ಮುಷರ್ರಫ್‌ ಉದ್ವೇಗಗೊಂಡಿದ್ದರೇ? ಸಿಗಾರ್‌ ಅಂತೂ ಸೇದಿದರು

ಆಗ್ರಾ : ಅಮರ ವಿಲಾಸ ಹೊಟೇಲಿನ ವೈಭವಯುತ ಕೊಹಿನೂರ್‌ ಕೋಣೆಯಲ್ಲಿ ಮುಷರ್ರಫ್‌ ಸಿಗಾರ್‌ ಸೇವಿಸಿದರು. ಅದೂ ಸೋಮವಾರ ನಡು ಮಧ್ಯಾಹ್ನದ ಹೊತ್ತಿನಲ್ಲಿ !

ಮುಷರ್ರಫ್‌ ನಿರಂತರ ಧೂಮಪಾನ ಮಾಡುವ ಜಾತಿಗೆ ಸೇರಿದವರೇನಲ್ಲ . ಆದರೆ ಏನು ಮಾಡುವುದು, ಬೆಳಗ್ಗೆ ಪ್ರಮುಖ ಸುದ್ದಿ ಮಾಧ್ಯಮಗಳ ಸಂಪಾದಕರೊಂದಿಗಿನ ಮುಖಾಮುಖಿ ಹಾಗೂ ಮಾತುಕತೆಗಳಲ್ಲಿ ಕಾಣದ ಫಲಶ್ರುತಿ ಅವರನ್ನು ಹಣ್ಣು ಮಾಡಿತ್ತು . ಕೊನೆಗುಳಿದದ್ದು ಸಿಗಾರ್‌. ಕ್ಯುಬನ್‌ ಸಿಗಾರೊಂದನ್ನು ಮುಷರ್ರಫ್‌ ಸೇದಿದರು. ಉದ್ವೇಗ ಶಮನವಾಯಿತೊ ಇಲ್ಲವೊ ತಿಳಿಯಲಿಲ್ಲ .

1999 ರ ಅಕ್ಟೋಬರ್‌ 12 ರಂದು, ಕೊಲಂಬೊದಿಂದ ಮುಷರ್ರಫ್‌ ಪ್ರಯಾಣಿಸುತ್ತಿದ್ದ ವಿಮಾನಕ್ಕೆ ಕರಾಚಿಯಲ್ಲಿ ಇಳಿಯಲು ಅವಕಾಶ ನಿರಾಕರಿಸಿದಾಗ ಮುಷರ್ರಫ್‌ ಸಿಗಾರ್‌ ಸೇದಿದ್ದರು. ಅದು ಅವರಲ್ಲಿನ ಉದ್ವೇಗ ಸೂಚಿಸುತ್ತಿತ್ತು ಎಂದು ತದನಂತರ ಅವರ ಪತ್ನಿ ಷೇಬಾ ತಿಳಿಸಿದ್ದರು.

ವಿಮಾನ ಇಳಿಯಲು ಅವಕಾಶ ನಿರಾಕರಿಸಿದ ಅವಮಾನವನ್ನು ಮುಷರ್ರಫ್‌ ಅವರೇನೂ ಬಚ್ಚಿಟ್ಟುಕೊಳ್ಳಲಿಲ್ಲ . ತಮ್ಮನ್ನು ಹತ್ಯೆ ಮಾಡಲು ಸಂಚು ರೂಪಿಸಲಾಗಿತ್ತು ಎಂದು ಆಪಾದಿಸಿದರು. ಅಂದಿನ ಪ್ರಧಾನಿ ನವಾಜ್‌ ಷರೀಫ್‌ ಅವರನ್ನು ರಕ್ತ ರಹಿತ ಕ್ರಾಂತಿಯಲ್ಲಿ ಕೆಳಗಿಳಿಸಿ, ಪಾಕ್‌ನ ಮುಖ್ಯ ಕಾರ್ಯ ನಿರ್ವಾಹಕರಾದರು. ಅದು ಇತಿಹಾಸ. ಈ ಬಾರಿ ಸಿಗಾರ್‌ ಸೇವಿಸಿದ ಮುಷರ್ರಫ್‌ ಮಾಡುವಂತದ್ದೇನೂ ಇರಲಿಲ್ಲ . ಕೈಲಿದ್ದುದು ಮಾತುಕತೆಯನ್ನು ಮುರಿದುಕೊಳ್ಳುವುದು. ಅದರಲ್ಲಿ ಅವರು ಯಶಸ್ವಿಯಾದರು.

(ಇನ್ಫೋ ವಾರ್ತೆ)

What do you think about this article?

ಮುಖಪುಟ / ಆಗ್ರಾ ಶೃಂಗಸಭೆ