ಕಾರು ಅಪಘಾತ: ಚಿತ್ರನಟಿ ಜಯಂತಿ ಪ್ರಾಣಾಪಾಯದಿಂದ ಪಾರು

ಬಳ್ಳಾರಿ :ಹೆಸರಾಂತ ಚಿತ್ರನಟಿ, ಪಂಚಭಾಷಾ ತಾರೆ ಜಯಂತಿ ಅವರು ಪ್ರಯಾಣಿಸುತ್ತಿದ್ದ ಕಾರು ಇಲ್ಲಿಗೆ 45 ಕಿಲೋ ಮೀಟರ್‌ ದೂರದ ಆಲೂರು ಬಳಿ ಅಪಘಾತಕ್ಕೀಡಾಗಿ ಹತ್ತು ಅಡಿ ಹಳ್ಳಕ್ಕೆ ಉರುಳಿತಾದರೂ, ಜಯಂತಿ ಹಾಗೂ ಇತರ ಮೂವರು ಪವಾಡ ಸದೃಶ ರೀತಿಯಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ಬಿ.ಸಿ. ಪಾಟೀಲ್‌ ನಿರ್ಮಿಸಿ, ನಿರ್ದೇಶಿಸುತ್ತಿರುವ ಶಿವಪ್ಪ ನಾಯಕ ಚಿತ್ರದ ಚಿತ್ರೀಕರಣ ಮುಗಿಸಿಕೊಂಡು, ಗುರುರಾಯರ ದರ್ಶನಕ್ಕಾಗಿ ಜಯಂತಿ ಅವರು, ಮಂತ್ರಾಲಯಕ್ಕೆ ಹೊರಟಿದ್ದಾಗ ಅಪಘಾತ ಸಂಭವಿಸಿತು. ಆಂಧ್ರಪ್ರದೇಶದ ಅಲೂರು ಸಮೀಪ ಜಯಂತಿ ಅವರು ಪ್ರಯಾಣಿಸುತ್ತಿದ್ದ ಕಾರಿಗೆ ಲಾರಿಯಾಂದು ಡಿಕ್ಕಿ ಹೊಡೆದಿದ್ದರಿಂದ, ಕಾರು 10 ಅಡಿ ಹಳ್ಳಕ್ಕೆ ಉರುಳಿತು.

ಜಯಂತಿ ಹಾಗೂ ಕಾರಿನಲ್ಲಿದ್ದ ಇತರ ಮೂವರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ. ಗಾಯಾಳುಗಳಿಗೆ ಚಿಕಿತ್ಸೆ ನೀಡಿದ ವೈದ್ಯರು ಯಾರಿಗೂ ಗಂಭೀರ ಸ್ವರೂಪದ ಗಾಯಗಳಾಗಿಲ್ಲ ಎಂದು ತಿಳಿಸಿದ್ದಾರೆ. ಜಯಂತಿ ಅವರ ಪುತ್ರ ಕೃಷ್ಣಕುಮಾರ್‌ ತಮ್ಮ ಭಾವಿ ಪತ್ನಿ ಹಾಗೂ ಚಿತ್ರನಟಿ ಅನು ಪ್ರಭಾಕರ್‌ ಅವರೊಂದಿಗೆ ತೆರಳಿ ಅಮ್ಮನ ಯೋಗಕ್ಷೇಮ ವಿಚಾರಿಸಿಕೊಳ್ಳುತ್ತಿದ್ದಾರೆ.

(ಇನ್ಫೋ ವಾರ್ತೆ)

ಮುಖಪುಟ / ಇವತ್ತು... ಈ ಹೊತ್ತು...