ಸಾಫ್ಟ್‌ವೇರ್‌ ಕ್ಷೇತ್ರಕ್ಕೆಬಂಡವಾಳ ಹರಿಕೆ ಮುಂದುವರೆದಿದೆ- ವಿವೇಕ್‌

ಮೈಸೂರು : ಅಮೆರಿಕ ಆರ್ಥಿಕ ಹಿನ್ನಡೆಯ ಹೊರತಾಗಿಯೂ ಸಾಫ್ಟ್‌ವೇರ್‌ ಕ್ಷೇತ್ರಕ್ಕೆ ಬಂಡವಾಳ ಆಕರ್ಷಿಸುವಲ್ಲಿ ರಾಜ್ಯ ಹಿಂದೆ ಬಿದ್ದಿಲ್ಲ ಎಂದು ರಾಜ್ಯ ಮಾಹಿತಿ ತಂತ್ರಜ್ಞಾನ ಕಾರ್ಯದರ್ಶಿ ವಿವೇಕ್‌ ಕುಲಕರ್ಣಿ ಹೇಳಿದ್ದಾರೆ.

ಅವರು ಮೈಸೂರು ವಿಶ್ವವಿದ್ಯಾಲಯದ ಆವರಣದಲ್ಲಿ ಶನಿವಾರ ಮಾಹಿತಿ ವಿಜ್ಞಾನ ಮತ್ತು ತಂತ್ರಜ್ಞಾನ ಕೇಂದ್ರ (ಸಿಐಎಸ್‌ಟಿ) ದ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡುತ್ತಿದ್ದರು. ಪ್ರತಿ ವಾರವೂ ಒಂದಲ್ಲ ಒಂದು ಹೊಸ ಕಂಪೆನಿ ನೇರ ಬಂಡವಾಳವನ್ನು ಹೂಡುವ ಪ್ರಸ್ತಾವನೆಯಾಂದಿಗೆ ರಾಜ್ಯಕ್ಕೆ ಭೇಟಿನೀಡುತ್ತಿದೆ ಎಂದ ವಿವೇಕ್‌, ಸಾಫ್ಟ್‌ವೇರ್‌ ಟೆಕ್ನಾಲಜಿ ಪಾರ್ಕ್‌ನ ಮೈಸೂರು ಘಟಕ ಈ ವರ್ಷ 90 ಕೋಟಿ ರೂ. ಮೌಲ್ಯದ ಸಾಫ್ಟ್‌ವೇರ್‌ ರಫ್ತು ಮಾಡುವ ಗುರಿ ಇಟ್ಟುಕೊಂಡಿದೆ ಎಂದರು.

ಇತ್ತೀಚೆಗೆ ಖಾಸಗಿ ಅಂತರರಾಷ್ಟ್ರೀಯ ಸಲಹಾ ಕಂಪೆನಿಯಾಂದಿಗೆ ನಾಸ್‌ಕಾಮ್‌ ನಡೆಸಿದ ಸಮೀಕ್ಷೆಯನ್ನು ಉಲ್ಲೇಖಿಸುತ್ತಾ , ಜಾಗತಿಕ ಸಾಫ್ಟ್‌ವೇರ್‌ ಕ್ಷೇತ್ರದಲ್ಲಿ ಭಾರತ ಬ್ರಾಂಡ್‌ ಲೀಡರ್‌ ಆಗಿದೆ. ಆರ್ಥಿಕ ಹಿನ್ನಡೆಯನ್ನು ಲೆಕ್ಕಿಸದೆಯೇ ಭಾರತೀಯ ಮಾಹಿತಿ ತಂತ್ರಜ್ಞಾನ ಕ್ಷೇತ್ರ ಮಿಲಿಯಗಟ್ಟಲೆ ಉದ್ಯೋಗವಕಾಶ ಸೃಷ್ಟಿಸುವುದಾಗಿ ಭರವಸೆ ನೀಡಿದೆ. ಕಾಲ್‌ ಸೆಂಟರ್‌ ಆಪರೇಷನ್ಸ್‌ಗೆ ಭಾರತದಲ್ಲಿ ಬೇಡಿಕೆ ಇದ್ದು 150 ಮಿಲಿಯ ಪದವೀಧರರನ್ನು ಅದು ಬಳಸಿಕೊಳ್ಳಲಿದೆ. ಮನೆಯಲ್ಲಿಯೇ ಉದ್ಯೋಗ ಎಂಬ ತತ್ವದಡಿ ಪದವೀಧರ ಗೃಹಿಣಿಯರೂ ಉದ್ಯೋಗಸ್ಥರಾಗುವ ಕಾಲ ದೂರವಿಲ್ಲ ಎಂದರು.

ಇನ್ಫೋಸಿಸ್‌ ಪ್ರತಿಷ್ಠಾನದ ಸುಧಾ ಮೂರ್ತಿ ಅವರ ಸಾಧನೆಯನ್ನು ಉದಾಹರಿಸುತಾ ್ತ , ರಾಜ್ಯದ ಗ್ರಾಮೀಣ ಪ್ರದೇಶಗಳಲ್ಲಿ ಸುಮಾರು 3,500 ಲೈಬ್ರರಿಗಳನ್ನು ಸ್ಥಾಪಿಸುವ ಮೂಲಕ ಆಕೆ ಐಟಿ ಜ್ಞಾನವನ್ನು ಬಿತ್ತರಿಸುವ ಕಾರ್ಯದಲ್ಲಿ ನಿರತರಾಗಿದ್ದಾರೆ ಎಂದು ವಿವೇಕ್‌ ಶ್ಲಾಘಿಸಿದರು.

ಸಿಐಎಸ್‌ಟಿಯನ್ನು ಉದ್ಘಾಟಿಸಿದ ಸುಧಾಮೂರ್ತಿ ಕಡಿಮೆ ವೆಚ್ಚದಲ್ಲಿ ಗ್ರಾಮೀಣ ಪ್ರದೇಶದ ಜನರಿಗೆ ಮಾಹಿತಿ ತಂತ್ರಜ್ಞಾನವನ್ನು ತಲುಪಿಸುವ ಅಗತ್ಯವನ್ನು ಒತ್ತಿ ಹೇಳಿದರು. ಸಿಐಎಸ್‌ಟಿಯು ಗೃಹಿಣಿಯರಿಗೂ ಸೇರಿದಂತೆ ಏಳು ಡಿಪ್ಲೊಮಾ ಮತ್ತು ಮೂರು ಸರ್ಟಿಫಿಕೇಟ್‌ ಕೋರ್ಸ್‌ಗಳನ್ನು ಇದೇ ಶೈಕ್ಷಣಿಕ ವರ್ಷದಿಂದ ಆರಂಭಿಸಲಿದೆ ಎಂದು ವಿಶ್ವ ವಿದ್ಯಾಲಯದ ಉಪಕುಲಪತಿ ಪ್ರೊ. ಎಸ್‌.ಎನ್‌. ಹೆಗ್ಡೆ ತಿಳಿಸಿದರು.

(ಯುಎನ್‌ಐ)