ಪಾಕ್‌ ಭೇಟಿ: ವಾಜಪೇಯಿ- ಜಸ್ವಂತ್‌ಗೆ ಔಪಚಾರಿಕ ಆಹ್ವಾನಪತ್ರ

ಇಸ್ಲಮಾಬಾದ್‌ : ಆಗ್ರಾ ಶೃಂಗಸಭೆಯ ಮಾತುಕತೆಗಳನ್ನು ಮುಂದುವರಿಸುವ ಉದ್ದೇಶದಿಂದ ಭಾರತದ ಪ್ರಧಾನಿ ವಾಜಪೇಯಿ ಹಾಗೂ ವಿದೇಶಾಂಗ ವ್ಯವಹಾರಗಳ ಸಚಿವ ಜಸ್ವಂತ್‌ ಸಿಂಗ್‌ ಅವರಿಗೆ ಸೋಮವಾರ ಔಪಚಾರಿಕ ಆಹ್ವಾನ ಕಳುಹಿಸುವ ಮೂಲಕ ಮಾತುಕತೆಗಳನ್ನು ಮುಂದುವರಿಸುವ ತನ್ನ ಆಸಕ್ತಿಯನ್ನು ಪಾಕಿಸ್ತಾನ ಪುನಃ ವ್ಯಕ್ತಪಡಿಸಿದೆ.

ಕಾಶ್ಮೀರ ಸೇರಿದಂತೆ ಎಲ್ಲ ವಿಷಯಗಳಲ್ಲೂ ಒಮ್ಮತಕ್ಕೆ ಬರಲು ಸಾಧ್ಯವಾಗುವಂತೆ ಚರ್ಚೆಗಳನ್ನು ಮುಂದುವರಿಸಲು ಉಭಯ ನಾಯಕರು ತಮಗೆ ಅನುಕೂಲ ದಿನಾಂಕಗಳಲ್ಲಿ ಪಾಕಿಸ್ತಾನಕ್ಕೆ ಭೇಟಿ ನೀಡುವಂತೆ ಪ್ರತ್ಯೇಕ ಆಹ್ವಾನ ಪತ್ರಗಳನ್ನು ಪಾಕ್‌ ಸರ್ಕಾರ ಶನಿವಾರವೇ ಕಳುಹಿಸಿದೆ ಎಂದು ಪಾಕ್‌ ದೈನಿಕ ‘ದಿ ನೇಷನ್‌ ವರದಿ’ ಮಾಡಿದೆ.

ವಾಜಪೇಯಿ ಅವರಿಗೆ ಸ್ವತಃ ಪಾಕ್‌ ಅಧ್ಯಕ್ಷ ಪರ್ವೇಜ್‌ ಮುಷರ್ರಫ್‌ ಅವರು ಆಹ್ವಾನವನ್ನು ಕಳುಹಿಸಿದ್ದರೆ, ಜಸ್ವಂತ್‌ ಸಿಂಗ್‌ ಅವರಿಗೆ ಕಳುಹಿಸಿರುವ ಆಹ್ವಾನ ಪತ್ರಕ್ಕೆ ಪಾಕ್‌ ವಿದೇಶಾಂಗ ವ್ಯವಹಾರಗಳ ಸಚಿವ ಅಬ್ದುಲ್‌ ಸತ್ತಾರ್‌ ಸಹಿ ಹಾಕಿದ್ದಾರೆ ಎಂದು ಹೇಳಿರುವ ಪತ್ರಿಕೆಯ ವರದಿ, ಈ ಆಹ್ವಾನವನ್ನು ಶಾಂತಿಯ ಬಗೆಗೆ ಪಾಕಿಸ್ತಾನಕ್ಕಿರುವ ಕಾತರ ಎಂದು ಬಣ್ಣಿಸಿದೆ. ಈ ಮುನ್ನ ಆಗ್ರಾ ಶೃಂಗಸಭೆ ಸಂದರ್ಭದಲ್ಲಿ ಪಾಕ್‌ ಭೇಟಿಗೆ ಮುಷರ್ರಫ್‌ ಅವರು ನೀಡಿದ್ದ ಆಹ್ವಾನವನ್ನು ಪ್ರಧಾನಿ ವಾಜಪೇಯಿ ಒಪ್ಪಿಕೊಂಡಿದ್ದನ್ನು ಇಲ್ಲಿ ಸ್ಮರಿಸಬಹುದು.

(ಏಜೆನ್ಸೀಸ್‌)

ಮುಖಪುಟ / ಆಗ್ರಾ ಶೃಂಗಸಭೆ