ಸಿದ್ಧವಾಗುತ್ತಿದೆ 9 ಅಂಶಗಳ ಆಗ್ರಾ ಘೋಷಣೆ?

ಆಗ್ರಾ : ಆಗ್ರಾ ಘೋಷಣೆ ಪ್ರಕಟಣೆ ಹೆಚ್ಚೂ ಕಮ್ಮಿ ಖಚಿತವಾಗಿದ್ದು, ಅದಕ್ಕೆ ಅಂತಿಮ ಟಚ್‌ ನೀಡಲಾಗುತ್ತಿದೆ ಎಂದು ಪಾಕಿಸ್ತಾನಿ ಸರ್ಕಾರದ ವಾರ್ತಾ ಅಧಿಕಾರಿ ತಿಳಿಸಿದ್ದಾರೆ.

ಭಾರತ ಹಾಗೂ ಪಾಕಿಸ್ತಾನದ ಉಭಯ ನಿಯೋಗಗಳು 9 ಅಂಶಗಳಿರುವ ಘೋಷಣೆಯನ್ನು ಸಿದ್ಧಪಡಿಸುತ್ತಿದ್ದು, ಸೋಮವಾರ ಸಂಜೆ 5 ಗಂಟೆಯ ಆಸುಪಾಸಿನಲ್ಲಿ ಘೋಷಣೆ ಹೊರಬೀಳುವ ನಿರೀಕ್ಷೆಯಿದೆ.

ಪಾಕಿಸ್ತಾನದ ವಾರ್ತಾ ಅಧಿಕಾರಿ ಎ.ಎ.ಗೊಂಡಾಲ್‌, ಈವರೆಗಿನ ಬೆಳವಣಿಗೆಗಳ ಬಗ್ಗೆ ನಮಗೆ ತೃಪ್ತಿ ಇದೆ. ಆದರೆ ಭಾರತದ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವೆ ಸುಷ್ಮಾ ಸ್ವರಾಜ್‌ ಕಾಶ್ಮೀರ ಸಮಸ್ಯೆಯನ್ನು ತಮ್ಮ ಸುದ್ದಿಗೋಷ್ಠಿಯಲ್ಲಿ ಉಲ್ಲೇಖಿಸದಿರುವುದಕ್ಕೆ ಅಸಮಾಧಾನ ಇದೆ ಎಂದು ಹೇಳಿದರು.

ಶೃಂಗಸಭೆಗೆ ಸತ್ಫಲ ದೊರೆತಲ್ಲಿ ಉಭಯ ರಾಷ್ಟ್ರಗಳ ಜೊತೆ ಸಂಬಂಧ ಉತ್ತಮವಾಗುತ್ತದೆ. ಅಕಸ್ಮಾತ್‌ ಅದರ ಉಪಸಂಹಾರದಲ್ಲಿ ಅಪಸ್ವರ ಕೇಳಿದಲ್ಲಿ, ಅದಕ್ಕೆ ಒಂದು ವಿಧದಲ್ಲಿ ಸುಷ್ಮಾ ಸ್ವರಾಜ್‌ ಅವರನ್ನು ಹೊಣೆಯಾಗಿಸುವ ಸುದ್ದಿ ಕೂಡ ಕೇಳಿ ಬರುತ್ತಿದೆ.

(ಇನ್ಫೋ ವಾರ್ತೆ)