ಪಿಲಿಕುಳ ನಿಸರ್ಗಧಾಮದಲ್ಲಿ ಔಷಧೀಯ ಗಿಡ ನೆಡುವ ಯೋಜನೆ

ವಿಟ್ಲ : ಮಂಗಳೂರು ಸಮೀಪದ ವಾಮಂಜೂರಿನ ಪಿಲಿಕುಳ ನಿಸರ್ಗಧಾಮದಲ್ಲಿ 60 ಸಾವಿರ ಔಷಧೀಯ ಗಿಡಗಳನ್ನು ನೆಡುವ ಯೋಜನೆಯನ್ನು ಮಂಗಳೂರು ವಿಶ್ವ ವಿದ್ಯಾಲಯದ ಆನ್ವಯಿಕ ಸಸ್ಯಶಾಸ್ತ್ರ ವಿಭಾಗವು ಕೈಗೆತ್ತಿಕೊಂಡಿದೆ.

ಇಂಡೋ-ನಾರ್ವೆ ಪರಿಸರ ಕಾರ್ಯಕ್ರಮದಡಿಯಲ್ಲಿ 30 ಲಕ್ಷ ರೂಪಾಯಿ ಅನುದಾನದಲ್ಲಿ ಈ ಕಾರ್ಯವನ್ನು ಕೈಗೆತ್ತಿಕೊಳ್ಳಲಾಗಿದ್ದು, ನಿಸರ್ಗಧಾಮದ 80 ಎಕರೆ ಜಾಗದಲ್ಲಿ ಔಷಧೀಯ ಗಿಡ ನೆಡುವ ಈ ಯೋಜನೆಯ ನೇತೃತ್ವವನ್ನು ಸಸ್ಯಶಾಸ್ತ್ರ ವಿಭಾಗದ ಮುಖ್ಯಸ್ಥ ಪ್ರೊ. ಕಾವೇರಪ್ಪ ಅವರು ವಹಿಸಲಿದ್ದಾರೆ.

ಈ ವಿಷಯವನ್ನು ಸಸ್ಯಶಾಸ್ತ್ರ ವಿಭಾಗದ ಯೋಜನಾಧಿಕಾರಿ ಡಾ. ರಾಮಭಟ್‌ ಅವರು ವಿಠ್ಠಲ ಪದವಿಪೂರ್ವ ಕಾಲೇಜು ಮತ್ತು ಬಾಲಿಕಾ ಪ್ರೌಢಶಾಲೆಯ ಪರಿಸರ ಸಂಘದ ಕಾರ್ಯಕ್ರಮದಲ್ಲಿ ಶುಕ್ರವಾರ ತಿಳಿಸಿದರು.

ಕೋಣಾಜೆಯ ನಾಲ್ಕು ಎಕರೆ ಪ್ರದೇಶದಲ್ಲಿ ವಿಶ್ವ ವಿದ್ಯಾಲಯವು ಸಸ್ಯಧಾಮವೊಂದನ್ನು ಈಗಾಗಲೇ ನಿರ್ವಹಿಸುತ್ತಿದ್ದು, 250 ವಂಶಾವಳಿಯ ಔಷಧೀಯ ಗಿಡಗಳ ನರ್ಸರಿಯನ್ನೂ ವಿವಿ ನಡೆಸುತ್ತಿದೆ. ವಿವಿಯ ಸಸ್ಯ ಶಾಸ್ತ್ರವಿಭಾಗ ಕೈಗಾ ಅಣುಸ್ಥಾವರ ಮತ್ತು ಕುದುರೆಮುಖ ಕಬ್ಬಿಣ ಅದಿರು ಕಾರ್ಖಾನೆ ನಿವೇಶನದಲ್ಲಿಯೂ ಈಗಾಗಲೇ ಉಪಯುಕ್ತ ಗಿಡಗಳನ್ನು ನೆಡಲಾಗಿದೆ ಎಂದು ರಾಮಭಟ್‌ ಹೇಳಿದರು.

(ಇನ್ಫೋ ವಾರ್ತೆ)