ನಾನೀಗ ಫಿಟ್‌ ಆಗಿದ್ದೇನೆ- ಬಿಸಿಸಿಐಗೆ ಸಚಿನ್‌ ಪತ್ರ

ನವ ದೆಹಲಿ : ನನ್ನ ಬಲಗಾಲ ಹೆಬ್ಬೆಟ್ಟಿನ ಮೂಳೆಯ ಕೂದಲೆಳೆಯಷ್ಟು ಬಿರುಕಿನ ತಂದರೆಯೀಗ ಬಗೆಹರಿದಿದೆ. ಸಾಕಷ್ಟು ಗುಣಮುಖನಾಗಿದ್ದು, ಆಗಸ್ಟ್‌ 10ರ ವೈದ್ಯಕೀಯ ಪರೀಕ್ಷೆ ನಂತರ ಕ್ರಿಕೆಟ್ಟಿಗೆ ಮರಳುವ ಬಗ್ಗೆ ಅಧಿಕೃತ ಹೇಳಿಕೆ ಕೊಡುತ್ತೇನೆ- ಸಚಿನ್‌ ತೆಂಡೂಲ್ಕರ್‌ ಭಾರತ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಗೆ ಸೋಮವಾರ ಈ ರೀತಿ ಪತ್ರ ಬರೆದಿದ್ದಾರೆ.

ಬಿಸಿಸಿಐ ಕಾರ್ಯದರ್ಶಿ ಜಯವಂತ ಲೆಲೆ ಮಂಗಳವಾರ ಮಾಧ್ಯಮಗಳಿಗೆ ಈ ವಿಷಯ ತಿಳಿಸಿದ್ದಾರೆ.

ಶ್ರೀಲಂಕಾದಲ್ಲಿ 3 ಟೆಸ್ಟ್‌ ಸರಣಿಯ ಮೊದಲ ಪಂದ್ಯ ಆಗಸ್ಟ್‌ 14ರಂದು ಪ್ರಾರಂಭವಾಗಲಿದೆ. ಆಗಸ್ಟ್‌ 2ರಂದು ಸರಣಿಗೆ ತಂಡವನ್ನು ಆಯ್ಕೆ ಮಾಡಲಾಗುವುದು. ಸಚಿನ್‌ಗೆ ತಂಡದಲ್ಲಿ ಜಾಗೆಯನ್ನು ಮೀಸಲಿಡಲು ನಿರ್ಧರಿಸಿದ್ದೇವೆ. ಪೂರ್ಣ ಗುಣಮುಖರಾಗುವ ಮುನ್ನ ಆಡುವಂತೆ ಅವರನ್ನು ಮಂಡಳಿ ಯಾವುದೇ ಕಾರಣಕ್ಕೂ ಒತ್ತಾಯಿಸುವುದಿಲ್ಲ ಎಂದು ಲೆಲೆ ಸ್ಪಷ್ಟಪಡಿಸಿದ್ದಾರೆ.

ಲಕ್ಷ್ಮಣ್‌, ಆಶಿಶ್‌ ನೆಹ್ರಾ ಹಾಗೂ ಜಾಹಿರ್‌ ಖಾನ್‌ ಕೂಡ ಗಾಯಾಳುಗಳಾಗಿದ್ದು, ಭಾರತ- ಶ್ರೀಲಂಕಾ- ನ್ಯೂಜಿಲೆಂಡ್‌ ನಡುವಣ ನಡೆಯುತ್ತಿರುವ ಒಂದು ದಿನದ ಪಂದ್ಯಗಳ ತ್ರಿಕೋನ ಸರಣಿ ಮುಗಿದ ನಂತರ ಗಾಯಾಳುಗಳು ತವರಿಗೆ ಮರಳಿ ಚಿಕಿತ್ಸೆ ಪಡೆಯಲಿದ್ದಾರೆ. ಆಟಗಾರರ ಆರೋಗ್ಯದ ತೊಂದರೆ ಉಲ್ಬಣಿಸದಂತೆ ಎಚ್ಚರ ವಹಿಸಲು ತಂಡದ ಮ್ಯಾನೇಜ್‌ಮೆಂಟ್‌ಗೆ ಹೇಳಿದ್ದೇವೆ. ಪ್ರಸಕ್ತ ಪರಿಸ್ಥಿತಿಯಲ್ಲಿ ಸಚಿನ್‌ ಪುನರಾಗಮನ ಭಾರತ ತಂಡಕ್ಕೆ ಅತ್ಯವಶ್ಯವಾಗಿದೆ. ಈ ನಿಟ್ಟಿನಲ್ಲಿ ಮಂಡಳಿಗೆ ಅವರು ಬರೆದಿರುವ ಪತ್ರ ಖುಷಿ ತಂದಿದೆ ಎಂದು ಲೆಲೆ ಹೇಳಿದ್ದಾರೆ.

(ಏಜೆನ್ಸೀಸ್‌)