ಆಗಸ್ಟ್‌ 2ರಂದು ಇಂಟೆಲ್‌ ಕಾರ್ಪೊರೇಷನ್‌ನ ಬ್ಯಾರೆಟ್‌ ಬೆಂಗಳೂರಿಗೆ

ಬೆಂಗಳೂರು : ಆಗಸ್ಟ್‌ 2ರಂದು ಸಿಲಿಕಾನ್‌ ನಗರಿಗೆ ಸಿಲಿಕಾನ್‌ ದಿಗ್ಗಜರೊಬ್ಬರು ಬಂದಿಳಿಯಲಿದ್ದಾರೆ. ಉದ್ದಿಮೆದಾರರ ಕಣ್ಣೆಲ್ಲಾ ಎರಡು ದಿನಗಳ ಕಾಲ ಬೆಂಗಳೂರಿನತ್ತಲೇ ನೆಡಲಿದೆ. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗುರ್ತಿಸಿಕೊಂಡಿರುವ ಇಂಟೆಲ್‌ ಕಾರ್ಪೊರೇಷನ್ನಿನ ಕ್ರೇಗ್‌ ಆರ್‌. ಬ್ಯಾರೆಟ್‌ ಬೆಂದಕಾಳೂರಿಗೆ ಎರಡು ದಿನಗಳ ಭೇಟಿ ಕೊಡಲಿದ್ದಾರೆ.

ನಗರಿಯಲ್ಲಿನ ಇಂಟೆಲ್‌ ಕೇಂದ್ರವನ್ನು ವಿಸ್ತರಿಸುವ ಕಾರ್ಯಕ್ರಮಕ್ಕೆ ಬ್ಯಾರೆಟ್‌ ಚಾಲನೆ ಕೊಡುವರೋ? ಅಮೆರಿಕ ಆರ್ಥಿಕ ಹಿನ್ನಡೆಯ ಹಿನ್ನೆಲೆಯಲ್ಲಿ ಬೆಂಗಳೂರಲ್ಲಿ ತಮ್ಮ ಕಂಪನಿಯ ವಹಿವಾಟು ಹೆಚ್ಚಿಸುವ ಹೆಜ್ಜೆಗಳನ್ನೇನಾದರೂ ಇಡುವರೋ? ಎಂಬ ಪ್ರಶ್ನೆಗಳು ಉದ್ದಿಮೆದಾರರ ಮನದಲ್ಲಿ ಸುಳಿದಾಡುತ್ತಿವೆ. ಕಂಪನಿಯ 15 ಕೇಂದ್ರಗಳ ಪೈಕಿ ಬೆಂಗಳೂರಲ್ಲೂ ಒಂದು ಕೇಂದ್ರವಿದೆ. ಜೊತೆಗೆ ಏರ್‌ಪೋರ್ಟ್‌ ರಸ್ತೆಯಲ್ಲಿ ಕಂಪನಿಯ ತುಂಡು ಭೂಮಿಯೂ ಇದೆ. ಈ ಭೂಮಿಯಲ್ಲಿ ಐಟಿ ಅಲೆಯೆಬ್ಬಿಸುವ ಉದ್ದಿಶ್ಯ ಬ್ಯಾರೆಟ್‌ ಅವರದ್ದಿರಬಹುದೇ ಎಂಬ ಅನುಮಾನವೂ ಈ ಹೊತ್ತು ಕೇಳಿಬರುತ್ತಿದೆ.

ಆಗಸ್ಟ್‌ 2 ಹಾಗೂ 3ರ ಎರಡು ದಿನಗಳ ತಮ್ಮ ಭೇಟಿಯಲ್ಲಿ ಮುಖ್ಯಮಂತ್ರಿ ಎಸ್‌.ಎಂ.ಕೃಷ್ಣ ಹಾಗೂ ಉದ್ದಿಮೆದಾರರನ್ನು ಬ್ಯಾರೆಟ್‌(ವಿಶೇಷವಾಗಿ ಇನ್ಫೋಸಿಸ್‌ ನಾರಾಯಣ ಮೂರ್ತಿ ಹಾಗೂ ವಿಪ್ರೋದ ಅಜೀಂ ಪ್ರೇಂಜಿ ?) ಭೇಟಿಯಾಗಲಿದ್ದಾರೆ. ಬ್ಯಾರೆಟ್‌ ಭೇಟಿ ಕಾಯೋ, ಹಣ್ಣೋ ಅನ್ನೋದು ಆಗಸ್ಟ್‌ 3ರ ಹೊತ್ತಿಗೆ ಬಹುತೇಕ ಗೊತ್ತಾಗಲಿದೆ.

(ಇನ್ಫೋ ವಾರ್ತೆ)