ನಾಣ್ಯಗಳ ಜಮಾನದಲ್ಲಿ ಮತ್ತೆ ಬಂದಿದೆ ಗರಿಮುರಿ 5 ರು.ನೋಟು

ಬೆಂಗಳೂರು : ಹೊಸ 5 ರುಪಾಯಿ ನೋಟುಗಳು ಮತ್ತೆ ಚಲಾವಣೆಗೆ ಬರಲಿವೆ. ಎಲ್ಲೆಲ್ಲೂ ನಾಣ್ಯಗಳೇ ರಾರಾಜಿಸತೊಡಗಿ 1,2 ಹಾಗೂ 5 ರ ನೋಟುಗಳ ಜಮಾನ ಮುಗಿದೇ ಹೋಯಿತು ಅನ್ನುವ ಸಂದರ್ಭದಲ್ಲಿ , ಗರಿಗರಿಯಾದ 5 ರು. ನೋಟುಗಳನ್ನು ಆಗಸ್ಟ್‌ 1 ರಿಂದ ವಿತರಿಸಲಾಗುವುದು ಎಂದು ರಿಸರ್ವ್‌ ಬ್ಯಾಂಕ್‌ ಪ್ರಕಟಣೆ ತಿಳಿಸಿದೆ.

ಚಾಲ್ತಿಯಲ್ಲಿರುವ 5 ರುಪಾಯಿ ನೋಟುಗಳನ್ನೇ ಹೊಸ ನೋಟುಗಳೂ ಹೋಲುತ್ತವೆ. ನೋಟಿನ ಮೌಲ್ಯವನ್ನು 15 ಭಾಷೆಗಳಲ್ಲಿ ನಮೂದಿಸಲಾಗಿದ್ದು , ಆರ್‌ಬಿಐ ಗೌರ್ನರ್‌ ಬಿಮಲ್‌ ಜಲಾನ್‌ ಅವರ ಸಹಿಯನ್ನು ನೋಟು ಹೊಂದಿದೆ. ಗರಿಮುರಿ 5 ರು. ನೋಟುಗಳು ಆರ್‌ಬಿಐನ ಬೆಂಗಳೂರು ಕಚೇರಿಯಲ್ಲಿ ಬುಧವಾರದಿಂದ ವಿತರಣೆಗೆ ಲಭ್ಯ.

ನೋಟಿನ ಇತರ ಚಹರೆಗಳು-

• ನೋಟಿನ ಮುಂಬದಿಯ ಬಲಭಾಗದಲ್ಲಿ ಅಶೋಕ ಸ್ಥಂಭದ ಲಾಂಛನ.
• ವಾಟರ್‌ಮಾರ್ಕ್‌ ವಿಂಡೋದಲ್ಲಿ ಅಶೋಕ ಸ್ಥಂಭದ ವಾಟರ್‌ ಮಾರ್ಕ್‌.
• ನೋಟಿನ ಹಿಂಬದಿಯಲ್ಲಿ ಟ್ರ್ಯಾಕ್ಟರ್‌ನಲ್ಲಿ ಕುಳಿತು ನೆಲ ಉಳುತ್ತಿರುವ ರೈತನ ಚಿತ್ರ.
• ನೋಟಿನ ಬಣ್ಣ - ಹಸಿರು ಹಾಗೂ ತಿಳಿ ಗುಲಾಬಿ.

(ಇನ್ಫೋ ವಾರ್ತೆ)