ಮಂಗಳವಾರದಿಂದ ಲಾಲ್‌ಬಾಗ್‌ನಲ್ಲಿ ಫಲಪುಷ್ಪ ಪ್ರದರ್ಶನ

ಬೆಂಗಳೂರು : ಬೆಂಗಳೂರಿನಲ್ಲಿ ಈ ಹೊತ್ತು ಕೇಳಿಬರುತ್ತಿರುವ ದುಂಬಿಗಳ ಝೇಂಕಾರ ಆಗಸ್ಟ್‌ 15, ಹತ್ತಿರವಾಯಿತು ಎಂಬುದನ್ನು ನೆನಪಿಸುತ್ತಿದೆ. ಲಾಲ್‌ಬಾಗ್‌ ನಮ್ಮನ್ನು ಕೈಬೀಸಿ ಕರೆಯುತ್ತಿದೆ. ಹಚ್ಚ ಹಸುರಿನಿಂದ ಕಂಗೊಳಿಸುತ್ತಿರುವ ಲಾಲ್‌ಬಾಗ್‌ನಲ್ಲಿ ಸ್ವಾತಂತ್ರೋತ್ಸವದ ಅಂಗವಾಗಿ ಫಲಪುಷ್ಪ ಪ್ರದರ್ಶನ ಏರ್ಪಟ್ಟಿದೆ.

ಲಾಲ್‌ಬಾಗ್‌ನ ಕೇಂದ್ರಬಿಂದುವಾಗಿರುವ ಗಾಜಿನಮನೆಯಲ್ಲಿ ಸುಂದರವಾಗಿ ಅರಳಿರುವ ಹೂಗಳ ಚೆಲುವನ್ನು ನೋಡುವುದೇ ಒಂದು ಆನಂದ. ಅಧಿಕೃತವಾಗಿ ಆಗಸ್ಟ್‌ 7ರಿಂದ ಪುಷ್ಪಪ್ರದರ್ಶನ. ಇದಕ್ಕಾಗಿಯೇ ವ್ಯಕ್ತಿಗಳು, ಹಲವು ಸಂಘಸಂಸ್ಥೆಗಳು ವಿವಿಧ ಬಗೆಯ ಫಲಪುಷ್ಪಗಳನ್ನು ಬೆಳೆಸಿ, ವಿವಿಧ ವಿನ್ಯಾಸಗಳಲ್ಲಿ ಜೋಡಿಸಿ, ಸ್ಪರ್ಧೆಗೆ ಸಜ್ಜಾಗಿದ್ದಾರೆ.

ಸ್ವಾತಂತ್ರ್ಯದಿನಾಚರಣೆ ಹಾಗೂ ಗಣರಾಜ್ಯೋತ್ಸವ ಸಂದರ್ಭದಲ್ಲಿ ಇಲ್ಲಿ ನಡೆಯುವ ಫಲಪುಷ್ಪ ಪ್ರದರ್ಶನ ಉದ್ಯಾನ ನಗರಿಯ ಅವಿಭಾಜ್ಯ ಅಂಗ. ಕಲಾತ್ಮಕವಾಗಿ ಜೋಡಿಸಿಡುವ ಫಲಪುಷ್ಪ ಸಿರಿಯನ್ನು ಕಾಣಲೆಂದೇ ದೇಶ ವಿದೇಶಗಳಿಂದ ಪ್ರವಾಸಿಗರು ಆಗಮಿಸುತ್ತಾರೆ.

ಜನಮನವನ್ನು ಹಾಗೂ ತೀರ್ಪುಗಾರರನ್ನು ಮೆಚ್ಚಿಸುವ ವಿನ್ಯಾಸಕ್ಕೆ ಪ್ರಶಸ್ತಿ, ಪಾರಿತೋಷಕಗಳನ್ನೂ ನೀಡಲಾಗುತ್ತದೆ. ಮೈಸೂರು ಉದ್ಯಾನ ಕಲಾ ಸಂಘ ಹಾಗೂ ತೋಟಗಾರಿಕೆ ಇಲಾಖೆ ಸಂಯುಕ್ತಾಶ್ರಯದಲ್ಲಿ ಈ ಸ್ಪರ್ಧೆ - ಪ್ರದರ್ಶನ ನಡೆಯುತ್ತಿದೆ.

ಬೆಂಗಳೂರಿಗೆ ಕಳಶಪ್ರಾಯವಾಗಿರುವ ಲಾಲ್‌ಬಾಗ್‌ 97 ಹೆಕ್ಟೇರ್‌ ಅಥವಾ 240 ಎಕರೆ ಪ್ರದೇಶದ ಸಸ್ಯಕಾಶಿ. ಇದೊಂದು ಪ್ರವಾಸಿತಾಣವಾದರೇ, ಇದರೊಳಗೆ ನೋಡಲೇಬೇಕಾದ ಹಲವಾರು ಉಪತಾಣಗಳಿವೆ. ಗಾಜಿನ ಮನೆ,

ಜಯಚಾಮರಾಜೇಂದ್ರ ಒಡೆಯರ ಪ್ರತಿಮೆ, ಸರಕಾರಿ ಮತ್ಸ್ಯಾಗಾರ, ಸುಂದರವಾದ ಹೂ ಗಡಿಯಾರ, ಶಿಲ್ಪೋದ್ಯಾನ, ಗುಲಾಬಿ ವನ, ಕೆಂಪೇಗೌಡರ ಗೋಪುರ, ಬೃಹತ್‌ಬಂಡೆ, ಸಹಸ್ರಾರು ವರ್ಷಗಳ ಹಿಂದಿನ ವೃಕ್ಷದ ಪಳೆಯುಳಿಕೆ, ಬೇಸಿಗೆಯಲ್ಲೂ ನಿಮ್ಮನ್ನು ತಂಪಾಗಿಡುವ ತಂಡಿ ಸಡಕ್‌, ಲಾಲ್‌ಬಾಗ್‌ ಕೆರೆ ಹಾಗೂ ದ್ವೀಪ ಜೊತೆಗೆ ಸುಂದರವಾಗಿ ಜೋಡಿಸಿಟ್ಟ ಬಗೆಬಗೆಯ ಹೂಗಳು. ಬಿಡುವು ಮಾಡಿಕೊಂಡು ಪುಷ್ಪಗಳ ಸೌಂದರ್ಯವನ್ನು ಸವಿಯಲು ಹೋಗುತ್ತೀರಾ ತಾನೆ?

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...