ರಾಜಸ್ಥಾನದ ‘ವಾಟರ್‌ ಮ್ಯಾನ್‌’ ರಾಜೇಂದ್ರ ಸಿಂಗ್‌ಗೆಮ್ಯಾಗ್ಸೆಸೆ ಪ್ರಶಸ್ತಿ

ಮನಿಲಾ : ವಾಟರ್‌ ಮ್ಯಾನ್‌ ಎಂದೇ ಹೆಸರಾದ ರಾಜಸ್ಥಾನ ಮೂಲದ ರಾಜೇಂದ್ರ ಸಿಂಗ್‌ ಪ್ರಸಕ್ತ ಸಾಲಿನ ಮ್ಯಾಗ್ಸೆಸೆ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ. ಸೋಮವಾರ ಪ್ರಕಟವಾದ ಈ ಪ್ರಶಸ್ತಿಗೆ ಆಯ್ಕೆಯಾದವರ ಪಟ್ಟಿಯಲ್ಲಿರುವ ಭಾರತದ ಏಕೈಕ ವ್ಯಕ್ತಿ ಇವರು.

ಆಳ್ವಾರ್‌ನ ಜಲ ನಿರ್ವಹಣಾ ಕ್ಷೇತ್ರದಲ್ಲಿನ ಬಿಕ್ಕಟ್ಟನ್ನು ಪರಿಹರಿಸುವಲ್ಲಿ ರಾಜೇಂದ್ರ ಸಿಂಗ್‌ ಪಾತ್ರ ಹಿರಿದಾದದ್ದು. ಈ ಕಾರಣಕ್ಕಾಗೇ ಅವರಿಗೆ ಜನ ನಾಯಕತ್ವಕ್ಕಾಗಿ ಮ್ಯಾಗ್ಸೆಸೆ ಪ್ರಶಸ್ತಿ ಸಂದಿದೆ. ಜಪಾನಿನ ಒಬ್ಬರು, ಚೀನಾದ ಇಬ್ಬರು, ಶ್ರೀಲಂಕಾ, ಇಂಡೋನೇಷ್ಯಾ ಹಾಗೂ ಕಾಂಬೋಡಿಯಾದಿಂದ ತಲಾ ಒಬ್ಬೊಬ್ಬರು ಮ್ಯಾಗ್ಸೆಸೆ ಪ್ರಶಸ್ತಿಗೆ ಆಯ್ಕೆಯಾಗಿದ್ದಾರೆ.

ಜಪಾನಿನ ಇಕುವೋ ಹಿರಾಯಾಮ ಅವರಿಗೆ ಯುನೆಸ್ಕೋ ರಾಯಭಾರಿಯಾಗಿ ಸಲ್ಲಿಸಿರುವ ಸೇವೆಗೆ ಶಾಂತಿ ಮತ್ತು ಅಂತರರಾಷ್ಟ್ರೀಯ ಚಿಂತನಕಾರ ಎಂದು ಗುರ್ತಿಸಿ, ಮ್ಯಾಗ್ಸೆಸೆ ಪ್ರಶಸ್ತಿ ಘೋಷಿಸಲಾಗಿದೆ. 1957ರಲ್ಲಿ ವಿಮಾನ ಅಪಘಾತದಿಂದ ಸಾವಿಗೀಡಾದ ಫಿಲಿಫೈನ್ಸ್‌ನ ಮಾಜಿ ಅಧ್ಯಕ್ಷ ಆರ್‌.ಮ್ಯಾಗ್ಸೆಸೆ ಅವರ ಹೆಸರಿನಲ್ಲಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರ್ತಿಸಿಕೊಳ್ಳುವಂಥ ಸೇವೆ ಸಲ್ಲಿಸಿದವರಿಗೆ ಪ್ರತಿವರ್ಷ ಈ ಪ್ರಶಸ್ತಿ ನೀಡಲಾಗುತ್ತಿದೆ.

(ಇನ್ಫೋ ವಾರ್ತೆ)