸರನ್ನು ಪರಿಷತ್ತಿನ ಅಧ್ಯಕ್ಷ ಸ್ಥಾನಕ್ಕೆ ಸೂಚಿಸಿದರೂ, ಅಗತ್ಯ ಮತಗಳನ್ನು ಪಡೆಯುವಲ್ಲಿ ಅವರು ವಿಫಲವಾದರು. ವಿಧಾನ ಪರಿಷತ್ತಿನ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಶಂಕರ್‌ ಅವರಿಗೆ ಮುಖ್ಯಮಂತ್ರಿ ಎಸ್‌ಎಂ.ಕೃಷ್ಣ ಸೇರಿದಂತೆ ವಿವಿಧ ಪಕ್ಷಗಳ ಧುರೀಣರು ಶುಭಾಶಯ- ಅಭಿನಂದನೆ ತಿಳಿಸಿದ್ದಾರೆ.

(ಪಿಟಿಐ)