ಬೆಂಗಳೂರಿನಲ್ಲಿ ಅಕ್ಟೋಬರ್‌ 15ರಿಂದ ತ್ರಿಭಾಷಾ ನಾಟಕೋತ್ಸವ

ಬೆಂಗಳೂರು : ದೃಷ್ಟಿ ಕಲಾವಿದರ ಸಂಘ ಬರುವ ಅಕ್ಟೋಬರ್‌ನಿಂದ ಏಳು ದಿನಗಳ ‘ವಿಭಿನ್ನ- 2001’ ತ್ರಿಭಾಷಾ ನಾಟಕೋತ್ಸವವನ್ನು ಆಯೋಜಿಸಲಿದೆ.

ಉತ್ಸವದಲ್ಲಿ ಹಿಂದಿ, ಇಂಗ್ಲಿಷ್‌ ಮತ್ತು ಕನ್ನಡ ಭಾಷಾ ನಾಟಕ ಪ್ರದರ್ಶನಗಳು ನಗರದ ಗುರುನಾನಕ್‌ ಭವನದಲ್ಲಿ ನಡೆಯಲಿದ್ದು, ಮೂವರು ಹಿರಿಯ ರಂಗ ಕಲಾವಿದರು ತೀರ್ಪುಗಾರರ ಸ್ಥಾನದಲ್ಲಿರುತ್ತಾರೆ. ಉತ್ತಮವಾಗಿ ಪ್ರದರ್ಶಿತವಾದ ನಾಟಕಕ್ಕೆ ಕೊನೆಯ ದಿನ ಪ್ರಶಸ್ತಿ ಫಲಕದೊಂದಿಗೆ 5000 ರೂಪಾಯಿಗಳ ನಗದು ಬಹುಮಾನ ನೀಡಲಾಗುವುದು ಎಂದು ಸಂಘದ ಪ್ರಕಟಣೆ ತಿಳಿಸಿದೆ.

ಇದಲ್ಲದೆ ಸಮಾಧಾನಕರ ಬಹುಮಾನಗಳನ್ನು ಗಿಟ್ಟಿಸಿಕೊಳ್ಳುವ ನಾಟಕ ತಂಡಕ್ಕೆ 2000 ರೂಪಾಯಿ ನಗದು ಮತ್ತು ಪ್ರಶಸ್ತಿ ಫಲಕ ಸಿಗಲಿದೆ. ಬೆಳಕು, ರಂಗಸಜ್ಜಿಕೆ ವಿಭಾಗದವರಿಗೂ ಪ್ರೋತ್ಸಾಹಕರ ಬಹುಮಾನವಿರುತ್ತದೆ. ರಾಜ್ಯದ ಕಾಲೇಜುಗಳ ನಾಟಕ ಸಂಘಗಳೂ ಈ ಸ್ಪರ್ಧೆಯಲ್ಲಿ ಭಾಗವಹಿಸಬಹುದು.

ರಾಷ್ಟ್ರೀಯ ನಾಟಕ ಶಾಲೆ, ಯುವಜನ ಮತ್ತು ಕ್ರೀಡಾ ವಿಭಾಗ ಹಾಗೂ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಯೋಗದಲ್ಲಿ ಈ ಉತ್ಸವದಲ್ಲಿ ನಡೆಯುವ ಈ ರಂಗೋತ್ಸವದಲ್ಲಿ ಹಿಂದಿ ಚಿತ್ರ ನಟರಾದ ನಾನಾ ಪಾಟೇಕರ್‌ ಹಾಗೂ ಓಂಪುರಿ ಮುಖ್ಯ ಅತಿಥಿಗಳಾಗಿ ಆಗಮಿಸಲಿದ್ದಾರೆ.

ಹೆಚ್ಚಿನ ವಿಷಯಕ್ಕೆ ಸಂಪರ್ಕಿಸಬೇಕಾದ ವಿಳಾಸ -ದೃಷ್ಟಿ, 108/1, ರೋಹಿಣಿ ಅಪಾರ್ಟ್‌ಮೆಂಟ್ಸ್‌, 9 ನೇ ಅಡ್ಡ ರಸ್ತೆ, ವಿಲ್ಸನ್‌ ಗಾರ್ಡನ್‌, ಬೆಂಗಳೂರು, 560 027, ಫೋನ್‌ - 98440-56179, ಫ್ಯಾಕ್ಸ್‌- (080) 5545168

(ಇನ್ಫೋ ವಾರ್ತೆ)