‘ವ್ಯಾಟ್‌’ ಅಳವಡಿಕೆಗೆ ಬ್ರಿಟನ್‌ ಸಂಸ್ಥೆಯಾಂದಿಗೆ ರಾಜ್ಯದ ಒಪ್ಪಂದ

ಬೆಂಗಳೂರು : ‘ಮೌಲ್ಯ ವರ್ಧಿತ ತೆರಿಗೆ’(ವಿಎಟಿ) ಪದ್ಧತಿಯನ್ನು ಅಳವಡಿಸಿಕೊಳ್ಳಲು ವಾಣಿಜ್ಯ ತೆರಿಗೆ ವಿಭಾಗಕ್ಕೆ ತರಬೇತಿ ನೀಡುವುದಕ್ಕಾಗಿ ಬ್ರಿಟನ್‌ ಮೂಲದ ಅಭಿವೃದ್ಧಿ ಸಹಕಾರಿ ಸಂಸ್ಥೆ ‘ಕ್ರೌನ್‌ ಏಜೆಂಟ್ಸ್‌’(ಸಿಎ) ಜೊತೆ 20 ಕೋಟಿ ರೂಪಾಯಿಯ ಒಪ್ಪಂದ ಮಾಡಿಕೊಳ್ಳಲು ರಾಜ್ಯ ಸರಕಾರ ನಿಶ್ಚಯಿಸಿದೆ.

ಕೇಂದ್ರದ ಅನುಮತಿ ಸಿಕ್ಕಿದ ತಕ್ಷಣವೇ ‘ಸಿಎ’ ಸಂಸ್ಥೆಯ ಪ್ರತಿನಿಧಿಗಳ ಸಮ್ಮುಖದಲ್ಲಿ ಒಂದು ವರ್ಷ ಅವಧಿಯ ಈ ಒಡಂಬಡಿಕೆ ಪತ್ರಕ್ಕೆ ರಾಜ್ಯ ಸರಕಾರ ಸಹಿ ಹಾಕಲಿದೆ ಎಂದು ವಾಣಿಜ್ಯ ತೆರಿಗೆ ಆಯುಕ್ತ ವಿ. ಮಧು ಹೇಳಿದ್ದಾರೆ. ಕರ್ನಾಟಕ- ದೇಶದಲ್ಲಿಯೇ ಮೌಲ್ಯ ವರ್ಧಿತ ತೆರಿಗೆ ನೀತಿ ಅಳವಡಿಸಿಕೊಳ್ಳುವ ನಿಟ್ಟಿನಲ್ಲಿ ಅಂತರರಾಷ್ಟ್ರೀಯ ಸಂಸ್ಥೆಯಾಂದಿಗೆ ಒಪ್ಪಂದ ಮಾಡಿಕೊಳ್ಳುತ್ತಿರುವ ಪ್ರಥಮ ರಾಜ್ಯ ಎನಿಸಿಕೊಂಡಿದೆ.

ಅಂತರರಾಷ್ಟ್ರೀಯ ವ್ಯಾಪಾರ ಕ್ಷೇತ್ರದಲ್ಲಿ ‘ಸಿಎ’ ಸಂಸ್ಥೆಯು ವಿಶೇಷ ತಜ್ಞರಿಂದ, ಕೊಳ್ಳುವಿಕೆ, ಆರ್ಥಿಕತೆ ಮತ್ತು ಸಂಸ್ಥೆಗಳ ಬೆಳವಣಿಗೆ ಬಗ್ಗೆ ತರಬೇತಿ ನೀಡುತ್ತದೆ. ಸುಮಾರು 6 ಬಿಲಿಯನ್‌ ಡಾಲರ್‌ ವಾರ್ಷಿಕ ವ್ಯವಹಾರ ನಡೆಸುವ ಸಂಸ್ಥೆಯ ತರಬೇತಿಯು ವಿದೇಶದಲ್ಲಿ ಅಧ್ಯಯನವನ್ನೂ ಒಳಗೊಂಡಿದೆ.

ಬ್ರಿಟನ್‌ನಲ್ಲಿ 15 ವರ್ಷಗಳಿಗೂ ಹಿಂದೆ ವಿಎಟಿ ಪದ್ಧತಿ ಜಾರಿಗೆ ಬಂದಿರುವುದರಿಂದ ಅಲ್ಲಿನ ಸಂಸ್ಥೆ ನಮಗೆ ವಿವರವಾಗಿ ಮಾರ್ಗದರ್ಶನ ಮಾಡಬಲ್ಲುದು ಎಂಬ ನಂಬಿಕೆಯಿಂದ ‘ಸಿಎ’ ಸಂಸ್ಥೆಯನ್ನು ಸಂಪರ್ಕಿಸಿದ್ದೇವೆ ಎಂದು ಮಧು ಹೇಳಿದ್ದಾರೆ. ಸಿಎಯಿಂದ ವಿವಿಧ ಹಂತದಲ್ಲಿ ಸುಮಾರು 1,000 ತರಬೇತಿ ಗೋಷ್ಠಿಗಳು ನಡೆಯಲಿವೆ. ತರಬೇತಿಯ ಹೊರತಾಗಿ ‘ಸಿಎ’ ಯು ವಿಎಟಿ ನೀತಿ ಅಳವಡಿಕೆಯಿಂದಾಗುವ ಋಣಾತ್ಮಕ ಪರಿಣಾಮಗಳನ್ನು ಸರಿಪಡಿಸುವ ಕುರಿತೂ ಸಲಹೆ ನೀಡುವುದು.

ಮೌಲ್ಯ ವರ್ಧಿತ ತೆರಿಗೆ ನೀತಿ ಅಳವಡಿಸಿಕೊಳ್ಳಲು ಪ್ರಥಮ ಬಾರಿಗೆ ರಾಜ್ಯ ಸರಕಾರವು ಅಂತರರಾಷ್ಟ್ರೀಯ ಹಣಕಾಸು ವ್ಯವಹಾರ ವಿಭಾಗದ ಉಪ ನಿರ್ದೇಶಕ ವೇದ ಗಾಂಧಿ ಅವರನ್ನು ಸಲಹಾ ಆರ್ಥಿಕ ತಜ್ಞರನ್ನಾಗಿ ನೇಮಿಸಿಕೊಂಡಿದೆ.

(ಇನ್ಫೋ ವಾರ್ತೆ)